19
1 Kʉwa wa, Pɨlatɨ akpamya ndɨ bɛ baga na Yeso, batiniku pimbo. 2 Basʉdha boipo ndɨ muligi mo mowo biwilili abhɛ ɨkpakpasʉ, bamokisyo ndɨ. Bamokisyo gɔnɨ ndɨ kanzʉ wangbʉ. 3 Bɨndaga ndɨ buwobhi na ɨyɨ, banatɨbha bikyekye kye banabɨkya bɛ : « Tumuusito, ngama ka Bayudha ! » Banabɨtaga.4 Pɨlatɨ opupoku ndɨ bata, ʉbɨkya Bayudha bɛ : « Ukononi, nakamunyulyoku kyɛ wibhoni ambɛ, nakaminigʉ ɨmɨ na ɨbɔ gʉtʉgʉ imoti aka nɨyɔ namakyɨ mino ka mʉngɨmbɔ. » v 5 Yeso opupoku kʉwa ndɨ, na ɨkpakpasʉ so mowo ka mʉ, imokisyini kanzʉ wangbʉ. Pɨlatɨ aka na ɨbʉ bɛ : « Mʉtʉ kunu nɨmʉ. » 6 Nɨyɔ bokumu-kumu na bazamʉ bamɨna, bagbʉngbʉkana ndɨ bɛ : « Mʉbhangɨlaga ka mʉsalabha ! Mʉbhangɨlaga ka mʉsalabha ! » Pɨlatɨ ʉbɨkya ndɨ bɛ : « Muvoni ibunu bamombukwono dhonu, mabhongilogoku. A bɛyɔ, nakaminigʉ ɨmɨ na ɨbɔ nɨyɔ namakyɨ mino ka mʉngɨmbɔ. » 7 Bayudha basikisyo ndɨ bɛ : « Ibusu ta na mʉtʉʉ, kabyɛnɛnɛ na mʉtʉʉ mi nɨmɔ, okwononi bɛ alʉkʉ yi nɨmʉ okwi, kyɛ akaɨbhɨbha bɛ a Miko Kunzi. »
8 Nɨyɔ Pɨlatɨ ʉkana bɛyɔ, abanga ndɨ bata kʉgbɛ. 9 Ɨga ndɨ ka ndabʉ, amuuso Yeso bɛ : « Wa mbɛyɨ mʉkɨ ? » Luki limoti, nɨ Yeso kasikisyigʉ. 10 Pɨlatɨ amuuso kʉwa ndɨ bɛ : « Ambɛ, wedhokilyi ɨmɨ ? Wakɛgʉ mbɛyɨ kaibho ambɛ ɨmɨ nɔ nakwanana kaʉkʉlaga ikanɨ kaʉbhangɨlaga ka mʉsalabha ? » 11 Yeso asikisyo bɛ : « Bʉngama kakʉ kɛgʉ kʉgʉ kamɨ, kiki asɨ nɨbɔ aka bɔ Kunzi upoku ndɨ kotukyoku kʉgʉ wa lɨsyɛ. Kinili, mʉtʉ yi nɨnɔ egobhi bi ka mabɔkʉ kabʉ, obhinikini bʉnyɛ budhingi kakɨtaga nɨbɔ kakʉ. »
12 Katʉkya ko ngbingo yi nɨnɔ, Pɨlatɨ apʉnga ndɨ kakɨsa pisi kasiso Yeso. Luki limoti, Bayudha bapʉnga bata ndɨ kagbʉngbʉkana bɛ : « Wakasiso alʉkʉ yi nɨmʉ, wakɛgʉ wai dhakɨ Kaizali. Mʉtʉ wasɨ nɨnɔ akaidhondiso bɛ a ngama, a mumuyoniso ka Kaizali. » 13 Nɨyɔ Pɨlatɨ ʉkana bɛyɔ, apupisiso ndɨ Yeso. Iko ndɨ ko kiti nɨnɔ ʉkɔgɔ ndɨ mino bangbanga, ka pa nɨyɔ bodukyo ndɨ na matamʉ. Pa nɨyɔ balɨkyaga na Libhelenia bɛ « Gabbata. » 14 Lɨsyɛ li nɨlɔ a ndɨ lɨsyɛ la kibungusyogo ka yɨnga wa Pasɨka, bhanda sa-sita. Pɨlatɨ ʉbɨkya kʉwa ndɨ Bayudha bɛ : « Ngama kunu nɨmʉ ! » 15 Luki limoti, bagbʉngbʉkana ndɨ bɛ : « Mʉmwɔ ! Mʉmwɔ ! Mʉbhangɨlaga ka mʉsalabha ! » Pɨlatɨ umuuso ndɨ bɛ : « Makapa bɛ nabhangɨlagɨ ngama kunu ka mʉsalabha ? » Bokumu-kumu basikisyo ndɨ bɛ : « Takɛgʉ ibusu na ngama wagɔgɔ, asɨ Kaizali aka. » 16 Pɨlatɨ ʉpá kʉwa ndɨ Yeso bɛ kyɛ babhangɨlagɨ ka mʉsalabha.
