Mumuyoniso akakɨngɨlaga Yeso
4
1 Yeso igoku ka mutili mo libo ma Yɔlɔdhanɨ kʉwa mutumo na Lɨmbɛngɨ Lotu. Lɨmbɛngɨ lɨ nɨlɔ a ndɨ kakpokyoniso kʉ ka ɨsa. 2 Kʉ bɛyɔ, mumuyoniso a ndɨ kakɨngɨlaga kʉsɔ wa masyɛ batɛkɛbɛ bakwanganya. Kalyalyagɨgʉ ndɨ kʉsɔ wa masyɛ mi nɨmɔ, nɨyɔ masyɛ mi nɨmɔ ɨtʉlyana, ɨmʉkana ndɨ nza.3 Sɛ kʉwa wa, mumuyoniso abɨkya bɛ : « Kiko lɨngʉnʉ bɛ wa Miko Kunzi, kpamya lɨtalʉ li nɨlɨ ɨɨtɨ malɨlɨ. »
4 Yeso amigisyo bɛ : « Ikpiko kʉsɔ wa Mobiso ko Kunzi bɛ : ‹ Ɔbɨlɨ ka mʉmbanzʉ kɛgʉ asɨ ko bhulyo malɨlɨ aka.a › »
5 Kumbuso yi, mumuyoniso ɨnda ndɨ na ɨyɨ ka pa ɨkʉngʉ kʉgbɛ, amanya ko ngbingo bemoti ɔbɨlɨ wasɨ. 6-7 Abɨkya Yeso bɛ : « Wakobuno moli kambwa kamɨ, nʉpátʉ ngu na bʉngama basɨ nɨbana wakaɨna ba, kyɛ bɛpá ndɨ ɨmɨ; nakwanana gɔnɨ kapá mʉtʉ wasɨ nɨnɔ nopo. »
8 Yeso amigisyo bɛ : « Mobiso ko Kunzi abɨkya bɛ : ‹ Mubhibhiso Mombukwono dhosu Kunzi kakʉ na wabanga asɨ ɨyɨ aka.b › »
9 Mumuyoniso ɨnda gɔnɨ ndɨ na ɨyɨ ka Yelusalɛma, adokiso kugbondo wa Ndabʉ ko Kunzi, abɨkya bɛ : « Wakiko Miko Kunzi, bhumbuko katʉkya wanʉ kadhwɛ wasɨ, 10 kyɛ mobiso ko Kunzi akabɨkya bɛ : ‹ Kunzi ʉkpamya ndɛkɛ bamalaika kakɨ bɛ bubuulyogi. › 11 Na gɔnɨ : ‹ Bʉbhɨnɨka ndɛkɛ ka mabɔkʉ kabʉ, kakya bɛ kʉgʉkɔ kakʉ kosokogonitɔgʉ ka lɨtalʉ.c › »
12 Luki limoti, Yeso amigisyo bɛ : « Mobiso ko Kunzi akabɨkya bɛ : ‹ Wakakingilogonitɔgʉ Mombukwana dhakʉ Kunzi.d › »
13 Nɨyɔ mumuyoniso ama kʉwa ndɨ kakɨngɨlaga Yeso ka bopisi dhidhidhi, asa ndɨ mbɛyɨ.
Yeso opungini ligubho kakɨ ka Galilaya
14 Katʉkya kʉwa ndɨ wa, Yeso ɨga ka Galilaya mutumo bɨdɛ no ngu ya Lɨmbɛngɨ Lotu; mongoni kakɨ ɨtʉlyana ndɨ ka iwili yi nɨyɔ yasɨ. 15 Atɨwaga ndɨ kʉsɔ wa bandabʉ ba ya likungoni ka baYudha na bambanzʉ basɨ ba ndɨ kabhɨbha.
Bambanzʉ ba Nazalɛtɨ ba kɛgʉ kabhaɨlya Yeso
16 Yeso ɨnda ndɨ ka Nazalɛtɨ, kʉ opinga ndɨ mino. Lɨsyɛ la kimumbiso, ingyo ndɨ ka ndabʉ ya likungoni ka baYudha mʉdɔngɔnɨ bɛgɛyɔ agyaga ndɨ mino bongbingo basɨ. Amaga ndɨ kaʉtangʉlyaga bambanzʉ Mobiso ko Kunzi. 17 Bapá kɨtabʉ nɨyɔ mugyalandʉ Isaya okpiko ndɨ. Akʉlana,e ɨna ndɨ pa nɨyɔ ikpiko mino bɛ :
18 « Lɨmbɛngɨ ka Mombukwono dhosu a pa imoti na ɨmɨ,
egbodyo ndɨ molingo bɛ nabɨkyagɨ Mongoni Manza
ka bokwino.
