Lutono kʉgʉ wa yɨgya ka batɨtɛ
(Malɨkɔ 7:1-13)
15
1 Lɨsyɛ limoti, Bafalisayɔ na bowonisili ba mʉtʉʉ botukyoku ndɨ ka Yelusalɛma. Ngbingo yi nɨnɔ basilyo ndɨ mino Yeso, bamuuso bɛ : 2 « Batɨtosu batɨsɨlya ndɨ yɨgya bɛ tɨsʉkʉsagɨ mabɔkʉ kambwa kalyalya. Ko bhulyo ɨkɨ yɔ babɨbya kakʉ bakɨsʉkʉsagɨgʉ ɨbʉ ? » 3 Yeso usikisyo ndɨ bɛ : « Yɛgʉ sɛ ibunu, ko bhulyo ɨkɨ yɔ mo mino kobuno mʉtʉʉ ko Kunzi ko bhulyo yɨbyɛ yɨgya ka batɨtonu ? 4 Ka lɨngʉnʉ, Kunzi abɨkya ndɨ bɛ : ‹ Mʉbanga abhakʉ na amakʉ. › Amatɨla ndɨ gɔnɨ bɛ : ‹ Kiko nɨ mʉmbanzʉ agbusyisi abhakɨ ikanɨ amakɨ, okwononi bamwɨ. › 5 Luki limoti, ibunu mabɨkyaga bɛ mʉmbanzʉ akwanana kabɨkya abhakɨ ikanɨ amakɨ bɛ : ‹ Makpʉmʉka nɨmɔ nakwanana bi na imu kabhɨnɨka buti kakʉ, nopí kʉwa ka apɛpɛ ko Kunzi. › 6 Mʉtʉ yi nɨnɔ kakwananɨgʉ bata kabanga abhakɨ ikanɨ amakɨ. Na ibunu makolimogo Lɨkpʉmʉka ko Kunzi ko bhulyo yɨbyɛ yɨgya ka batɨtonu.
7 Batʉ ba kʉbɔbɔkʉ ! Bugyalandʉ ka Isaya a ndɨ ba lɨngʉnʉ kʉgʉ kunu, ngbingo yi nɨnɔ abɨkya ndɨ mino bɛ :
8 ‹ Bambanzʉ bi nɨbana bɛbangaga ka mʉnzɨna aka,
luki limoti mambɛngɨ kabʉ a byɨ na ɨmɨ.
9 Malʉmba nɨmɔ bɛgyɨlyaga a payaya.
Ka lɨngʉnʉ, mʉtʉʉ kabʉ akabyɛnɛnɛ na bopisi nɨbayɔ bibhisilyogo aka. › »
Luki nɨlɔ akwanana kapá mʉmbanzʉ bʉnyɛ
(Malɨkɔ 7:14-23)
10 Kumbuso yi, Yeso amaka ndɨ ambaza ka bambanzʉ, abɨkya bɛ : « Ukononi na mʉkana bɨnza lɨkpʉmʉka nɨlɔ nakamʉbɨkya. 11 Luki nɨlɔ ingyogo ka mʉnɔkʉ ka mʉmbanzʉ kapágɨgʉ bʉnyɛ. Luki limoti, nɨlɔ opupogo lɔ apága bʉnyɛ. »
12 Kʉwa wa, babɨbya ka Yeso bakpudoku ndɨ, bamuuso bɛ : « Wibhito bi bɛ mʉnzɨna kakʉ utulito bi Bafalisayɔ ? »
13 Yeso usikisyo ndɨ bɛ : « Luki lasɨ nɨlɔ abakaga nɨ Bhabha nɨnɔ kʉgʉ wa lɨsyɛ kokunigʉ, bomukotʉ banʉ. 14 Yɛkɨ a bɛyɔ, usoni ! Ba batʉ bo kolobu ya mamɔmɔ nɨbɔ bakaukpokyoniso badhabʉ ! Kiko nɨ mʉtʉ wo kolobu ya mamɔmɔ akakpokyoniso dhakɨ, ɨbʉ basɨ baba bogwotʉ ka lɨbyɛ. »