Basʉdha bakabhangɨlaga Yeso ka mʉsalabha
Basʉdha bava kʉwa ndɨ Yeso. 17 Ɨyɨ Yeso mombukwono dhakɨ yi nɔ abhɨnɨka ndɨ mʉsalabha kakɨ, opupo ndɨ kunzi wa gʉdʉ. Ɨnda kʉwa ndɨ miso ya pa nɨyɔ balɨkyaga bɛ « Pa ya Ɨkpʉkpʉkʉsɔ » isi yi na Libhelenia bɛ « Gɔlɔgɔta. » 18 Kʉ bɛyɔ, babhangɨlaga ndɨ Yeso ka mʉsalabha na batʉ bagɔgɔ baba, nɔ kʉ, nɔ kʉ. 19 Pilatɨ okpikogo ndɨ kʉgʉ wa mikya-lɨbaʉ, babhanga kʉgʉ wa mʉsalabha. A ndɨ yikpiko bɛ : « Yeso mʉtʉ wa Nazalɛti, Ngama ka Bayudha. » 20 Bayudha budhingi batangʉlaga ndɨ mobiso mi nɨmɔ, kyɛ pa nɨyɔ babhangɨlaga ndɨ mino Yeso a ndɨ buwobhi na gʉdʉ. A ndɨ yikpiko ka Libhelenia, Lilatini na Ligiliki. 21 Kʉwa wa, bokumu-kumu ka Bayudha babɨkya ndɨ Pɨlatɨ bɛ : « Wokokpikoni bɛ : ‹ Ngama ka Bayudha, › luki limoti kpiko bɛ : ‹ Alʉkʉ yi nɨmʉ abɨkya ndɨ bɛ : Ɨmɨ nɨ Ngama ka Bayudha ! › » 22 Luki limoti, Pɨlatɨ usikisyo ndɨ bɛ : « Nɨyɔ nokpiki, nokpikini. »
23 Nɨyɔ basʉdha bama kabhangɨlaga Yeso, bava ndɨ botu kakɨ, bagbananaga ka bapanga bayɨkwanganya. Sʉdha bemoti-bemoti ava ndɨ panga yi yimoti. Bava ndɨ gɔnɨ kanzʉ kakɨ nɨnɔ ɨtɨla ndɨ nɨ kɛgʉ na bapanga, katʉkya kʉgʉ adhwɛ kusili, a ndɨ kutuko kumuti aka. 24 Basʉdha babɨkyana ndɨ lugo kabʉ bɛ : « Takayibogonitɔgʉ kanzʉ yi nɨmʉ, totwini mino lɨbɛsɛ, ibha tɨnɨ bɛ wanɨ nɔ asumbo. » Lɨkpʉmʉka li nɨlɨ igyonoso ndɨ kyɛ ɨtʉlyanɨ Mobiso Motu nɨmɔ akabɨkya bɛ :
« Bagbananaga ndɨ botu kamɨ,
batwa lɨbɛsɛ ko bhulyo kanzʉ kamɨ . »
Basʉdha bagya ndɨ bɛyɔ.
25 Amakɨ Yeso, mamakɨ-amakɨ nɨnɔ muko yi, Malɨa nɨnɔ a ndɨ muko Kɨlɨɔpasɨ sɛ kʉwa Malɨa mʉtʉ wa Magadhala ba ndɨ bakamaga buwobhi na mʉsalabha ka Yeso. 26 Nɨyɔ Yeso amɨna ndɨ amakɨ pa imoti na mʉbɨbɨbya yi nɨnɔ apága ndɨ kʉgbɛ, abɨkya ndɨ bɛ : « Mama, mikakʉ nɨmʉ. » 27 Kumbuso yi, abɨkya ndɨ mʉbɨbya nɔ bɛ : « Amakʉ kʉwa nɨmʉ. » Katʉkya ka lɨsyɛ li nɨlɔ, mʉbɨbya nɔ aga ndɨ na Malɨa kʉ kakɨ.