Etikoku kaʉbɨkyaga batʉ ba ligbito bɛ bakʉlɨkanagatʉ banʉ,
nɨbɔ ba na bokolobu ba ya mamɔmɔ bɛ miso ʉkʉlɨkanatʉ banʉ bata,
nɨbɔ bakaigyogyiso bɛ bakʉlɨkanagatʉ banʉ,
19 kabɨkya bhulyo syangasʉ si nɨsɔ Mombukwono dhosu
uwonisilyo ndɛkɛ mino bambanzʉ bʉbʉnga kakɨ.f »
20 Nɨyɔ ama katangʉlaga bɛyɔ, Yeso odukufo kɨtabʉ, amigisyo ndɨ mʉgya-ligubho wa ndabʉ ya likungoni ka baYudha yi nɨyɔ na iko ndɨ. Bambanzʉ basɨ nɨbɔ ba ndɨ wa ba kʉwa ndɨ kanda ɨyɨ aka bɨngbangbangba. 21 Kʉwa wa, apʉnga ndɨ kaʉbɨkya bɛ : « Na lɨsyɛ li nɨlɨ, Mobiso ko Kunzi mi nɨma itulyonini kʉgʉ kunu nɨbɔ makɛmʉkana. »
22 Bambanzʉ basɨ ba ndɨ kabhibhiso Yeso na nɔkʉ ʉdhɨka ndɨ bɨdhɛ ko bhulyo mʉnzɨna mʉmbanga-mbanga nɨmɔ a ndɨ kopupo ka mʉnɔkʉ kakɨ. Babɨkyaga ndɨ bɛ : « Kɛgʉ mbɛyɨ asɨ mika Yɛzɛfʉ aka mʉ ! »
23 Yeso ʉbɨkya bɛ : « Lɨngʉnʉ aka makwanana banʉ ketulya ligbitoku li nɨlɨ : ‹ Mʉnganga, wiukusanɔ nɨ ɨwɛ yɨkaka aka. › Mɛbɨkyatʉ banʉ gɔnɨ bɛ : ‹ Tukana ndɨ masɨ nɨmɔ wagya ndɨ ka Kapɛlɛnaʉmʉ, gyanɔ mʉndɔngɔnɨ bɛgɛyɔ kʉnʉ kʉsɔ wa gʉdʉ yi nɨnɔ bubukuti mino. › »
24 Kumbuso yi amatɨla bɛ : « A bɛyɔ, nakamʉbɨkya lɨngʉnʉ aka bɨngbanganya ambɛ : mugyalandʉ gʉtʉgʉ bemoti aka, kɛgʉ na ɨbhɨbha kʉsɔ wa gʉdʉ yi nɨnɔ ibukuti mino. 25 Na bata, nakwanana kamʉbɨkya lɨngʉnʉ aka ambɛ ko ngbingo ka mugyalandʉ Ɨlɨa, bowoko boko bi ba ndɨ bakpʉ ka mugi ma Ɨzɛlɛlɨ. Ko ngbingo yi nɨnɔ mbwayɨ kalʉkagɨgʉ ndɨ kʉsɔ wa byanga bɨsaa na batɨmba madɨya. Kʉwa wa mufefenge ma nza ɨtʉlyana ndɨ kʉsɔ wa mugi masɨ. 26 Wɨna sɛ wa, Kunzi katɨkagʉ ndɨ Ɨlɨa gʉtʉgʉ ka bemoti kabʉ aka. Luki limoti, atɨka ndɨ asɨ ka woko bemoti muko yi aka nɨnɔ ikogo ndɨ ka Zalɛpɛta ka iwili ya Sidhona. 27 Na gɔnɨ, bakebu-kebu ba ndɨ budhingi kʉgbɛ ka Ɨzɛlɛlɨ ko ngbingo ka mugyalandʉ Ɨlɨsa. Wɨna sɛ, gʉtʉgʉ bemoti kabʉ aka kaʉkagʉ ndɨ. Luki limoti, Namanɨ aka nɔ aʉka ndɨ nɨnɔ mʉtʉ wa iwili ya Sulia. »
28 Nɨyɔ bambanzʉ basɨ nɨbɔ ba ndɨ kʉsɔ wa ndabʉ ya likungoni ka baYudha bʉkana lɨkpʉmʉka li nɨlɔ, mambɛngɨ ʉkandɨkanaga ndɨ bɨsʉlʉ-sʉlʉ. 29 Bamanana ndɨ bigwo, batindikogo ndɨ Yeso kunzi wa gʉdʉ, bɨnda ndɨ na ɨyɨ kʉgʉ wa ngʉpa nɨyɔ bopiko ndɨ mino Nazalɛtɨ, kyɛ ba ndɨ kapa katindikoku kʉnʉ wasɨ. 30 Luki limoti, akɨtaga ndɨ lugo kabʉ na ɨmagalya ndɨ ɨyɨ ya kakɨ.
