Makokonitɔgʉ mʉkɔmbʉ ka batʉ bagɔgɔ
7
1 « Makokonitɔgʉ mʉkɔmbʉ ka batʉ bagɔgɔ, kyɛ Kunzi kamʉkʉlyɨgʉ ndɛkɛ nɨmɔ kunu bɛgɛyɔ. 2 Ka lɨngʉnʉ, Kunzi amʉkʉlya ndɛkɛ mʉkɔmbʉ mʉdɔngɔnɨ bɛyɔ mʉkʉlyaga mino bɛngɛnɨ. Na mʉdɔngɔnɨ bɛyɔ mʉgyaga mino bɛngɛnɨ, Kunzi amʉgya ndɛkɛ ibunu bɛgɛyɔ. 3 « Ko bhulyo ɨkɨ yɔ wo mino kamɨna asɨ okuku aka nɨnɔ a ko liso ka mamakʉ, nɨ wakɛgʉ sɛ kaɨna ingbi nɨyɔ a ka nɨlɔ kakʉ ? 4 Wakwanana kabɨkya mamakʉ lɨkɨ bɛ : ‹ Gya nʉnyʉ okuku nɨnɔ a ko liso kakʉ ›, nɨ kʉsɔ wa nɨlɔ kakʉ mombukwono dhakɨ a na ingbi ? 5 Mʉtʉ wa kʉbɔbɔkʉ ! Wɨnyɔ mbɛɨ ingbi nɨyɔ a ko liso kakʉ. Kumbuso yi, wakwanana kʉwa kaɨna bɨngbanganya kanyɔ okuku ko liso ka mamakʉ.
6 « Makumbimbilyonitɔgʉ bɛnva makpʉmʉka nɨmɔ bapága Kunzi, kyɛ bakwanana kamuikyonilyo, bamʉkʉkaga. Na makumbimbilyonitɔgʉ bangʉya makpʉmʉka kunu ma lɨsɨka, kyɛ bakwanana kobunogo na magʉ bɨkpwɛkpwɛkpwɛ. »
Nɨnɔ akʉngaga, Kunzi apágatʉ
7 « Kungoni, bamʉpátʉ. Kisoni, minisonotʉ nolu. Iponi holi, bamuukwilyotʉ. 8 Ka lɨngʉnʉ, mʉmbanzʉ wasɨ nɨnɔ akʉngaga, bapágatʉ. Nɨnɔ akɨsaga, inisonogotʉ nolu. Na nɨnɔ aipogo holi, baukwilyogotʉ. 9 Wanɨ nɔ lugo kunu akwanana kapá mikakɨ lɨtalʉ nɨ akungini mukati ? 10 Ikanɨ akungini musi, akwanana lɨkɨ kapá nzʉka ? 11 Gʉtʉgʉ bɛyɔ mo mino banyɛ, luki limoti, mibhogotʉ kaʉpá bomiki kunu makpʉmʉka manzanza. Obhonu nɨnɔ kʉgʉ wa lɨsyɛ akwanana kapá mʉtʉ wasɨ nɨnɔ akʉngaga makpʉmʉka manzanza kakɨtaga.
12 « Masɨ nɨmɔ mapaga bɛ bamʉgyɨlyɨ, ugyilyoni bɛngɛnɨ bɛgɛyɔ. Ikpikogo bɛyɔ kʉsɔ wa Mʉtʉʉ ka Musa na ka bakɨtabʉ ka bogyalandʉ.
Mupumi makpwɔ
(Luka 13:24)
13 « Wingyogoni pisi ka mupumi makpwɔ. Ka lɨngʉnʉ, mupumi ma kɨnda ka bʉnyɛ a makpʉ na pisi yi yahʉ. Na batʉ budhingi babyɛgɛ kʉ bɛyɔ.
14 « Luki limoti, mupumi ma kɨnda ka ɔbɨlɨ wa bɛnzɛ a makpwɔ na pisi yi bɨmbɨtɨtɨ. Na nɨbɔ bakɨtaga kʉ, ba bakɛdɛ.
