Yeso akogulyo ka Yelusalɛma
21
1 Ngbingo yi nɨnɔ Yeso na babɨbya kakɨ ba kʉwa ndɨ mino buwobhi kadhwɛ ka Yelusalɛma, bosilo ndɨ ka mugi ma Bhetefagi. Mugi mi nɨmɔ a ndɨ miso ya Ngʉpa ya Mizeituni. Kʉwa wa, Yeso ʉtɨka ndɨ kambwa babɨbya baba lugo ka babɨbya kakɨ, 2 ʉbɨkya ndɨ bɛ : « Windoni ka mugi nɨmɔ a kambwa kunu kʉ. Makosilo aka, matakanya punda bemoti no mikakɨ bʉkandɨlaga. Ukulogoni, medhulyoku na ɨbʉ kʉnʉ. 3 Na kiko nɨ mʉmbanzʉ amumuusini lɨkpʉmʉka ko bhulyo bapunda bi nɨbɔ, masikisyo bɛ : « Mombukwono dhosu a na mʉsasa kabʉ. Wa aka wa, mʉtʉ yi nɨnɔ amʉsɨlyatʉ. » 4 Nɨlɔ igyonoso ndɨ bɛyɔ, kyɛ ɨtʉlyanɨ mʉnzɨna nɨmɔ ɨbɨkya ndɨ pisi ka mugyalandʉ bɛ :
5 « Ubikyoni batʉ ba mugi ma Siona bɛ :
‹ Winoni, ngama kunu akamudhulyoku,
mutumo na yisiso, kʉgʉ wa omoyi wa punda,
na kʉgʉ wa mʉwanza wa mikya punda, mika omoyi wa punda. › » a
6 Babɨbya baba bi nɨbɔ baga ndɨ na bagya bɛyɔ aka yɔ Yeso ʉkpamya ndɨ mino. 7 Bodhoku ndɨ na omoyi wa punda nɨnɔ no mikakɨ. Bumolosogo ndɨ na botu, Yeso iko ndɨ kʉgʉ yi. 8 Bambanzʉ budhingi kʉsɔ wa ambaza ba ndɨ koolosogo botu kabʉ ko pisi. Na bagɔgɔ ba ndɨ kakɔgɔ mangʉ ma masɨsɨ, banolosogo bɛgɛyɔ. 9 Bambanzʉ nɨbɔ ba ndɨ kakpakyana kambwa na kumbuso ka Yeso ba ndɨ kapamɨkanaga, banabɨkya bɛ :
« Ɨbhɨbha ko Mika ngama Dhaudhi !
Kunzi adukulyi nɨnɔ akodhoku ko lino ka Mombukwono dhosu bʉbʉnga ! b
Ɨbhɨbha ko Kunzi kʉgʉ kʉgbɛ ! »
10 Nɨyɔ Yeso ingyo kʉwa ndɨ mino ka Yelusalɛma, gʉdʉ wasɨ ogulyo ndɨ kʉsɔ wa bukpwuku-kpwuku budhingi. Bambanzʉ bapʉnga ndɨ kaimuuso bɛ : « Wanɨ pɨyɛ mʉ ? »
11 Bambanzʉ nɨbɔ ba ndɨ kʉsɔ wa bambaza bosikisyo ndɨ bɛ : « Yeso nɔ. A mugyalandʉ ka gʉdʉ wa Nazalɛtɨ, ka mugi ma Galilaya. »
Yeso ukpumyini bambula kʉsɔ wa ndabʉ ko Kunzi
12 Yeso ogulyo ndɨ kʉsɔ wa ndabʉ ko Kunzi. Kʉ bɛyɔ, ukpumyo ndɨ batʉ basɨ nɨbɔ ba ndɨ kaɨgagabya, na nɨbɔ ba ndɨ koluwo. Ugbukumisogo ndɨ bamɨza ka bogomosyono buyi. Umisyo bokiti ka nɨbɔ ba ndɨ kaʉgabha bonzuwo. 13 bɨkya ndɨ bɛ : « Ikpikogo bɛ : ‹ Balɨkyaga ndɛkɛ ndabʉ kamɨ bɛ Ndabʉ ya Likungoni. › c Luki limoti, ibunu moitisini kʉwa ‹ Pa ka batʉ bo kubakʉ ! d »
