Yeso aukusini mʉtʉ wa kebu-kebu
8
1 Ngbingo yi nɨnɔ Yeso osyo ndɨ mino ka ngʉpa, bambaza budhingi ka bambanzʉ ba ndɨ kabyɛ bingbooo. 2 Kʉwa wa, kebu-kebu bemoti akpudoku ndɨ. Obuno moli kambwa kakɨ, abɨkya ndɨ bɛ : « Hiii, Mombukwono dhosu ! Wakapa, wakwanana baka kengumoso. » 3 Yeso anana ndɨ kʉbɔkʉkɔ, avɨla. Abɨkya ndɨ bɛ : « Ɛɛɛ ! nobhoilyini, ngʉmana ! » Wa aka wa, angʉmana ndɨ bɨngɔ.
4 Kumbuso yi, Yeso agbɨtyaga ndɨ bɛ : « Wɨmɨnyatʉ, wakabikyonitɔgʉ mʉmbanzʉ gʉtʉgʉ bemoti aka ! Luki limoti, waga kaimoniso ko kumu. Na wapá apɛpɛ kauwoniso bambanzʉ basɨ bɛ wongumonini, mʉdɔngɔnɨ bɛyɔ mʉtʉʉ ka Musa abɨkyaga mino\f + \fr 8:4 Kiko nɨ mʉmbanzʉ aukini kebu-kebu, ɨndaga ndɨ kaiwoniso ko bokumu bɛ ongumonini. Bakpamya kʉwa ndɨ kaiko pa imoti na bɛngɛnɨ. Mʉtʉʉ mi nɨma, watangʉlaga kʉsɔ wa kɨtabʉ ka Balawi 13:45-46, 14:1-31.
Yeso aukusini mʉgya-ligubho ka ngama ka basʉdha
5 Ngbingo yi nɨnɔ Yeso a ndɨ mino kogulyo ka gʉdʉ wa Kapɛlɛnaʉmʉ, ngama ka basʉdha akpudoku ndɨ, ɨgama na ɨyɨ, 6 abɨkya ndɨ bɛ : « Kikiliki Mombukwono dhosu, mʉgya-ligubho kamɨ a bikpwu ka ndabʉ. Obunikogoni na akaigyogyiso kʉgbɛ. »
7 Yeso asikisyo ndɨ bɛ : « Nakodhoku kaukuso. »
8 Luki limoti, ngama yi nɨnɔ asikisyo ndɨ bɛ : « Eze, Mombukwono dhosu ! Nakokwononigʉ bɛ wingyo ka ndabʉ kamɨ. Luki limoti, bɨkyanɔ lɨkpʉmʉka limoti aka, na mʉgya-ligubho kamɨ aukatʉ. 9 « Kyɛ gʉtʉgʉ ɨmɨ, na gɔnɨ kusili wa mʉtʉʉ ka bangama. Natʉ na basʉdha nɨbɔ bikogo kusili kamɨ. Nakabɨkya bemoti ambɛ : ‹ Waga ! ›, aga. Nakabɨkya wagɔgɔ ambɛ : ‹ Dhoku ! ›, odhoku. Na nakabɨkya musunzu kamɨ ambɛ ‹ Gya bɛ ! ›, agya bɛyɔ aka yɔ. »
10 Ngbingo yi nɨnɔ Yeso ʉkana ndɨ mino lɨkpʉmʉka li nɨlɔ, ombomboyo kʉgbɛ. bɨkya ndɨ batʉ nɨbɔ ba ndɨ kabɨbya bɛ : « Ka lɨngʉnʉ, nakamʉbɨkya ambɛ lugo ka Baɨzalɛlɨ basɨ, nakanaminigʉ ndɛkɛ mʉtʉ wa bhaya yakpʉ mʉdɔngɔnɨ abhɛ nɨmʉ ! 11 Nakamʉbɨkya bɨngbanganya ambɛ bambanzʉ budhingi bodhokuto ndɛkɛ katʉkya ka Ɨngɛngɛ na ka Dhumbe. Bambanzʉ bi nɨbɔ balyalya ndɛkɛ pa imoti na Abhalahamʉ, Isaka na Yakɔbɔ ka bʉngama ba kʉgʉ wa lɨsyɛ. 12 Luki limoti, nɨbɔ bɨbʉkʉta ndɨ bɛ bingyi ka Bʉngama bi nɨbɔ, bumbimbo ndɛkɛ kunzi kʉsɔ wo bhiti. Kʉ bɛyɔ, biko ndɛkɛ kagamana na kaɨlya manzʉ. »
13 Kumbuso yi, Yeso abɨkya ndɨ ngama ka basʉdha nɔ bɛ : « Wɨga kʉ kakʉ ! Igyonosi ku kakʉ mʉdɔngɔnɨ bɛyɔ bhaya kakʉ a mino. » Na ko ngbingo yi nɨnɔ aka nɔ, mʉgya-ligubho kakɨ aʉka ndɨ.
Yeso uukusini batʉ ba bokolobu budhingi
14 Kumbuso yi, Yeso aga ndɨ ka ndabʉ ka Pɛtɛlɛ. Kʉ bɛyɔ, ogulyo ndɨ, atakanya tɨtakɨ Pɛtɛlɛ muko yi wakanga nɨ mʉ anagbama. 15 Yeso agwi ndɨ kʉbɔkʉkɔ, mʉ mʉgbama asyo. Kʉwa wa, mama nɔ amaga ndɨ, apʉnga kagugubhyo Yeso.
