Ikosoni ɔbɨlɨ kunu kyɛ mokokwonitɔgʉ
13
1 Ko ngbingo yi ndɨ nɨnɔ, bambanzʉ bemoti-bemoti bodhoku ndɨ katʉmbʉlyaga Yeso, bɛyɔ Pilatɨ ulumwisogo ndɨ mino bambanzʉ ka Galilaya ko ngbingo yi nɨnɔ ba ndɨ mino kapá Kunzi bapɛpɛ. Na bangʉ kabʉ ɨmatɨkanaga ndɨ pa imoti na nɨyɔ ka banyama bi nɨbɔ ba ndɨ kaʉpá ka apɛpɛ. 2 Yeso umigisyo bɛ : « Makasɨma bɛ bulumwisogo ndɨ bomikya baGalilaya bi nɨbɔ kyɛ ba ndɨ batʉ banyɛ kʉgbɛ kaʉkɨtaga bagɔgɔ basɨ ? 3 Haaa, luki limoti nakamʉbɨkya ambɛ makoikosi yɨgya kunu, ibunu basɨ molumwogo ndɛkɛ mʉdɔngɔnɨ abhɛ ɨbʉ gɔnɨ. 4 Na bambanzʉ tɛkɛbɛ na bʉgɨna bi nɨbɔ mʉnala ma Sɨlʉamʉ ʉgbɨgbɨla ndɨ na ulumwisogo, makasɨma bɛ ɨbʉ aka bɔ ba ndɨ bagya-manyɛ kaʉkɨtaga bambanzʉ basɨ ba Yelusalɛma ? 5 Haaa, luki limoti nakamʉbɨkya ambɛ makoikosi yɨgya kunu, ibunu basɨ molumwogo ndɛkɛ mʉdɔngɔnɨ abhɛ ɨbʉ gɔnɨ. »Yeso akatwa lizuni la bʉgɔ nɨbɔ kabʉkʉtagɨgʉ
6 Kumbuso yi Yeso ʉbɨkya ndɨ lizuni li nɨlɨ : « Mʉmbanzʉ bemoti a ndɨ na bʉgɔ nɨbɔ akʉna ndɨ kʉsɔ wo tiko kakɨ. Odhogoku ndɨ kaanda bhumo yi, luki limoti nɨ kinigʉ. 7 Abɨkya kʉwa zamʉ wo tiko bɛ : ‹ Wɨna mbɛyɨ ! A kʉwa byanga bɨsaa wa nodhogoku mino kaanda magɔ kusili wa sɨbhʉkʉsɔ si nɨsɨ nɨ nakɛgʉ katakanya yi. Gbɨta ! Akoumo pa payaya ! › 8 Luki limoti zamʉ wo tiko amigisyoku ndɨ bɛ : ‹ Ngama, wasa mbɛyɨ bata ka syangasʉ si nɨsɨna wa aka wa. Mbɨya wanʉ nakpɔ mbɛyɨ ka bakpɔlɔ-kpɔlɔ bi, noduko na lɨtɔmbʉ la dhɔbɔ. 9 Takagya bɛyɔ, akwananatʉ yagɔgɔ kabʉkʉta ka syangasʉ sa kumbuso ! Kobukuti sɛ kʉwa, wɛbɨkya bɛ nagbɨtɨ ! › »
Yeso aukusini muko bemoti ka lɨsyɛ la kimumbiso