14 Kʉ kʉsɔ wa ndabʉ ko Kunzi, batʉ bo kolobu ba ya mamɔmɔ na batʉ ba mʉdhɨlɨ basilyoku ndɨ Yeso. Ɨyɨ, uukuso ndɨ. 15 Ngbingo yi nɨnɔ Yeso agya ndɨ mino bɛyɔ, bokumu-kumu, na bowonisili ba mʉtʉʉ bɨna ndɨ lɨkpʉmʉka lɨmbanga li nɨlɔ. Bʉkana ndɨ gɔnɨ bɛyɔ bomiki ba ndɨ mino kabɨkya na lɨyʉ lapʉ bɛ : « Ɨbhɨbha ko Mika ngama Dhaudhi ! »
Lɨkpʉmʉka li nɨlɔ utuliso ndɨ bangama bi nɨbɔ mambɛngɨ kʉgbɛ. 16 Kʉwa wa, bamuuso ndɨ Yeso bɛ : « Watʉ kaʉkana lɨkpʉmʉka li nɨlɔ bomiki nɨbana bakabɨkya ? »
Yeso usikisyo ndɨ bɛ : « Iyo. Ambɛ makanotongulogigʉ mbɛɨ ndɨ bɛyɔ ikpikogo mino ka Mobiso Motu bɛ :
‹ Pisi ka nɔkʉ ka bomiki bakɛkɛkɛ na ka nɨbɔ bawɛsɛ,
bɨmbɨlaga ɨbhɨbha kakʉ. › e »
17 Kumbuso yi, Yeso ʉsa ndɨ. Opupo ka gʉdʉ wa Yelusalɛma, ɨnda ndɨ kaanga ka mugi ma Bhetania.
Yeso ogbongini sɨbhɨkʉsɔ nɨsɔ kapágɨgʉ ndɨ bhumo
(Malɨkɔ 11:12-14, 20-24)
18 Na bʉsɔbɨ ba bʉgala bi, ko ngbingo nɨnɔ Yeso a ndɨ mino kaigoku ka Yelusalɛma, ɨmʉkana ndɨ nza. 19 Ka kpɔlɔ wo pisi, ɨna ndɨ sɨbhɨkʉsɔ simoti, akpʉda ndɨ. Luki limoti, atakanya ndɨ asɨ mapakʉ aka nɨ kɛgʉ no bhumo kʉgʉ yi. Kʉwa wa, agbanga ndɨ sɨbhʉkʉsɔ si nɨsɔ bɛ : « Katʉkya na lɨsyɛ li nɨlɨ, wakabʉkʉtɨgʉ ndɛkɛ bata bhumo kadhwɛ ka mulibo ! » Wa aka wa, sɨbhɨkʉsɔ si nɨsɔ ʉmɨlaga ndɨ sasɨ bikokolo-kokolo.
Nɨyɔ babɨbya ka Yeso bɨna ndɨ mino bɛyɔ, bombomboyo ndɨ kʉgbɛ. Bamuuso kʉwa ndɨ bɛ : « Igyonosi pɨyɛ bʉnɨ sɨbhʉkʉsɔ si nɨsɨ kaʉmɨlaga ko ngbingo bemoti aka bɛnɛ ? »
21 Yeso usikisyo ndɨ bɛ : « Nakamʉbɨkya lɨngʉnʉ ambɛ, kiko nɨ ma na bhaya na nɨ makɛgʉ na botumo, ibunu makwanana bi kagya aka mʉdɔngɔnɨ bɛyɔ nogyi mino ka sɨbhɨkʉsɔ si nɨsɨ. Luki limoti, gʉtʉgʉ ngʉpa yi nɨyɨ, mabɨkyatʉ bɨ bɛ : ‹ Tʉkya wanʉ, widikitoku ko libo lidhingi. › Ko ngbingo bemoti aka igyonoso bi bɛyɔ. 22 Kiko nɨ ma na bhaya, yasɨ nɨyɔ makʉnga, Kunzi amʉpátʉ. »
Wanɨ nɔ apá Yeso ngu ?
