Lizuni kʉgʉ wo dhumo wo vononi
22
1 Yeso idhukulogo ndɨ kaʉnzɨnɨlya bata bambaza ka bambanzʉ bi nɨbɔ na mozuni, ʉbɨkya ndɨ bɛ : 2 « Bʉngama ba kʉgʉ wa lɨsyɛ a mʉdɔngɔnɨ abhɛ ngama bemoti nɨnɔ alyisisyo ndɨ mikakɨ mʉlʉkʉ yi dhumo mʉvanana. 3 Ngama yi nɨnɔ ʉtɨka ndɨ bagya-ligubho kakɨ kaumokoku batʉ nɨbɔ butikisyo ndɨ ko dhumo. Luki limoti, batʉ bi nɨbɔ bakya ndɨ kodhoku. 4 « Kʉwa wa, ʉtɨka ndɨ bata bagya-ligubho bagɔgɔ, ʉbɨkya ndɨ bɛ : ‹ Windoni kaʉbɨkya batʉ nɨbɔ nutikisyi bi bɛ : Mbɨya wanʉ, malɨlɨ a kʉwa mubyo ! Numwisisini bi bangɔmbɛ na banyama kamɨ bagɔgɔ banvʉdʉ-nvʉdʉ. Masɨ a makɨtʉlya, dhoniku ko dhumo wo vononi ! ›
5 « Luki limoti, yalɨkya yi nɨyɔ kudhwisogʉ ndɨ pɔ gʉtʉgʉ lɨmbɛngɨ aka. Bemoti ɨmagalya ndɨ ɨyɨ ko tiko kakɨ na wagɔgɔ ɨnda ndɨ kagabha makpʉmʉka kakɨ. 6 Batʉ bagɔgɔ bugwi ndɨ bagya-ligubho bi nɨbɔ, bʉlya ndɨ bɨsʉsʉsʉ, bʉmwɔgɔ.
7 « Lɨmbɛngɨ akandɨkanaga ndɨ ngama yi nɨnɔ bɨsʉlʉ-sʉlʉ. Kʉwa wa, ʉtɨka basʉdha kakɨ bɛ bɨndɨ kaulumwisogo batʉ banyɛ bi nɨbɔ bʉmwɔgɔ ndɨ bagya-ligubho kakɨ na babhʉsya gʉdʉ kabʉ.
8 « Kumbuso yi, ʉbɨkya ndɨ bagya-ligubho kakɨ bɛ : ‹ Malɨlɨ mo dhumo obyini bi. Luki limoti, batʉ nɨbɔ nutikisyi bi bakokwononigʉ kodhoku. 9 Yɛkɨ a bɛyɔ, kpotoni mʉ ma sɛngɨ. Ubikyogoni batʉ basɨ nɨbɔ mabhangana na ɨbʉ bɛ bodhuku ko dhumo wo vononi. ›
10 Bagya-ligubho bi nɨbɔ bosyo ndɨ ko pisi. Bʉmʉmʉla ndɨ batʉ basɨ nɨbɔ ba ndɨ kabhangana na ɨbʉ iki batʉ banyɛ ikanɨ banza. Bodhoku kʉwa ndɨ na ɨbʉ na ndabʉ yo dhumo otumo ndɨ bɨdɛ.
11 « Nɨyɔ ngama yi nɨnɔ ogulyo ndɨ mino ka ndabʉ kyɛ ʉmɨnɨ bobhiko, amɨna ndɨ mʉtʉ bemoti nɨnɔ kimokisyogʉ ndɨ botu ba yo dhumo. 12 Amuuso ndɨ bɛ : ‹ Yɛ wai ! A bʉnɨ wingyiku mino kʉnʉ, nɨ wakimokisyigʉ botu ba yo dhumo ? › Luki limoti, alʉkʉ nɔ adhaka ndɨ ɨyɨ biwo.
