Yeso akabɨkya lɨkpʉmʉka kʉgʉ wa Lɨsyɛ la kimumbiso
6
1 Lɨsyɛ la kimumbiso limoti, Yeso na babɨbya kakɨ ba ndɨ kakɨtaga ko pisi imoti lugo wa botiko ba ya nganʉ. Babɨbya kakɨ banatɨnaga bɛkaza bi, banatubho na mabɔkʉ, banalya. 2 BaFalisayɔ bemoti-bemoti nɨbɔ ba ndɨ wa, bʉbɨkya bɛ : « Ko bhulyo ɨkɨ yɔ makagya ligubho nɨlɔ bapakya kagya ka Lɨsyɛ la kimumbiso ? »3 Yeso umigisyo bɛ : « Makatangʉlagagʉ ndɨ lɨkpʉmʉka nɨlɔ ngama Dhaudhi agya ngbingo yi nɨnɔ ba ndɨ mino na banza ɨbʉ na bawai dhakɨ ? 4 Ingyo ndɨ ka ndabʉ nɨyɔ bagyɨlya ndɨ Kunzi, ava mukati nɨmɔ bapága ndɨ Kunzi. Alya, ʉpá gɔnɨ ndɨ bawai dhakɨ, gʉtʉgʉ bɛyɔ mʉtʉʉ abɨkyaga ndɨ mino bɛ bokumu aka bɔ bakwanana kalya mukati mi nɨmɔ. »
5 Yeso ʉbɨkya bata ndɨ bɛ : « Ɨmɨ Mika mʉmbanzʉ nɔ na mombukwana Lɨsyɛ la kimumbiso. »
Yeso aukusini mʉtʉ bemoti wa kʉbɔkʉkɔ kukwo ka Lɨsyɛ la kimumbiso
6 A bata ndɨ Lɨsyɛ la kimumbiso lagɔgɔ, Yeso ogulyo ka ndabʉ ya likungoni ka baYudha apʉnga ndɨ kapá mʉtɨwɨ. Kʉ bɛyɔ, mʉtʉ bemoti a ndɨ na kʉbɔkʉkɔ kwa kʉmbanzɨkanɨkɔ kukwo. 7 Bowonisili ba mʉtʉʉ na baFalisayɔ ba ndɨ kanda Yeso bɨngbangbangba, ikanɨ aukusotʉ mʉmbanzʉ ka Lɨsyɛ la kimumbiso. Ka lɨngʉnʉ ba ndɨ kakɨsa bɛ bamɨna na ɨbɔ ko pisi tino. 8 Luki limoti, Yeso a ndɨ kaibho tamanaga kabʉ. Abɨkya kʉwa alʉkʉ nɔ a ndɨ kʉbɔkʉkɔ kukwo nɔ bɛ : « Wamaga, wodhoku wa lugo ka bambanzʉ wa. » Amaga ndɨ na isisilo lugo kabʉ. 9 Kumbuso yi Yeso ʉbɨkya bɛ : « Nakamumuuso ambɛ : Mʉtʉʉ kusu abɨkyaga pɨyɛ bʉnɨ ? Kagya lɨkpʉmʉka lanza ka Lɨsyɛ la kimumbiso ikanɨgʉ kagya lɨkpʉmʉka lanyɛ ? Kaukuso ɔbɨlɨ ka mʉmbanzʉ ikanɨ kapʉta ? »
10 Yeso ʉnda ɨbʉ basɨ bizumuuu, kumbuso yi abɨkya kʉwa alʉkʉ nɔ bɛ : « Nonoku kʉbɔkʉkɔ. » Anana ndɨ kʉbɔkʉkɔ na aʉka bɛyɔ aka yɔ ikogo ndɨ mino. 11 Luki limoti, mambɛngɨ ʉkandɨkanaga ndɨ bowonisili ba mʉtʉʉ na baFalisayɔ bɨsʉlʉ-sʉlʉ, bapʉnga ndɨ kaimuuso lugo kabʉ bɛ bakwanana kagya Yeso bʉnɨ.