23 Yeso ingyo ndɨ bata kʉsɔ wa ndabʉ ko Kunzi. Ngbingo yi nɨnɔ a ndɨ mino kabɨkyaga Mongoni Manza, bokumu-kumu na bambɔkʉ ka Bayudha bodhoku ndɨ kamuuso bɛ : « Masɨ nɨmana wakagya ma, wakagya no ngu tino ? Wanɨ nɔ ʉpá ndɨ ngu yi nɨyɔ ? »
24 Yeso usikisyo ndɨ bɛ : « Na ɨmɨ, nakamumuuso mbɨya wanʉ lɨkpʉmʉka limoti. Kiko nɨ mesikisyini, namʉtʉmbʉlyaga ngu nɨyɔ na noyu kagya. 25 « Yɛkɨ a bɛyɔ ! Ubatiso ka Yuani apʉnya yanɨ ? Ambɛ kʉgʉ wa lɨsyɛ ikanɨ ka bambanzʉ ? »
Kʉwa wa, bapʉnga ndɨ kaɨnzɨnzɨnya lugo kabʉ bɛ : « Kiko nɨ tosikisyini bɛ apʉnya kʉgʉ wa lɨsyɛ, atimuusotʉ bɛ : ‹ Yɛkɨ a bɛyɔ ! Ko bhulyo tino makabhaɨlyagʉ ndɨ Yuani ? › 26 Na kiko nɨ tosikisyini bɛ ka bambanzʉ, tabangatʉ bi ambaza ka bambanzʉ bi nɨba. Ka lɨngʉnʉ, ɨbʉ basɨ bamibhogo Yuani bɛ a ndɨ mugyalandʉ. »
27 Kʉwa wa, basikisyo ndɨ Yeso bɛ : « Takibhigʉ. » Ɨyɨ aka gɔnɨ na ɨbʉ bɛ : « Gʉtʉgʉ ɨmɨ, nakamʉtʉmbʉlyɨgʉ gɔnɨ ngu yi nɨyɔ nagyaga noyu makpʉmʉka mi nɨmɔ. »
Lizuni ka bomiki balʉkʉ bi baba
28 Yeso abɨkya ndɨ bata bɛ : « Ibunu makatamanaga bʉnɨ kʉgʉ wa lizuni li nɨlɨ ? A ndɨ na alʉkʉ bemoti nɨnɔ a ndɨ na bomiki baba. Alʉkʉ yi nɨnɔ abɨkya ndɨ mikakɨ wa mambwa bɛ : ‹ Mikamɨ ! Na lɨsyɛ li nɨlɨ waga kagya ligubho ko tiko ya muzabhibhu. › 29 Ɨyɨ aka bɛ : ‹ Nakopagʉ ! › Luki limoti, kumbuso yi oikoso ndɨ mʉtamanagɨ kakɨ, ɨnda ndɨ kagya ligubho.
30 « Alʉkʉ nɔ abɨkya ndɨ mikakɨ wagɔgɔ mʉdɔngɔnɨ bɛyɔ abɨkya ndɨ mino nɨnɔ wa mambwa. Ɨyɨ, asikisyo ndɨ bɛ : ‹ Iyo bha, nagatʉ ! › Luki limoti nɨ kogagʉ.
31 « Yɛkɨ a bɛyɔ ! Lugo ka bomiki baba bi nɨbɔ, wanɨ nɔ agya ndɨ mʉdɔngɔnɨ bɛyɔ abhabʉ a ndɨ mino kapa ? » Basikisyo ndɨ bɛ : « Nɨnɔ wa mambwa. »
Yeso ʉbɨkya ndɨ bɛ : « Nakamʉbɨkya lɨngʉnʉ ambɛ bandɔmbɛ ba manzanza na batʉ ba bɨlya bɔ bogulyo ndɛkɛ kambwa kunu kʉsɔ wa Bʉngama ko Kunzi. 32 Ka lɨngʉnʉ, Yuani odhoku ndɨ ku kunu kamʉwanya pisi ya bungbingbili, ibunu makabhaɨlyagʉ ndɨ. Luki limoti, bandɔmbɛ na batʉ ba bɨlya, ɨbʉ babhaɨlyatʉ ndɨ. Gʉtʉgʉ ko ngbingo yi nɨnɔ mɨna ndɨ mino makpʉmʉka mi nɨmɔ, makopupogʉ ndɨ ka bʉnyɛ kunu bɛ mabhaɨlyɨ. »
Lizuni ka bagya-ligubho bʉdɨya
33 Yeso ʉbɨkya ndɨ bata bɛ : « Ukononi lizuni lagɔgɔ. A ndɨ na mʉtʉ bemoti nɨnɔ akʉna ndɨ tiko ya muzabhibhu. Okungulo ndɨ tiko yi nɨyɔ bikululu. Kʉ bɛyɔ, akpɔ ndɨ lɨbyɛ lɨbʉnya bhumo ya muzabhibhu na opiko ndɨ na mʉnala manda ko bhulyo ka bobubulyo. Kumbuso yi, ʉkanana ndɨ na badhɨma-botiko, ʉsɨlya tiko yi nɨyɔ, aga ndɨ ɨyɨ.