13 « Kʉwa wa, ngama yi nɨnɔ ʉbɨkya ndɨ bagya-ligubho kakɨ bɛ : ‹ Mukondoni alʉkʉ yi nɨmʉ magʉ na mabɔkʉ, mambimbo kunzi ko bhiti ! Na kʉ bɛyɔ, iko ndɛkɛ kaigomisogo na kaɨlya manzʉ bɨkyalʉ-kyalʉ. › 14 Kumbuso yi, Yeso omosisyoku bɛ : « Batʉ nɨbɔ bʉmakaga ba bakpʉ, luki limoti nɨbɔ bʉpʉnaga ba bakɛdɛ. »
Bafalisayɔ bakamuuso Yeso ko bhulyo yikalya manzanza
15 Bafalisayɔ baga ndɨ kagyɨlya Yeso dhikidi, balɨka ndɨ bɛ igwinoni pisi ka mʉnzɨna kakɨ. 16 Kʉwa wa, batɨkɨlya ndɨ bemoti-bemoti ka babɨbya kabʉ pa imoti na batʉ ba lidu ka Ɛlɔdhɨ. Batʉ bi nɨbɔ bamuuso ndɨ Yeso bɛ : « Muwonisili ! Takaibho bɛ wa mʉtʉ wa lɨngʉnʉ. Iyo ! Wowonisilogo lɨkpʉmʉka ko Kunzi ka lɨngʉnʉ. Kɛgʉ na mʉmbanzʉ gʉtʉgʉ bemoti aka nɨnɔ wabangaga, kyɛ ɨwɛ, wakandagɨgʉ ɨzangɨya ka mʉmbanzʉ. 17 Tɨbɨkya nɛkɨ mʉtamanagɨ kakʉ : Ambɛ, takwananatʉ kakalya manzanza ka Ngama Kaizali ikanɨ takakwananɨgʉ ? »
18 Luki limoti, Yeso ibho ndɨ tamanaga kabʉ yanyɛ. Usikisyo ndɨ bɛ : « Batʉ ba kʉbɔbɔkʉ ! Ko bhulyo ɨkɨ yɔ mo mino kɛlɨkaga ? 19 Iwonyoni buyi nɨbɔ makalyaga na ibu manzanza. »
Bapá kʉwa ndɨ ambuma bemoti. 20 Yeso umuuso ndɨ bɛ : « Mulundu no lino li nɨlɨ, a ya ka wanɨ ? » 21 Basikisyo ndɨ bɛ : « A ya ka Ngama Kaizali. »
Yeso aka ndɨ na ɨbʉ bɛ : « A bɛyɔ, mupógoni nɛkɨ Kaizali makpʉmʉka kakɨ. Na nɨmɔ ko Kunzi, mapá Kunzi. »
22 Nɨyɔ bʉkana sikisyo ka Yeso, bombomboyo ndɨ kʉgbɛ, basa ndɨ wa, bɨmagalya ndɨ ya kabʉ.
Basadhukayɔ bakamuuso Yeso kʉgʉ wo pupo ka mbʉkʉ
23 Ka lɨsyɛ li nɨlɔ aka lɔ, Basadhukayɔ bemoti-bemoti bakpudoku ndɨ Yeso. ( Ɨbʉ babɨkyaga bɛ bamanda bakopupogɨgʉ ka bambʉkʉ.) Bamuuso kʉwa ndɨ bɛ : 24 « Muwonisili ! Musa abɨkya ndɨ bɛ : ‹ Kiko nɨ mʉmbanzʉ okwini, asa mukakɨ nɨ kobukuti na ɨyɨ, akwanana bɛ mamakɨ amɨgɨlyɨ woko yi nɨnɔ, kyɛ abʉkʉtɨlyagɨ ya dhakɨ nɨnɔ okwo ndɨ bomiki.
25 « Wɨna sɛ, lugo kusu a ndɨ na bawanza madɨya na ɨka nɨbɔ bopupo ndɨ mʉma mumoti. Pʉta ava ndɨ muko, okwo nɨ kobukutigʉ na muko yi nɨnɔ. Asɨlya ndɨ syononogo kakɨ woko yi nɨnɔ. 26 Syononogo kakɨ yi nɨnɔ okwo ndɨ gɔnɨ. Igyonoso ndɨ mʉdɔngɔnɨ bɛgɛyɔ ka mamabʉ nɨnɔ wa yɨsaa, kadhwɛ kʉ kwa kʉ bolumwogo ndɨ mino basɨ madɨya na ɨka. 27 Kumbuso ɨbʉ basɨ kolumwogo, muko yi nɨnɔ ʉbyɛ ndɨ gɔnɨ. 28 Ka lɨsyɛ lipupo ka bambʉkʉ, muko yi nɨnɔ iko ndɛkɛ muko wanɨ ? Ka lɨngʉnʉ, ɨbʉ basɨ madɨya na ɨka bavatʉ ndɨ ! »
29 Yeso usikisyo ndɨ bɛ : « Mabubungogo, kyɛ makɛgʉ kotombisyo Mobiso Motu ikanɨ ngu ko Kunzi. 30 Ka lɨngʉnʉ, ngbingo yi nɨnɔ bamanda bopupo ndɛkɛ mino ka bambʉkʉ, balʉkʉ bakʉvɨgʉ ndɛkɛ bata boko ikanɨ boko kavyɛgɛ. Luki limoti, biko ndɛkɛ mʉdɔngɔnɨ abhɛ bamalaika nɨbɔ kʉgʉ wa lɨsyɛ !