Yeso aukusini mʉtʉ bemoti nɨnɔ a ndɨ na lɨlɨmba
(Malɨkɔ 1.21-28)
31 Yeso osyo ndɨ kʉwa ka Kapɛlɛnaʉmʉ, gʉdʉ wa iwili ya Galilaya. Kʉ bɛyɔ ʉtɨwaga ndɨ bambanzʉ basɨ ka lɨsyɛ la kimumbiso. 32 Mʉtɨwɨ kakɨ ʉmbangaga ndɨ bambanzʉ kʉgbɛ kyɛ anzɨnaga ndɨ na bʉngama bɨdɛ.
33 Kʉsɔ wa ndabʉ ya likungoni ka baYudha, alʉkʉ bemoti a ndɨ na lɨlɨmba. Apʉnga ndɨ kakʉgwaga : 34 « Hu ! Yeso mʉtʉ wa Nazalɛtɨ, wa pɨyɛ kapa katɨgya bʉnɨ ? Wodhuku bi katimosisyo ? Nakaumibho bɨnza ambɛ ɨwɛ nɨ wanɨ. Ɨwɛ nɨ atʉtʉmbwa nɨnɔ Kunzi abhiso ndɨ dhi ka ligubho kakɨ. »
35 Yeso apamyaga ndɨ lɨlɨmba, abɨkya bɛ : « wɛ, dhaka na pupo kʉsɔ ka alʉkʉ yi nɨmʉ ! » Na lɨlɨmba lɔ abhʉmya ndɨ alʉkʉ nɔ wasɨ bɨngɔmʉ kambwa ka bambanzʉ basɨ, opupo ndɨ kʉsɔ kakɨ nɨ kagyogyisigʉ. 36 Lɨkpʉmʉka li nɨlɔ ʉmbanga ndɨ bambanzʉ basɨ na bapʉnga ndɨ kaimuuso lugo kabʉ bɛ : « Lɨkpʉmʉka tino sɛ pɨyɛ lɨ ? Alʉkʉ mʉna akanzɨnɨlya malɨmba na bʉngama, no ngu na anopupiso ! »
37 Sɛ kʉwa wa, mongoni ka Yeso ɨtʉlyana ndɨ pa yasɨ kʉsɔ wa iwili yi nɨyɔ.
Yeso akauukuso bambanzʉ budhingi bakigomiso
38 Yeso opupo ndɨ ka ndabʉ ya likungoni ka baYudha, ingyo ndɨ ka ndabʉ ka Simoni. Tɨtakɨ Simoni nɨnɔ muko yi a ndɨ kayɨmʉkana mʉ mʉgbama kʉgbɛ, babɨkya ndɨ Yeso bɛ aukusi. 39 Kʉwa wa Yeso akpʉda ndɨ na adhidhikyo. Apamɨkana ndɨ, okpumyo kolobu na kolobu yi nɨyɔ osyo ndɨ. Wa aka wa, aʉka ndɨ, apʉnga ndɨ kaugugubhyo.
40 Ngbingo yi nɨnɔ mɔnɨ odhidhiko mino, bodhoku ndɨ na batʉ basɨ nɨbɔ ba ndɨ na bokolobu dhidhidhi kʉ ka Yeso. Ubhisilyogo ndɨ mabɔkʉ yɨkaka-yɨkaka, anuukuso. 41 Malɨmba opupogo ndɨ gɔnɨ kʉsɔ ka batʉ budhingi ba bokolobu. Malɨmba mi nɨmɔ apamɨkanaga ndɨ bɛ : « Ɨwɛ, nɨ Miko Kunzi ! » Luki limoti Yeso ʉnzɨnɨlyaga ndɨ na dɨya, ʉpakya kanzɨna kyɛ ba ndɨ kaibho bɛ ɨyɨ ndɨ nɨ Masiya.
42 Nɨyɔ lɨsyɛ asyɛ, Yeso opupo ndɨ ka gʉdʉ, ɨnda yɨkaka ka pa nɨyɔ mʉmbanzʉ kɛgʉ ndɨ mino. Ambaza bemoti ka bambanzʉ apʉnga ndɨ kakɨsa, nɨyɔ bamɨna, ba kʉwa ndɨ kapa kakpɨngba bɛ kusonitɔgʉ bata. 43 Luki limoti, Yeso ʉbɨkya bɛ : « Nokwononito gɔnɨ kapá Mongoni Manza ma Bʉngama ko Kunzi ka bagʉdʉ bagɔgɔ, kyɛ Kunzi etikoku ndɨ ko bhulyo yi nɨyɔ. » 44 Na isisilogo ndɨ kabɨkyaga Mongoni Manza ka mugi ka baYudha kʉsɔ wa bandabʉ ba ya likungoni kakʉ.