Yeso opupini ka mbʉkʉ
28
1 Nɨyɔ lɨsyɛ la Kimumbiso akɨtaga ndɨ, kʉwa na bʉgala bi ka lɨsyɛ la mambwa la pɔsɔa ko mbolugo, Malia nɨnɔ a ndɨ mʉtʉ wa gʉdʉ wa Magadhala pa imoti na Malia nagɔgɔ, baga ndɨ kaanda mbʉkʉ. 2 Ko ngbingo bemoti, azigizo wapʉ apʉnga ndɨ. Malaika ko Mombukwono dhosu, osyoku ndɨ kotukyoku kʉgʉ wa lɨsyɛ, ɨnda ndɨ katɛ lɨtalʉ lidhingi nɨlɔ otikyo ndɨ mbʉkʉ ka kpɔlɔ, iko ndɨ kʉgʉ yi. 3 A ndɨ kanze kʉgbɛ mʉdɔngɔnɨ abhɛ ngbangbata kangɨnana. Na botu kakɨ a ndɨ bitu abhɛ libhu.
4 Bobubulyo nɨbɔ ba ndɨ kobuulyogo mbʉkʉ bapʉnga ndɨ kagʉgʉma bɨkyakyakya na kʉbangakʉ, kadhwɛ kʉ kwa kʉ bɨɨta ndɨ mino abhɛ bamanda.
5 Luki limoti, malaika nɨnɔ ʉbɨkya ndɨ boko bi nɨbɔ bɛ : « Makobongonitɔgʉ ibunu. Nakaibho ambɛ makakɨsa Yeso, nɨnɔ bamwi bi ka mʉsalabha. 6 Kɛgʉ bata wanʉ ! Opupini bi ka mbʉkʉ mʉdɔngɔnɨ bɛyɔ abɨkya ndɨ mino. Dhoniku, winoni kʉ a ndɨ mino mumongoso. 7 Windoni bɨgala kaʉbɨkya babɨbya kakɨ bɛ : ‹ Opupini bi lugo ka bamanda. Matokonyoku ka Galilaya. Maminoku banʉ kʉ bɛyɔ. › Nɨlɔ no bi ambɛ namʉbɨkyɨ nɨlɔ. »
8 Boko baba bi nɨbɔ batʉkya ndɨ bɨgala-gala ka mbʉkʉ botumini na kʉbangakʉ bɨdɛ na magyagya mudhingi gɔnɨ. Bɨnda ndɨ mbangʉ kaʉtʉmbʉlyaga babɨbya ka Yeso mongoni mi nɨmɔ.
9 Ko ngbingo bemoti, Yeso bɨkpɛ abhangana ndɨ na boko bi nɨbɔ, umuuso. Bakpudoku ndɨ, bavɨlaga magʉ na babhibhiso. 10 Yeso ʉbɨkya kʉwa ndɨ bɛ : « Makobongonitɔgʉ ! Windoni kaʉbɨkyaga bomika-mama bɛ baga ka Galilaya. Beminoku kʉ bɛyɔ. »
Bobubulyo ba mbʉkʉ bogoni kapága mongoni
11 Ngbingo yi nɨnɔ boko bi nɨbɔ ba mbɛɨ ndɨ mino ko pisɨ aka, bobubulyo bemoti-bemoti ba mbʉkʉ batʉkya ndɨ, baga ka gʉdʉ. Kʉ bɛyɔ, bʉtʉmbʉlyaga ndɨ bokumu-kumu lasɨ nɨlɔ akɨtanaga ndɨ.
12 Kʉwa wa, bokumu-kumu bi nɨbɔ pa imoti na bambɔkʉ ka Bayudha bagya ndɨ dhikidi. Bʉkanana ndɨ kaʉpá basʉdha bi nɨbɔ buyi budhingi bɨpɛlɛ. 13 Bʉbɨkya ndɨ bɛ : « Bikyoni ambɛ : ‹ Babɨbya kakɨ bodhuku bi no bhiti kaibo manda kakɨ ko ngbingo yi nɨnɔ to bi mino ka batɔtɔ. › 14 Kiko nɨ mongoni asilyini ngama mudhingi wa iwili, ibusu bamombukwono dhabʉ bi bɔ tatʉmbʉlyaga mongoni mi nɨmɔ. Tagya yasɨ ambɛ ibunu makogulyonitɔgʉ ka bukpwuku-kpwuku. »
15 Kʉwa wa, basʉdha bi nɨbɔ bava ndɨ buyi na bagya mʉdɔngɔnɨ bɛyɔ bʉkpamya ndɨ mino. Mongoni mi nɨmɔ ɨtʉlyana ndɨ lugo ka Bayudha kadhwɛ na lɨsyɛ li nɨlɨ.
Yeso upupilyini babɨbya kakɨ
16 Kʉwa wa, babɨbya bi nɨbɔ tɛkɛbɛ na bemoti baga ndɨ ka Galilaya, ka ngʉpa nɨyɔ Yeso ʉwanyaga ndɨ. 17 Ngbingo yi nɨnɔ bamɨna ndɨ mino, babhibhiso. Luki limoti, bemoti-bemoti kabʉ ba ndɨ na botumo.
18 Kumbuso yi, Yeso ukpudoku ndɨ, ʉbɨkya bɛ : « Bɛpóni ndɨ ngu yasɨ kʉgʉ wa lɨsyɛ na kʉnʉ ka ɔbɨlɨ. 19 Yɛkɨ a bɛyɔ, windoni ka batʉ bo giyo yasɨ, uikosoni biki babɨbya kamɨ. Ubotisoni ko lino ka Bhabha, ko Miki na ka Lɨmbɛngɨ Lotu. 20 Uwonisiloni bɛ biki kabyɛ masɨ nɨmɔ namʉbɨkyaga ndɨ. Na wibhoni bɨnza ambɛ na pa imoti na ibunu bongbingo basɨ kadhwɛ ka mulibo ma ɔbɨlɨ. »