31 « Ko bhulyo yipupo ka bambʉkʉ, makanotongulogigʉ mbɛɨ bɛyɔ Kunzi abɨkya ndɨ mino bɛ : 32 ‹ Ɨmɨ, na Kunzi ka Abhalahamʉ, ka Isaka na ka Yakɔbɔ. › a Yeso omotiloku ndɨ bɛ, Kunzi kɛgʉ Kunzi ka bamanda, luki limoti, a Kunzi ka batʉ nɨbɔ ba na ɔbɨlɨ ! »
33 Bambaza ka bambanzʉ nɨbɔ bʉkana ndɨ mʉtɨwɨ mi nɨmɔ, bombomboyo ndɨ kʉgbɛ.
Mʉtʉʉ nɨmɔ okitogi magɔgɔ na ɨzangɨya
34 Ngbingo yi nɨnɔ Bafalisayɔ bʉkana ndɨ mino bɛ Yeso udhokisini Basadhukayɔ, Bafalisayɔ bi nɨbɔ bamʉmʉkana kʉwa ndɨ pa imoti. 35 Bemoti kabʉ nɨnɔ ibhogo ndɨ mʉtʉʉ kʉgbɛ, akpudoku ndɨ Yeso kakɨngɨlaga, amuuso bɛ: 36 « Muwonisili ! Kʉsɔ wa mʉtʉʉ masɨ, mʉtʉʉ tino mɔ okitogi magɔgɔ na ɨzangɨya kʉgbɛ ? »
37 Yeso asikisyo ndɨ bɛ : « ‹ Mʉpa Mombukwono dhakʉ Kunzi na lɨmbɛngɨ kakʉ lasɨ, na mʉtamanagɨ kakʉ masɨ na yimibho kakʉ yasɨ. › b 38 Mʉtʉʉ ma ɨzangɨya kʉgbɛ na ma mambwa nɨmɔ. 39 Na mʉtʉʉ ma yɨba a mʉdɔngɔnɨ : ‹ Mʉpa mamakʉ mʉdɔngɔnɨ bɛyɔ wɨpaga mino ɨwɛ mombukwono dhakʉ. › c 40 Mʉtʉʉ mɨba mi nɨmɔ a madhʉlʉ ma masɨ nɨmɔ ikpikogo kʉsɔ wa Mʉtʉʉ ka Musa na ka bakɨtabʉ ka bogyalandʉ. »
Klisito nɨ Mombukwono ngama Dhaudhi
41 Ngbingo yi nɨnɔ Bafalisayɔ ba ndɨ mino bʉmʉmʉkana, Yeso umuuso ndɨ bɛ : 42 « Mʉtamanagɨ kunu a bʉnɨ kʉgʉ ka Klisito ? Opupo ndɨ ka lɨvananza ka wanɨ ? » Basikisyo ndɨ bɛ : « Opupo ndɨ ka lɨvananza ka ngama Dhaudhi. »
43 Yeso ʉbɨkya ndɨ bɛ : « Yɛkɨ a bɛyɔ, pisi ko ngu ya Lɨmbɛngɨ Lotu, Dhaudhi akwanana ndɨ lɨkɨ kamaka Klisito bɛ Mombukwono dhosu ? Ka lɨngʉnʉ , Dhaudhi abɨkya ndɨ bɛ :
44 ‹ Mombukwono dhosu abɨkya ndɨ Mombukwono dhamɨ bɛ :
Dha wiki ka kumbanzɨkanɨkɔ kamɨ,
kadhwɛ kʉ kwa kʉ nubhiso mino bomuyoniso kakʉ
kusili kakʉ. › d
45 Kiko nɛkɨ nɨ Dhaudhi akamaka Klisito bɛ Mombukwono dhosu, igyonoso kʉwa lɨkɨ bɛ iki bata mikakɨ ? »
46 Kɛgʉ na mʉmbanzʉ gʉtʉgʉ bemoti aka nɨnɔ akwanana ndɨ kasikiyo Yeso lɨkpʉmʉka. Na katʉkya ka lɨsyɛ li nɨlɔ, kɛgʉ na nɨnɔ ɨkpʉnda ndɨ bata bɛ amuusogi makpʉmʉka.