15 Pɛtɛlɛ abɨkya ndɨ bɛ : « Tɨtʉmbʉlyaga isi ya lizuni li nɨlɨ. »
16 Yeso usikisyo ndɨ bɛ : « Ambɛ na gʉtʉgʉ ibunu aka, makakwananɨgʉ kayibho isi yi ? 17 Ambɛ, makibhogigʉ mbɛɨ bɛ luki lasɨ nɨlɔ ingyogo ka mʉnɔkʉ, osyogo ka mʉma, kumbuso yi, opupo na ɨnda ka lɨmbɨ ? 18 Luki limoti, lasɨ nɨlɔ opupogo ka mʉnɔkʉ ka mʉmbanzʉ, atʉkyaga ka lɨmbɛngɨ kakɨ. Na ilu lɔ apága mʉmbanzʉ bʉnyɛ. 19 Ka lɨngʉnʉ, tamanaga yanyɛ opupogo kʉsɔ wa lɨmbɛngɨ ka mʉmbanzʉ, lɨmwɔmwɔ, bɨlya, mʉsasa ka balʉkʉ na boko kakpakyana gbalɨ, kʉbakʉ, mʉtamanagɨ mʉbɨkya bɔngɔ na banvɛnvɛ. 20 Nɨmana masɨ mɔ apága mʉmbanzʉ bʉnyɛ. Luki limoti, kalyalya nɨ wakisukusigʉ mabɔkʉ kakwananɨgʉ kapá mʉmbanzʉ bʉnyɛ. »
Wabakanana abinikyonini Yeso
(Malɨkɔ 7:24-30)
21 Kumbuso yi, Yeso atʉkya ndɨ wa, ɨnda ndɨ miso ya iwili ya Tilo na nɨyɔ ya Sidhona. 22 Kʉ bɛyɔ, Wabakanana bemoti asilyo ndɨ. Muko yi nɨnɔ akʉkwaga ndɨ, abɨkya bɛ : « Hiii Mombukwono dhosu, Mika ngama Dhaudhi, ɨpɨlyanɔ baka ! Mikamɨ mʉsɨka yi akaigyogyiso kʉgbɛ na lɨlɨmba ! »
23 Luki limoti, Yeso kasikisyogʉ ndɨ lɨkpʉmʉka gʉtʉgʉ limoti aka. Kʉwa wa, babɨbya kakɨ bakpudoku ndɨ, bɨtatanaga na ɨyɨ bɛ : « Mʉkpamya nɛkɨ muko yi nɨmʉ aga, kyɛ akatigbomiso bamʉ aka na mʉpamʉ. » 24 Usikisyo ndɨ bɛ : « Betikoku ndɨ ka Baɨzalɛlɨ aka, nɨbɔ ba mʉdɔngɔnɨ abhɛ bakɔndɔlɔ nɨbɔ bobungogo ndɨ. »
25 Luki limoti, muko yi nɨnɔ odhoku ndɨ kobuno moli kambwa kakɨ, ɨtatanaga ndɨ na ɨyɨ bɛ: « Hiii Mombukwono dhosu, kikiliki, isingyonɔ baka ! » 26 Yeso asikisyo ndɨ bɛ : « Kɛgʉ bɨnza kava malɨlɨ ka bomiki na kaumbimbilyo bɛnva. »
27 Muko yi nɨnɔ abɨkya ndɨ bɛ : « A lɨngʉnʉ, Mombukwono dhosu. Luki limoti, gʉtʉgʉ bɛnva aka balyagatʉ gɔnɨ malɨlɨ nɨmɔ anyʉkaga ka mɨza ka mombukwono dhabʉ. »
28 Kʉwa wa, Yeso asikisyo ndɨ bɛ : « Yɛ ma, bhaya kakʉ a yidhingi ! Igyonosi ku kakʉ mʉdɔngɔnɨ bɛyɔ bhaya kakʉ o mino. » Na ko ngbingo yi nɨnɔ aka nɔ, mɨkakɨ mʉsɨka yi aʉka ndɨ.