10 Lɨsyɛ limoti la kimumbiso, Yeso a ndɨ kapá mʉtɨwɨ kʉsɔ wa ndabʉ imoti ya likungoni ka baYudha. 11 Kʉ bɛyɔ, a ndɨ na muko bemoti nɨnɔ a ndɨ no kolobu kʉsɔ wa byanga tɛkɛbɛ na bʉgɨna. Lɨlɨmba limoti a ndɨ nɨ andungulyogini, adukufo mʉgɔngʉ bigubu nɨ kɛgʉ wa akwanana ndɨ mino kananɨkana gʉtʉgʉ yɨkɛdɛ aka. 12 Ngbingo yi nɨnɔ Yeso amɨna ndɨ mino bɛyɔ, amaka, abɨkya bɛ : « Yɛ ma, kolobu kakʉ osyini. » 13 Abhisilyo ndɨ mabɔkʉ na wa aka wa ananɨkana, apʉnga ndɨ kabhibhiso Kunzi. 14 Luki limoti, nɨyɔ ngama wa ndabʉ ya likungoni yi nɨyɔ ɨna bɛ Yeso aukusini mʉmbanzʉ ka Lɨsyɛ la kimumbiso, lɨmbɛngɨ akandɨkanaga ndɨ bɨsʉlʉ-sʉlʉ. Kʉwa wa abɨkya ambaza ka bambanzʉ bi nɨbɔ ba ndɨ bʉmʉmʉkana wa bɛ : « Masyɛ ma ligubho a madɨya, dhogoniku nɛkɨ kayiukuso ka masyɛ mi nɨmɔ aka mɔ nɨ kɛgʉ ka lɨsyɛ la kimumbiso ! »
15 Luki limoti Mombukwono dhosu amigisyo bɛ : « Ma batʉ ba kʉbɔbɔkʉ ! Ka lɨsyɛ la kimumbiso, mʉmbanzʉ yɨkaka-yɨkaka lugo kunu akʉlagatʉ ngɔmbɛ gʉtʉgʉ punda kakɨ aka ka pa ɨlyalya, atundulo komwo libo. Kɛgʉ bɛyɔ ? 16 Na muko yi nɨmʉ, miko mika Abhalama nɨnɔ mumuyoniso akandaga ndɨ kʉsɔ wa byanga tɛkɛbɛ na bʉgɨna, kokwononigʉ bi bɛ bakʉlagɨ kʉsɔ wa ligbito kakɨ ka lɨsyɛ la kimumbiso ? »
17 Ngbingo yi nɨnɔ Yeso a ndɨ mino kaʉbɨkya bɛyɔ, bomuyoniso kakɨ basɨ bɨmʉkana ndɨ suni. Luki limoti ambaza wasɨ ka bambanzʉ ogwo ndɨ magyagya kaɨna makpʉmʉka mʉmbanga-mbanga masɨ nɨmɔ a ndɨ kagya mɔ.
Bokingyoso Bʉngama ko Kunzi na ɨkɨ ?
18 Kumbuso yi Yeso abɨkya bata bɛ : « Bʉngama ko Kunzi a mʉdɔngɔnɨ na ɨkɨ ? Nokingyoso pɨyɛ na ɨkɨ ? 19 A mʉdɔngɔnɨ abhɛ libhumo lɨkɛdɛ la sɨbhʉkʉsɔ nɨsɔ mʉtʉ bemoti ava ndɨ, akʉna ko tiko kakɨ. Abaka na ɨɨta kʉwa ndɨ sɨbhʉkʉsɔ sidhingi, bombu bodhoku kopiko bandabʉ kabʉ kʉgʉ wa tabhɨ yi. »
20 Yeso abɨkya bata bɛ : « Nakokingyoso Bʉngama ko Kunzi na ɨkɨ ? 21 A mʉdɔngɔnɨ abhɛ sɨbhʉkʉsɔ nɨsɔ ofulisogo mukati nɨ bomotonini na fufu mudhingi, kumbuso yɨkɛdɛ ofulo wasɨ bɨdhaɨ-dhaɨ ! »
Wanɨ nɔ ogulyo ka Bʉngama ko Kunzi ?