Kukwakʉ ka Yeso
28 Kumbuso yi, Yeso a ndɨ kaibho bɛ masɨ itulyonini. Kotulyoso nɨlɔ ikpikogo ndɨ kʉsɔ wa Mobiso Motu, abɨkya bɛ : « Nakaɨmʉkana mʉsasa mo libo. » 29 Wa bɛyɔ, a ndɨ na mbɨkɛ yimoti yitumo na vinya wozyo bɨdɛ. Kʉwa wa, basʉdha bava ndɨ luki limoti la fʉbʉ-fʉbʉ, bolubho ndɨ kʉsɔ wa vinya yi nɨnɔ, bakpɨkɨla ndɨ ka mʉ ma mikya mʉngbɨngɨlɨ ma sɨbhʉkʉsɔ nɨsɔ balɨkyaga bɛ isopo, bokpudiso ndɨ ka mʉnɔkʉ ka Yeso. 30 Nɨyɔ Yeso amyo vinya wozyo yi nɨnɔ, abɨkya ndɨ bɛ : « Masɨ itulyonini. » Abhʉmya kʉwa ndɨ mʉ, osiso lɨmbɛngɨ.
Sʉdha bemoti atumuni Yeso na syogbu ka mbanzɨ
31 Lɨsyɛ li nɨlɔ a ndɨ lɨsyɛ la kibungusyogo ka lɨsyɛ la Kimumbiso. Kinili, Bayudha bakɛgʉ ndɨ kapa bɛ bamanda ka batʉ bi nɨbɔ bʉbhangɨlaga ndɨ biki kʉgʉ wa mʉsalabha aka kyɛ lɨsyɛ la kimumbiso li nɨlɔ, a ndɨ lidhingi. Bakʉnga kʉwa ndɨ Pilatɨ bɛ bubunogi magʉ kyɛ butotisogi. 32 Basʉdha bodhoku kʉwa ndɨ kobunogo magʉ ka batʉ nɨbɔ bʉbhangɨlaga ndɨ na ba Yeso ka mʉsalabha. Bapʉnga ndɨ na mʉtʉ wa mambwa sɛ kʉwa nɨnɔ wagɔ. 33 Nɨyɔ bosilo ka Yeso, bɨna ndɨ bɛ okwini, kinili, bakabunagʉ ndɨ bata magʉ. 34 Luki limoti, sʉdha bemoti atʉmo ndɨ na syogbu ka mbanzɨ, ko ngbingo bemoti aka, libo na bangʉ opupo ndɨ. 35 Mʉtʉ yi nɨnɔ ɨna ndɨ lɨkpʉmʉka li nɨlɨ nɔ akatʉmbʉlaga yi. Mʉtʉmbʉlagɨ kakɨ a ma lɨngʉnʉ. Ɨyɨ akaibho bɛ akabɨkya lɨngʉnʉ ko bhulyo kyɛ ibunu binikyononito gɔnɨ. 36 Masɨ nɨmɔ igyonoso ndɨ kyɛ ɨtʉlyanɨ nɨlɔ Mobiso Motu abɨkyaga bɛ : « Gʉtʉgʉ mukuwo kakɨ mumuti aka kobunikigʉ ndɛkɛ. » 37 Mobiso magɔgɔ Motu akabɨkya bɛ : « Bandaga ndɛkɛ mʉtʉ yi nɨnɔ batumo ndɨ na syogbu. »
Banaga kalumbo Yeso
38 Kumbuso yi, Yɛzɛfʉ mʉtʉ wa Alɨmatɨya, mʉbɨbya ka Yeso ko dhikidi, ɨnda ndɨ kakʉnga Pilatɨ manda ka Yeso. Pilatɨ abhaɨlya ndɨ. Yɛzɛfʉ ovoku kʉwa ndɨ. 39 Nikodhimo nɨnɔ ɨnda ndɨ ka Yeso lɨsyɛ limoti no bhiti, odhoku ndɨ na malazi nɨmɔ a ndɨ mʉmatanaga no luki abhɛ adhʉdhʉ. Malazi mi nɨmɔ a ndɨ bhanda kilo batɛkɛbɛ basaa. 40 Kʉwa wa, ɨbʉ basɨ baba bava ndɨ manda ka Yeso, bakandaga ndɨ na babhandi bi nɨbayɔ bogbodyogo ndɨ na malazi mi nɨmɔ, mʉdɔngɔnɨ bɛyɔ Bayudha bagyaga ndɨ mino kambwa kalumbo mʉmbanzʉ. 41Tiko yimoti a ndɨ ka pa nɨyɔ babhangɨlaga ndɨ mino Yeso ka mʉsalabha. Kʉsɔ wo tiko yi nɨyɔ, a ndɨ na mbʉkʉ yimoti ya mbɨya nɨyɔ a ndɨ nɨ bakanalumbigʉ mino mʉmbanzʉ. 42 Kaɨna bɛ lɨsyɛ li nɨlɔ a ndɨ lɨsyɛ la kibungusyogo ka lɨsyɛ la Kimumbiso ka Bayudha, balumbo ndɨ Yeso wa kyɛ mbʉkʉ yi nɨyɔ a ndɨ buwobhi.