Bibhogo sɨbhʉkʉsɔ ko bhumo yi
15 « Wibuulyonito na bogyalandʉ ba bɔngɔ. Bamudhulyogoku mʉdɔngɔnɨ abhɛ bakɔndɔlɔ, luki limoti, kʉsɔ wa mambɛngɨ kabʉ, ba bosukopi. 16 Mumibho ndɛkɛ pisi ka yɨgya kabʉ.
« Bakapwagɨgʉ bhumo ya muzabhibhu ka muligi mo mowo. Na bakapwagɨgʉ gɔnɨ bhumo yanza ka sɨbhʉkʉsɔ so mowo. 17 Kinili, sɨbhʉkʉsɔ sanza abʉkʉtaga bhumo yanzanza. Na sɨbhʉkʉsɔ sanyɛ abʉkʉtaga bhumo yanyɛnyɛ. 18 Sɨbhʉkʉsɔ sanza kakwananɨgʉ kabʉkʉta bhumo yanyɛnyɛ. Na sɨbhʉkʉsɔ sanyɛ kakwananɨgʉ kabʉkʉta bhumo yanzanza.
19 « Sɨbhʉkʉsɔ sasɨ nɨsɔ kabʉkʉtagɨgʉ bhumo yanza, bagbɨtatʉ na badɨkɨta ko buku. 20 Ka lɨngʉnʉ, mumibhogo ndɛkɛ bogyalandʉ ba bɔngɔ pisi ka yɨgya kabʉ.
Babɨbya ba lɨngʉnʉ
21 « Kɛgʉ bambanzʉ basɨ nɨbɔ bɛmakaga bɛ : ‹ Mombukwono dhosu, Mombukwono dhosu ! › bɔ bogulyo ndɛkɛ ka bʉngama ba kʉgʉ wa lɨsyɛ. Luki limoti, a nɨnɔ aka nɔ akagya sɨpananɨsɔ ka Bhabha nɨnɔ a kʉgʉ wa lɨsyɛ.
22 « Ka lɨsyɛ li nɨlɔ, bambanzʉ budhingi bɛbɨkyatʉ ndɛkɛ bɛ : ‹ Hebe Mombukwono dhosu, Mombukwono dhosu ! Kɛgʉ mbɛɨ ko lino kakʉ lɔ tanzɨna ndɨ mino na bugyalandʉ ? Ko lino kakʉ, tokpumyo ndɨ malɨmba na tagya makpʉmʉka mʉmbanga-mbanga mudhingi ? ›
23 « Ka lɨngʉnʉ, nʉbɨkya ndɛkɛ bɨngbanganya bɛ : ‹ Ɨmɨ, nakanamumibhigʉ ndɛkɛ. Itukyilyoni wa, ibunu bagya-manyɛ ! › »
Bhɨbhʉ kʉgʉ wa bandabʉ bayɨba
24 « Ka lɨngʉnʉ, mʉmbanzʉ nɨnɔ ʉkanaga lɨkpʉmʉka kamɨ, anagya bɛyɔ ibikyi mino, iko ndɛkɛ mʉdɔngɔnɨ abhɛ mʉtʉ wa yimibho. Kyɛ ɨyɨ opiko ndɨ ndabʉ kakɨ kʉgʉ wa lɨtalʉ.
25 « Ngbingo yi nɨnɔ mbwayɨ alʉka ndɨ mino, mobo otumogo, muvivi mapʉ okukwo ndɨ ka ndabʉ yi nɨyɔ. Luki limoti, kodukonogʉ ndɨ kyɛ bakpɔ ndɨ mubumbe mi kʉgʉ wa lɨtalʉ.
26 « Luki limoti, mʉmbanzʉ nɨnɔ ʉkanaga lɨkpʉmʉka kamɨ nɨ kɛgʉ kagya bɛyɔ ibikyi mino, iko ndɛkɛ mʉdɔngɔnɨ abhɛ ngingi. Kyɛ opiko ndɨ ndabʉ kakɨ kʉgʉ wo mbumi.
27 « Ngbingo yi nɨnɔ mbwayɨ alʉka ndɨ mino, mobo otumogo, muvivi mapʉ okukwo ndɨ ka ndabʉ yi nɨyɔ. Kʉwa wa, odukono ndɨ wasɨ bɨgbatata. »