Dhumo wa ndʉwa ka mugi ma Kana
2
1 Kumbuso wa masyɛ maba, dhumo wa ndʉwa a ndɨ ka Kana, kʉ ka Galilaya. Amakɨ Yeso a ndɨ kʉ gɔ kʉ. 2 Bamaka ndɨ gɔnɨ Yeso na babɨbya kakɨ ko dhumo yi nɨnɔ. 3 Nɨyɔ vinya osyo, amakɨ Yeso abɨkya ndɨ Yeso bɛ : « Bambanzʉ bakɛgʉ bata na vinya. »4 Luki limoti, Yeso asikisyo ndɨ bɛ : « Ye ma, nɨlɔ kusu na ɨwɛ ogwi bʉ ? Ngbingo kamɨ kanitulyonigʉ mbɛyɨ. »
5 Amakɨ ʉbɨkya kʉwa ndɨ bagya-ligubho bɛ : « Gyoni masɨ nɨmɔ amʉbɨkya. »
6 Wa bɛyɔ, a ndɨ na bambɨkɛ ba yakpʉkpʉ madɨya nɨbɔ bagya ndɨ na matamʉ. Kʉsɔ yi, Bayudha bobhisogo ndɨ mino mobo nɨmɔ bibubisogo ndɨ nomu kabyɛnɛnɛ na yɨgya kabʉ. Mbɨkɛ yimoti akwanana ndɨ kaingyo balitɛlɛ ba yo libo bhanda mɨya yimoti+\fr 2.6 \fk Balitɛlɛ ba yo libo bhanda mɨya yimoti: \ft A mʉdɔngonɨ abhɛ babhidho bakpʉkpʉ kubukumuti.. 7 Yeso ʉbɨkya ndɨ bagya-ligubho bɛ : « Tumisogoni bambɨkɛ bi nɨba no mobo. » Botumisogo ndɨ bɨkyɛɛkyɛɛ. 8 Kumbuso yi, ʉbɨkya ndɨ bɛ : « Tugoni mino libo li nɨlɨ, mapóku ngama wo dhumo. » Bagya ndɨ bɛyɔ aka yɔ. 9 Ngama wo dhumo akɨngɨla ndɨ libo li nɨlɔ nɨ iitini kʉwa vinya. Kɛgʉ ndɨ kaibho bɛ vinya yi nɨnɔ apʉnya yanɨ. Luki limoti, bagya-ligubho nɨbɔ batʉga ndɨ libo, batʉ ndɨ ɨbʉ kaibho. Ngama wo dhumo amaka kʉwa alʉkʉ yi nɨnɔ agya ndɨ ndʉwa, 10 ɨyɨ aka ndɨ na ɨyɨ bɛ : « Ko bhulyo ɨkɨ yɔ wabuulyogi mino vinya wanza kadhwɛ mɔnɨ bʉbwanʉ ? Bɛngɛnɨ basɨ bapʉngaga mbɛyɨ kapá nɨnɔ wanza. Kumbuso yi, bakadhamʉwa, bapá sɛ kʉwa zalamba. »
11 A lɨkpʉmʉka lɨmbanga la mambwa nɨlɔ Yeso agya ndɨ. A ndɨ ka Kana, kʉ ka Galilaya. Yeso owoniso ɨbhɨbha kakɨ, babɨbya kakɨ babɨnɨkyana ndɨ.
12 Kumbuso yi, baga ndɨ ka Kapɛlɛnaumu, ɨbʉ na amakɨ, bamamakɨ na babɨbya kakɨ. Kʉ bɛyɔ, bagya ndɨ masyɛ makɛdɛ aka.
Yeso akaukpumyo bambʉla ka ndabʉ ko Kunzi
(Mat 21.12-13; Mk 11.15-17; Lk 19.45-46)
13 Nɨyɔ yɨnga ya Pasɨka ka Bayudha a kʉwa ndɨ buwobhi, Yeso adaka ndɨ ka Yelusalɛma. 14 Kʉ bɛyɔ, ʉtakanya ndɨ bambanzʉ kʉsɔ wa ndabʉ ko Kunzi nɨ banʉgabha bangɔmbɛ, bakɔndɔlɔ na bonzuwo. Batʉ bugomosyono buyi bikononini ka bamɨza kabʉ. 15 Yeso agya ndɨ mufimbo no ligi, apʉnga kaukpumyo batʉ basɨ bi nɨbɔ ba ndɨ ka Ndabʉ ko Kunzi, pa imoti na bakɔndɔlɔ na bangɔmbɛ kabʉ. Omisyo ndɨ buyi ka bogomosyono buyi, utindiko bamɨza bitigbo-tigbo. 16 Ɨyɨ aka na bogobhiso bonzuwo bɛ : « Tumboni masɨ nɨma wanʉ, mokoitisonitɔgʉ ndabʉ ka Bhabha abhɛ sɔkɔ ! » 17 Babɨbya kakɨ batamana ndɨ mʉgɛlɛ-gɛlɛ nɨmɔ ikpikogo kʉsɔ wa Mobiso Motu bɛ : « Mombukwono dhosu, sɨpananɨsɔ kamɨ ko bhulyo ndabʉ kakʉ ezungusini lɨmbɛngɨ bɨzʉʉʉ. »
18 Bayudha bamuuso kʉwa ndɨ Yeso bɛ : « Likingyosi lɨmbanga tino lɔ wakwanana katɨgyɨlya katimoniso bɛ wa no ngu yɨgya bɛyɔ ? »
19 Yeso usikisyo ndɨ bɛ : « Ponzoni ndabʉ ko Kunzi yi nɨyɨ, nɨgpɨlyatʉ kopiko ka masyɛ masaa. » 20 Bayudha basikisyo ndɨ bɛ : « Bopiko ndɨ ndabʉ ko Kunzi yi nɨyɨ ka byanga batɛkɛbɛ bakwanganya na madɨya, ɨwɛ, wɨgɨlya kopiko ka masyɛ masaa aka ? » p 21 Luki limoti, ndabʉ ko Kunzi yi nɨyɔ Yeso a ndɨ kanzɨna ko bhulyo yi nɨ nzʉyɨ kakɨ. 22 Kinili, ngbingo yi nɨnɔ Yeso opupoku ndɨ mino ka mbuku, babɨbya kakɨ batamana ndɨ bɛ abɨkyatʉ ndɨ lɨkpʉmʉka li nɨlɔ. Babɨnɨkyana kʉwa ndɨ Mobiso na mʉnzɨna nɨmɔ Yeso abɨkya ndɨ.
Yeso ibhogatʉ mambɛngɨ ka bambanzʉ
23 Ngbingo yi nɨnɔ Yeso a ndɨ mino ka Yelusalɛma ka yɨnga ya Pasɨka, bambanzʉ budhingi babɨnɨkyana ndɨ kaɨna mokingyosi mʉmbanga-mbaga nɨmɔ agyaga ndɨ. 24 Luki limoti, Yeso kɨtambyagɨgʉ ndɨ na ɨbʉ, kyɛ a ndɨ kaumibho ɨbʉ basɨ bɨnza. 25 Kɛgʉ ndɨ kapa bɛ batʉmbʉlyagɨ ɔbɨlɨ ka mʉmbanzʉ gʉtʉgʉ bemoti aka. A bɛyɔ, ɨyɨ mombukwono dhakɨ ibhogatʉ ndɨ nɨlɔ a ka mambɛngɨ ka bambanzʉ.