34 Nɨyɔ ngbingo mubhuulyo ɨtʉlyana ndɨ, ʉtɨka bagya-ligubho kakɨ kʉ ka badhɨma-botiko bi nɨbɔ bɛ bɨndɨ kapá masɔlɔ mi ma kakɨ.
35 « Luki limoti, badhɨma-botiko bi nɨbɔ bugwi ndɨ bagya-ligubho kakɨ. Balya ndɨ bemoti bɨsʉsʉ. Bamwɔ wagɔgɔ na wagɔgɔ bata, baipogo ndɨ na matamʉ bikokoko kadhwɛ kʉ kwa kʉ badhikiso ndɨ mino.
36 Kʉwa wa, ʉtɨka ndɨ bata bagya-ligubho bagɔgɔ. Bagya-ligubho bi nɨbɔ ba ndɨ budhingi kaʉkɨtaga nɨbɔ a ndɨ nɨ utikini kambwa. Luki limoti, badhɨma-botiko bʉgyagya ndɨ bagya-ligubho bi nɨbɔ mʉdɔngɔnɨ bɛyɔ bʉgya ndɨ mino nɨbɔ ba mambwa.
37 « Ka mulibo, ʉtɨkɨlya ndɨ mikakɨ bɨkpɛ. Abɨkya ndɨ bɛ : ‹ Nɨmʉ a mikamɨ, bakwananatʉ kabanga. › 38 Luki limoti, ngbingo yi nɨnɔ badhɨma- botiko bi nɨbɔ bamɨna ndɨ mino miki yi nɨnɔ, banzɨna ndɨ lugo kabʉ bɛ : Ɨyɨ nɔ alya ndɛkɛ lisimo ka abhakɨ. Gyoni, tamwini, kyɛ ibusu kʉwa bɔ totigoli nolu. › 39 Kʉwa wa, bagwi ndɨ, bambimbo kunzi wo tiko. Kʉ bɛyɔ, bamwɔ ndɨ. »
40 Kumbuso yi, Yeso umuuso ndɨ bɛ : « Ngbingo yi nɨnɔ mombukwono tiko igoku ndɛkɛ mino, ʉgya ndɛkɛ badhɨma-botiko bi nɨbɔ bʉnɨ ? » 41 Ɨbʉ basikisyo ndɨ bɛ : « Ɨyɨ mombukwono tiko umwisisogo ndɛkɛ badhɨma-botiko bi nɨbɔ nɨ kɛgʉ no nzonzi. Na tiko yi nɨyɔ kakɨ yɔ ʉpá badhɨma-botiko bagɔgɔ. Badhɨma-botiko bi nɨbɔ biko banʉ banapága masɔlɔ kakɨ ko ngbingo nɨnɔ okwononi. »
42 Kʉwa wa, Yeso ʉbɨkya ndɨ bata bɛ : « Ambɛ, makanotongulogigʉ mbɛɨ ndɨ kʉsɔ wa Mobiso Motu kʉ ikpikogo mino bɛ :
‹ Lɨtalʉ nɨlɔ bopipiko bakya ndɨ,
ilu lɔ ɨɨta kʉwa la angba.
Mombukwono dhosu nɔ agya ndɨ bɛyɔ.
Na kukusu, a lɨkpʉmʉka lɨmbanga. › f
43 « Yɛkɨ a bɛyɔ, nakamʉbɨkya bata ambɛ : bamʉkʉpyatʉ ibunu bʉngama ko Kunzi. Na bʉngama bi nɨbɔ bʉpá batʉ nɨbɔ biko kabʉkʉta bhumo yi. [ 44 Mʉtʉ wasɨ nɨnɔ ogwo ndɛkɛ kʉgʉ wa lɨtalʉ li nɨlɔ, obunikogo bingbengbengbe. Na lɨtalʉ li nɨlɔ kagwilyo mʉmbanzʉ, akpʉta bɨsɛkɛ-sɛkɛ.] »
45 Ngbingo yi nɨnɔ Yeso ʉmalya ndɨ mino bambanzʉ mozuni mi nɨmɔ, Bafalisayɔ na bokumu-kumu bʉkana ndɨ. Wa aka wa, ɨbʉ bibho ndɨ bɛ a ndɨ kabɨkya ko bhulyo kabʉ. 46 Lɨkpʉmʉka li nɨlɔ ʉkpamya ndɨ bɛ bakɨsɨ pisi kagwi. Luki limoti, babanga ndɨ bambaza ka bambanzʉ. Bambaza bi nɨbɔ bibhotʉ ndɨ bɛ Yeso a mugyalandʉ aka.