Yeso akaʉpʉna batʉtʉmbwa tɛkɛbɛ na baba
12 Ka masyɛ mi ndɨ nɨmɔ, Yeso aga ka ngʉpa kalʉmba, asɨlya ndɨ asɨ malʉmba aka. 13 Nɨyɔ lɨsyɛ asyɛ, ʉmaka babɨbya kakɨ, ʉpʉnaga tɛkɛbɛ na baba lugo kabʉ nɨbɔ ʉtwa kʉwa ndɨ bɛ batʉtʉmbwa. 14 A ndɨ nɨ : Simoni ( nɨnɔ Yeso alʉka ndɨ gɔnɨ bɛ Pɛtɛlɛ ), mamakɨ bɛyɔ ka Andɨlɨya, Zaki, Yuani, Filipi, Bhatulumei, 15 Matayɔ, Tʉma, Zaki yi nɨnɔ mika Alʉfayɔ, Simonia nɨnɔ a ndɨ kakɨsa ɨpandasɨ ka mugi kabʉ, 16 Yudha mika Zaki sɛ kʉwa Yudha Isikalioti nɨnɔ agabha ndɨ Yeso.
Yeso akatɨwa ambaza ka bambanzʉ na anuukuso nɨbɔ ba bokolobu
(Matayɔ 4.23-25)
17 Yeso pa imoti na babɨbya kakɨ bosyoku ndɨ ka ngʉpa, bamaga ndɨ ka pa yanza bɨkpa. Wa bɛyɔ, babɨbya kakɨ bagɔgɔ budhingi ba ndɨ wa. Ambaza wakpʉ ka bambanzʉ a ndɨ wa gɔ wa : bambanzʉ nɨbɔ bodhoku ndɨ katʉkya ka gʉdʉ wa Yelusalɛma, ka iwili yasɨ ya Yudhɛya, ka Tilo sɛ kʉwa Sidhona, bagʉdʉ ba mutili mo libo na ka bakpɔlɔ-kpɔlɔ bi. 18 Bodhoku ndɨ kamʉkana na kakɨsa bɛ Yeso uukusi. Gʉtʉgʉ nɨbɔ malɨmba a ndɨ kaugyogyiso, baʉka ndɨ. 19 Bambanzʉ basɨ bakɨsaga ndɨ kavɨla, kyɛ a ndɨ no ngu kʉsɔ kakɨ nɨyɔ uukusogo ndɨ na iyu ɨbʉ basɨ.
Yeso akapá mʉtɨwɨ kʉgʉ wa ɨgyagya no kumbu
(Matayɔ 5.1-12)
20 Kʉwa wa Yeso ʉnda babɨbya kakɨ bizumuuu ʉbɨkya bɛ :
« Ɨgyagya kunu ibunu yi nɨbɔ ma kʉsɔ wa yangya,
kyɛ Bʉngama ko Kunzi a bokunu !
21 Ɨgyagya kunu ibunu yi nɨbɔ ma na nza mbɨya yi nɨmʉ,
kyɛ mikutatʉ ndɛkɛ !
Ɨgyagya kunu ibunu yi nɨbɔ ma kagama mbɨya yi nɨmʉ,
kyɛ matɨbhatʉ ndɛkɛ !
22 Gwoni magyagya ngbingo yi nɨnɔ bambanzʉ biko mino kamʉmʉya, banamʉkya, banamʉtʉmbwa na banamʉbhɨnɨkya makpʉmʉka manyɛnyɛ bitititi, ko bhulyo ko Mika mʉmbanzʉ. 23 Ngbingo yi nɨnɔ nɨlɔ amusilyo ndɛkɛ mino, gwoni magyagya, mobhumbukogo bɨtɨta-tɨta, kyɛ mʉkalya mudhingi akamʉbʉnda kʉgʉ wa lɨsyɛ. Wibhoni ambɛ a mʉdɔngɔnɨ bɛgɛyɔ batɨtabʉ bugyogyisogo ndɨ mino bogyalandʉ ko Kunzi. Kumbuso yi, bogyalandʉ bi nibɔ binisono ndɨ na mʉkalya mudhingi.
24 Luki limoti, kumbu kunu ibunu yi nɨbɔ ma na mukumbo,
kyɛ ɨgyagya kunu kʉwa yu nɨyɔ aka yɔ mo mino yɔ !
25 Kumbu kunu ibunu yi nɨbɔ ma bakikutogo mbɨya yi nɨmʉ,
kyɛ mɨmʉkanatʉ ndɛkɛ nza !
Kumbu kunu ibunu yi nɨbɔ makatɨbha mbɨya wanʉ,
kyɛ malyatʉ ndɛkɛ kumbu na migomisogo !