22 Kumbuso yi, Yeso ɨnda ndɨ miso ka Yelusalɛma anolingyo bagʉdʉ no giyo dhidhidhi. Anabɨkyaga Mongoni Manza bɛ Kunzi iko ndɛkɛ asɨ Ngama ka batʉ kakɨ aka. 23 Mʉmbanzʉ bemoti amuuso ndɨ bɛ : « Mombukwono dhosu, bambanzʉ bakɛdɛ aka bɔ binisoniso ndɛkɛ na muukuso ? »
Yeso umigisyo ɨbʉ basɨ bɛ : 24 « Gyoni ngu yasɨ kogulyo ka Bʉngama ko Kunzi pisi ka mupumi makpwɔ, kyɛ nakamʉbɨkya ambɛ bambanzʉ budhingi bakɨngɨla ndɛkɛ kogulyo mino luki limoti bakakwananɨgʉ. 25 Ngbingo yi nɨnɔ mombukwana ndabʉ amaga ndɛkɛ mino na adhʉlaga mupumi bɨkpwɔkpwɔkpwɔ, ibunu, mika kunzi, mapʉnga ndɛkɛ koipo holi manabɨkya bɛ : ‹ Mombukwono dhosu, tiukulyanɔ baka mupumi. › Ɨyɨ amumigisyo bɛ : ‹ Nakibhigʉ kʉ mapʉnya mino ! › 26 Kʉwa wa, mapʉnga ndɛkɛ kabɨkya bɛ : ‹ Talyalyaga ndɨ, tanomwo pa imoti na ibunu, ɨwɛ gɔnɨ nɔ watɨpága ndɨ mʉtɨwɨ ka bapa yangba ba ya bagʉdʉ kusu. › 27 Luki limoti, ɨgɨlya ndɛkɛ bata kamʉbɨkya bɛ : ‹ Nakibhigʉ kʉ mapʉnya mino. Tukyoni buwobhi na ɨmɨ, ibunu basɨ ma bagya-manyɛ ! › 28 Kʉ bɛyɔ, magamana ndɛkɛ na kaɨlya manzʉ wa mamɨna ndɛkɛ mino Abhalama, Isaka, Yakɔbɔ na bogyalandʉ basɨ nɨbɔ kʉsɔ wa Bʉngama ko Kunzi, luki limoti bamʉsa ndɛkɛ ibunu kunzi ! 29 Bambanzʉ bemoti-bemoti bodhogoku ndɛkɛ katʉkya ka ɨngɛngɛ na ka dhumbe, ka zɨbɔ na zebhu na biko ndɛkɛ bakikogo kalyalya ngbingo yi nɨnɔ Kunzi iko kʉwa mɨnɔ Ngama kabʉ. 30 Ka lɨngʉnʉ, bambanzʉ bemoti-bemoti nɨbɔ ba kumbuso mbɨya wanʉ biko ndɛkɛ kambwa na bagɔgɔ nɨbɔ ba kambwa mbɨya wanʉ biko kʉwa ndɛkɛ kumbuso. »
Batʉ ba Yelusalɛma bakɛgʉ kamʉkana Yeso
(Matayɔ 23.37-39)
31 Ko ngbingo yi nɨnɔ aka nɔ, baFalisayɔ bemoti-bemoti bakpudoku ndɨ Yeso na babɨkya bɛ : « Tʉkya wanʉ, waga ka pa yagɔgɔ, kyɛ ngama Ɛlɔdhɨ Atipasɨ akapa kaumwisiso. »
32 Yeso umigisyo bɛ : « Windoni kabɨkya mʉtʉ wa kʉbɔbɔkʉ yi nɨnɔ abhɛ sɔdhɔ nɔ bɛ : ‹ Na lɨsyɛ li nɨlɨna nakokpumyo malɨmba, koukuso bokolobu, na bʉgala nagya mʉdɔngɔnɨ bɛgɛyɔ. Kumbuso wa masyɛ mi nɨmɔ, nama lighubho kamɨ. › 33 Luki limoti, ʉbɨkya bɛ : okwononi bɛ nidhukulogi na lɨgʉndʉ kamɨ na lɨsyɛ li nɨlɨ, na bʉgala, na lɨsyɛ nɨlɔ lagɔgɔ; kyɛ kokwononigʉ bɛ bamwɨ mugyalandʉ kunzi wa Yelusalɛma.
34 Eeeze ibunu batʉ ba Yelusalɛma, batʉ ba Yelusalɛma, ibunu makaumwisiso na matamʉ bogyalandʉ nɨbɔ Kunzi utikoku ! Bongbingo bɨnga bɔ napa ndɨ mino kaʉmʉmʉla batʉ kakʉ mʉdɔngɔnɨ bɛyɔ kɔkʉ ʉmʉmʉlaga mino bomikakɨ kʉsɔ wa bɛpapandʉlʉ, luki limoti, ibunu makapagʉ ndɨ ! 35 Ɛɛɛ winoni sɛ, Kunzi amuginyotʉ lɨngʉnʉ. Nakamʉbɨkya ambɛ : katʉkya mbɨya wanʉ, makɛmɨnɨgʉ bata kadhwɛ ko ngbingo yi nɨnɔ mabɨkya ndɛkɛ mino bɛ : ‹ Kunzi Mombukwono dhosu oduki bʉbʉnga kʉgʉ ka mʉtʉ yi nɨnɔ akodhoku ko lino kakɨ ! › »