16 Nɨyɔ bʉgɔgɔ osyo, badhulyoku ndɨ Yeso na bambanzʉ budhingi ba malɨmba. Yeso okpumyo ndɨ malɨmba mi nɨmɔ na mʉnzɨna aka na uukuso ndɨ batʉ basɨ ba bokolobu. 17 Agya ndɨ bɛyɔ, kyɛ ɨtʉlyanɨ mʉnzɨna nɨmɔ Mombukwono dhosu abɨkya ndɨ pisi ka mugyalandʉ Isaya bɛ : « Ɨyɨ, ava ndɨ bʉpɔ kusu, abhɨnɨka buti ba bokolobu kusu. »\f + \fr 8:17 Isaya 53:4 .
18 Ngbingo yi nɨnɔ Yeso ɨna ndɨ mino bɛ ambaza ka bambanzʉ budhingi akungulini, ʉkpamya ndɨ babɨbya kakɨ bɛ bazabhɨ kʉsyakʉ wa ibhombu.
19 Kʉwa wa, muwonisili bemoti wa mʉtʉʉ akpudoku ndɨ Yeso, abɨkya bɛ : « Muwonisili ! Ɨmɨ, nʉbɨbya banʉ pa yasɨ kʉ wiko mino kaɨnda. »
20 Yeso asikisyo ndɨ bɛ : « Banzɨyɔ ba na mabaga, na bombu ba na bandabʉ. Luki limoti, Mika Mʉmbanzʉ kɛgʉ gʉtʉgʉ ɨyɨ na pa ya busisini aka ! »
21 Kumbuso yi, bemoti lugo ka babɨbya kakɨ abɨkya ndɨ bɛ : « Mombukwono dhosu, ɨsɨlyanɔ mbɛɨ pisi, nɨndɨ kalumbo bhabha. »
22 Luki limoti, Yeso asikisyo ndɨ bɛ : « Ɨwɛ, ibyeku ! sa bamanda kolumbo bamanda kabʉ. »
Yeso ogbumini muvivi mapʉ na mʉbaka
23 Kʉwa wa, Yeso adaka ndɨ ka ɨngbɔlɔ yidhingi, pa imoti na babɨbya kakɨ, baga ndɨ. 24 Ko ngbingo bemoti, mbumbo yapʉ apʉnga ndɨ kovivo kʉ ka ibhombu. Na mʉbaka a ndɨ buwobhi kotikyo ɨngbɔlɔ yidhingi. Luki limoti, Yeso a ndɨ nɨ ololini bɨpɛ.
25 Kʉwa wa, babɨbya bisisilo ndɨ kazuzukiso, babɨkya bɛ : « Tiukusonɔ baka, Mombukwono dhosu ! Tanolumwogo ! »
26 Yeso usikisyo ndɨ bɛ : « Ko bhulyo ɨkɨ yɔ mo mino kabanga ? Eze, ma na bhaya yɨkɛdɛ ! » Kʉwa wa, amaga ndɨ, apamɨlya mbumbo na libo la ibhombu. Pa aka ndɨ lɨngʉnʉ biwo.
27 Balʉkʉ bɔ bombomboyo ndɨ kʉgbɛ, bimuuso bɛ : « Mʉtʉ tino pɨyɛ mʉ ? Gʉtʉgʉ mbumbo yapʉ no libo akamʉkana ! »
Yeso uukusini batʉ ba malɨmba baba
28 Ngbingo yi nɨnɔ Yeso bazabha ndɨ mino, bosilo ndɨ ka lɨtɔmbʉ ka Bagɛlasɨa. Kʉ bɛyɔ, batʉ baba nɨbɔ ba ndɨ na malɨmba bopupoku ndɨ kotukyoku ka bekunde, basilyo ndɨ Yeso. Batʉ bi nɨbɔ ba ndɨ bʉdɨya kʉgbɛ, na gʉtʉgʉ mʉmbanzʉ bemoti aka kɨkpʉndagɨgʉ ndɨ kabyɛ ko pisi yi nɨyɔ. 29 Bapʉnga kʉwa ndɨ kapamɨkanaga bɛ : « Miko Kunzi, wakatɨkɨsaga na ɨkɨ ? Wodhoku wanʉ katigyogyiso kambwa wo ngbingo ? » 30 Ka kpɔlɔ wa, ambaza wakpʉ ka bangʉya a ndɨ kalyalya. 31 Kʉwa wa, malɨmba mɔ bɨtatanaga ndɨ na Yeso bɛ : « Kiko nɨ watikpumyini, tɨtɨkanɔ baka kʉsɔ wa ambaza ka bangʉya nɨnɔ. »
32 Yeso ʉbɨkya ndɨ bɛ : « Wogoni ! Malɨmba mi nɨmɔ opupo kʉwa ndɨ, ogulyo ka bangʉya. Ko ngbingo bemoti, ambaza wasɨ ka bangʉya yi nɨnɔ okpililoku ndɨ katʉkya ka ngʉpa, ɨdɨkɨta ndɨ ka ibhombu bikudhumu, olumwogo ndɨ.
33 Ngbingo yi nɨnɔ bobubulyo ka bangʉya bɨna ndɨ mino bɛyɔ, bapɨkɨta ndɨ ka mʉsɛngɨ. Baga kʉwa ndɨ kaʉbɨkyaga bambanzʉ basɨ mongoni mi nɨmɔ igyonoso ndɨ mɔ na nɨmɔ ka batʉ baba nɨbɔ ba ndɨ na malɨmba.
34 Kʉwa wa, bambanzʉ basɨ ba mʉsɛngɨ bɨnda ndɨ kʉ Yeso a ndɨ mino. Ngbingo yi nɨnɔ bamɨna ndɨ mino, bɨtatanaga ndɨ na ɨyɨ bɛ opupi ka lɨtɔmbʉ kabʉ.