Yeso uukusini batʉ budhingi ba bokolobu
29 Kʉmbuso yi, Yeso atʉkya ndɨ kʉ, ɨnda ka mutili ma ibhombu ya Galilaya. Kʉ bɛyɔ, adaka ndɨ ka ngʉpa, iko. 30 Kʉwa wa, bambaza ka bambanzʉ budhingi bakpudoku ndɨ. Badhulyogoku ndɨ na batʉ ba mʉtɨngbɨ, nɨbɔ ba bokolobu ba ya mamɔmɔ, bazɛgɛsɨ, babobo na batʉ bagɔgɔ ba bokolobu budhingi. Ɨbʉ basɨ, bubhisogo ndɨ kambwa ka Yeso na ɨyɨ anuukuso.
31 Na nɔkʉ ʉdhɨka ndɨ bambanzʉ nɨbɔ ba ndɨ kʉsɔ wa bambaza wa bɨdhɛ kaʉmɨna babobo kanzɨna, batʉ ba mʉtɨngbɨ kananɨkana, bazɛgɛsɨ kakpakyana na batʉ ba bokolobu ba ya mamɔmɔ kaɨna. Bapʉnga kʉwa ndɨ kabhibhiso Kunzi wa Ɨzɛlɛlɨ.
Yeso ulyolyisini bambanzʉ baɛlɔfʉ bakwanganya
(Malɨkɔ 8:1-10)
32 Yeso ʉmaka kʉwa ndɨ babɨbya kakɨ, ʉbɨkya bɛ : « Batʉ bi nɨbana, nakaʉmɨnɨlya kumbu. Katʉkya masyɛ masaa ba pa imoti na ɨmɨ na bakɛgʉ bata no luki lɨlya. Ɨmɨ, nakɛgʉ kapa kaʉsa bɛ baga nɨ banɨmʉkana nza. Bakaga bɛyɔ, yagɔgɔ ko pisi nza akwananatʉ kaʉkɨtaga. »
33 Babɨbya kakɨ bamuuso ndɨ bɛ : « Wanʉ ka ɨsa, tinisonoku na malɨlɨ yanɨ nɨmɔ akwanana bɛ ambaza mudhingi ka bambanzʉ bɛnɛ ikuti ? » 34 Yeso umuuso ndɨ bɛ : « Ma na mukati mɨnga ? » Basikisyo ndɨ bɛ : « Ta na mukati madɨya na ɨka na bosi bakɛdɛ aka. »
35 Kʉwa wa, Yeso ʉkpamya ndɨ bambanzʉ bɛ bikonononi wasɨ. 36 Ava ndɨ mukati madɨya na ɨka na bosi bi nɨbɔ. Kumbuso kabhibhiso Kunzi, obunonogo na ʉpága babɨbya kakɨ. Ɨbʉ, bʉgbananɨlyaga ndɨ bambanzʉ.
37 Ɨbʉ basɨ balyalya ndɨ na bikutogo bɨkpɛkɛdɛ-kpɛkɛdɛ. Kumbuso yi, babɨbya bamʉmʉlaga ndɨ bodhongbu nɨbayɔ asɨkana ndɨ na otumo ndɨ mbɨyɔ madɨya na ɨka. 38 Batʉ nɨbɔ balyalya ndɨ ba ndɨ bhanda balʉkʉ baɛlɔfʉ bakwanganya nɨ bakutongigʉ boko na bomiki.
39 Kumbuso Yeso kaʉpá bambanzʉ bi nɨbɔ lɨgʉndʉ, adaka kʉsɔ wa ɨngbɔlɔ yidhingi, aga ndɨ ka iwili ya Magadhani.