26 Kumbu ku kunu kiko nɨ bambanzʉ basɨ bakamʉbɨkyɨlya makpʉmʉka manzanza, kyɛ a mʉdɔngɔnɨ bɛgɛyɔ batɨtabʉ bʉgyaga ndɨ mino bogyalandʉ ba kʉbɔbɔkʉ. »
Huponi bomuyoniso kunu
27 Yeso abɨkya bata bɛ : « Luki limoti nakamʉbɨkya ibunu nɨbɔ makɛmʉkana ambɛ : Huponi bomuyoniso kunu, hugyoni bɨnza nɨbɔ bakamʉmʉya. 28 Wolikyoni bʉbʉnga ko Kunzi ka nɨbɔ bakamugbusyo na hukungulyoni nɨbɔ bakamugyogyiso. 29 Kiko nɨ mʉmbanzʉ uipini angwasɨ ka panga, waikosilyo nɨyɔ yagɔgɔ. Kiko nɨ mʉmbanzʉ ukupyini koti kakʉ, wasɨlya gɔnɨ simizi. 30 Mʉmbanzʉ wasɨ kʉkʉnga luki, wapá. Mʉmbanzʉ kʉkʉpya luki, wakakungonitɔgʉ bɛ umigisyi. 31 Hugyoni bɛngɛnɨ mʉdɔngɔnɨ bɛyɔ mapaga mino bɛ bamʉgyɨ ibunu.
32 Kiko nɨ mapananaga lugo kunu aka, minisono na ɨzangɨya tino ? Gʉtʉgʉ batʉ banyɛ bapananaga lugo kabʉ aka gɔnɨ. 33 Minisono na ɨzangɨya tino,kiko nɨ migisyogo bʉnza ka nɨbɔ aka bɔ bamʉgyɨlyaga bʉnza ? Gʉtʉgʉ batʉ banyɛ bagyaga bɛgɛyɔ. 34 Minisono na ɨzangɨya tino, kiko nɨ mokupisogo ibunu luki ka batʉ bi nɨbɔ aka bɔ bakwanana kamumigisyo ? Gʉtʉgʉ batʉ banyɛ bokupisonogo lugo kabʉ aka ibha bigisyoni luki li nɨlɔ aka lɔ ! 35 Luki limoti ibunu huponi bomuyoniso kunu, hugyoni bɨnza. Kupisoni nɨ makɛgʉ bata na mʉtamanagɨ bɛ bamumigisyatʉ. Kʉwa wa, minisono ndɛkɛ na mʉkalya mudhingi na miko ndɛkɛ bomiko Kunzi nɨnɔ Kʉgʉ-Kʉgbɛ, kyɛ bʉnza kakɨ a ka batʉ basɨ, nɨbɔ bakamigisyogɨgʉ ɨbhɨbha na gɔnɨ ka batʉ banyɛ. 36 Wikoni na mambɛngɨ mo kumbu mʉdɔngɔnɨ bɛyɔ Obhonu o mino na lɨmbɛngɨ lo kumbu. »
Makokonitɔgʉ mʉkɔmbʉ ka batʉ bagɔgɔ
37 Kʉwa wa Yeso omotilokʉ bɛ : « Makokonitɔgʉ mʉkɔmbʉ ka batʉ bagɔgɔ, Kunzi kamʉkʉlyɨgʉ ndɛkɛ mʉkɔmbʉ kunu bɛgɛyɔ; makubhisonitɔgʉ bɛngɛnɨ ka mʉkɔmbʉ, Kunzi kamubhisigʉ ndɛkɛ ka mʉkɔmbʉ bɛgɛyɔ; hupilyoni bɛngɛnɨ bʉnyɛ kabʉ, Kunzi amʉpɨlya ndɛkɛ bɛgɛyɔ. 38 Hupoponi bɛngɛnɨ, Kunzi amʉpapa ndɛkɛ bɛgɛyɔ. Amudukulyogo ndɛkɛ ka mbɨya kunu ɨsangɨ ya mʉpʉnga nɨyɔ yanza, mʉpɨpa, mʉkpɨndɨla bɨnza bɨnvɨ, mutumo na mʉkala onogwanana bɨgbɨya-gbɨya. A lɨngʉnʉ bɛ Kunzi amʉkalya ndɛkɛ ibunu mʉdɔngɔnɨ bɛgɛyɔ mʉkalyaga mino batʉ bagɔgɔ. »
39 Kʉwa wa Yeso ʉtʉlya bata lizuni lagɔgɔ bɛ : « Mʉtʉ wa kolobu ya mamɔmɔ akwananatʉ kakpokyoniso dhakɨ ? Gʉtʉgʉ iki yi aka ! Kagya bɛyɔ, bodukono ɨbʉ basɨ baba kʉsɔ wa lɨbyɛ. 40 Mʉbɨbya gʉtʉgʉ bemoti aka kakwananɨgʉ kakɨtaga muwonisili kakɨ; luki limoti mʉbɨbya wasɨ nɨnɔ bawonisilogo bɨnza, iko ndɛkɛ mʉdɔngɔnɨ abhɛ muwonisili kakɨ.
41 Ko bhulyo ɨkɨ yɔ wo mino kamɨna asɨ okuku aka nɨnɔ a ko liso ka mamakʉ, nɨ wakɛgʉ sɛ kaɨna ingbi nɨyɔ a kʉsɔ wo liso kakʉ ? 42 Wakwanana mbɛyɨ kabɨkya mamakʉ lɨkɨ bɛ : ‹ Yɛ ya, gya mbɛyɨ nʉnyʉ okuku ko liso ›, ɨwɛ nɨnɔ wakɛgʉ gʉtʉgʉ kaɨna ingbi nɨyɔ a kʉsɔ wo liso kakʉ ? Ɨwɛ mʉtʉ wa kʉbɔbɔkʉ mʉna, wɨnyɔ mbɛyɨ ingbi nɨyɔ a kʉsɔ wo liso kakʉ, kʉwa wa wakwanana kaɨna bɨngbanganya wa wanyɔ mino okuku ko liso ka mamakʉ. »
Bibhogo sɨbhʉkʉsɔ ko bhumo yi
43 A lɨngʉnʉ bɛ : « sɨbhʉkʉsɔ sanza kabʉkʉtagɨgʉ bhumo yanyɛ, na gɔnɨ sɨbhʉkʉsɔ sanyɛ kabʉkʉtagɨgʉ bhumo yanza. 44 Bhʉkʉtɔ tasɨ imibhisikonogo asɨ ko bhumo yi aka : bakapwagɨgʉ manga kʉgʉ wa sɨbhʉkʉsɔ so mowo, na bakapwagɨgʉ mbʉnyɛ kʉgʉ wa muligi mo mowo. 45 Mʉtʉ wanza agyaga makpʉmʉka manzanza nɨmɔ opupogo ka lɨmbɛngɨ kakɨ lanza. Mʉtʉ wanyɛ agyaga makpʉmʉka manyɛnyɛ nɨmɔ opupogo ka lɨmbɛngɨ kakɨ lanyɛ. Kyɛ mʉnɔkʉ ka mʉmbanzʉ yɨkaka-yɨkaka opupisogo makpʉmʉka nɨmɔ ikogo mutumo kʉsɔ wa lɨmbɛngɨ kakɨ. »
Bhɨbhʉ ka bopipiko baba
(Matayɔ 7.24-27)
46 « Ko bhulyo ɨkɨ yɔ mɛmakakaga mino bɛ : ‹ Mombukwono dhosu, Mombukwono dhosu › nɨ makɛgʉ kagya nɨlɔ nakamʉbɨkya ? 47-48 Mʉtʉ wasɨ nɨnɔ ɛbɨbyaga, anʉkana lɨkpʉmʉka kamɨ na anagya, a mʉdɔngɔnɨ abhɛ alʉkʉ bemoti nɨnɔ a ndɨ kopiko ndabʉ. Akpɔ ndɨ lɨbyɛ lodhu, obhiso mubumbe kʉgʉ wa lɨtalʉ. Ngbingo yi nɨnɔ tumo odhoku ndɨ mino, libo obuno ka bakpɔlɔ-kpɔlɔ ba ndabʉ yi nɨyɔ, luki limoti nɨ kodukonigʉ, kyɛ ndabʉ ipiko ndɨ yanza. 49 Luki limoti, mʉmbanzʉ wasɨ nɨnɔ ʉkanaga lɨkpʉmʉka kamɨ nɨ kɛgʉ kagya mʉdɔngɔnɨ bɛyɔ no mino kabɨkya, a abhɛ alʉkʉ bemoti nɨnɔ opiko ndɨ ndabʉ kʉgʉ wa lɨtɔmbʉ aka nɨ kokpugʉ mubumbe. Ngbingo yi nɨnɔ libo okikoku mino ka kpɔlɔ-kpɔlɔ wa ndabʉ yi nɨyɔ, odukono ndɨ bɨgala-gala, apʉtɨkana yasɨ. »