Mʉtʉʉ ko bhulyo yɨbhɨnɨka buti ka batʉ ba yangya
6
1 « Wibuulyonito, makikonitɔgʉ kaipupiso ko miso ka bambanzʉ ngbingo yi nɨnɔ mo mino kagya bʉnza. Kyɛ makagya bɛyɔ, makinisonigʉ na ɨzangɨya kotukyoku ko Obhonu nɨnɔ a kʉgʉ wa lɨsyɛ. 2 « Kʉwa wa, ngbingo yi nɨnɔ wasingyi mino mʉtʉ wa yangya, wakaipoitɔgʉ atangba. Ka lɨngʉnʉ, batʉ ba kʉbɔbɔkʉ bɔ bakagya bɛyɔ kʉsɔ wa bandabʉ kabʉ ba ya likungoni na ka bopisi kyɛ bambanzʉ biki kaʉbhɨbha. Nakamʉbɨkya lɨngʉnʉ : Ɨbʉ binisononi kʉwa na ɨzangɨya kabʉ.
3 Luki limoti, ngbingo yi nɨnɔ wo mino kapá mʉtʉ wa yangya luki, kʉbɔkʉkɔ kakʉ kwa kulekuke kibhonitɔgʉ nɨyɔ kʉbɔkʉkɔ kwa kumbanzɨkanɨkɔ akagya. 4 Okwononi yɨgya yi nɨyɔ iki ko dhikidi. Na Abhakʉ nɨnɔ akaɨna gɔnɨ nɨlɔ wakagya ko dhikidi, ʉkalyatʉ.
Mʉtʉʉ kʉgʉ wa malʉmba
5 « Ngbingo yi nɨnɔ miko mino kalʉmba, makikonitɔgʉ mʉdɔngɔnɨ abhɛ batʉ ba kʉbɔbɔkʉ. Ɨbʉ bapaga kalʉmba bomononini bɨgba kʉsɔ wa bandabʉ kabʉ ba ya likungoni na ka bakpɔlɔ-kpɔlɔ ba ya bopisi. Nakamʉbɨkya lɨngʉnʉ : Ɨbʉ binisononi kʉwa na ɨzangɨya kabʉ.
6 « Luki limoti, ɨwɛ, ngbingo yi nɨnɔ wo mino kalʉmba, wingyo kʉsɔ wa ndabʉ ya kʉsɔ. Wɨdhʉlaga mupumi, wakʉnga Abhakʉ nɨnɔ a wa ka pa yo dhikidi. Ɨyɨ Abhakʉ nɨnɔ akaɨna nɨlɔ wakagya ko dhikidi, ʉkalyatʉ.
7 « Ngbingo yi nɨnɔ mo mino kalʉmba, makikonitɔgʉ kaɨgɨlyaga lɨkpʉmʉka limoti bɨkyɔ mʉdɔngɔnɨ bɛyɔ batʉ nɨbɔ bakamibhigʉ Kunzi bakagya mino. Ka lɨngʉnʉ, mʉtamanagɨ kabʉ a bɛ Kunzi ʉmʉkanatʉ kyɛ banzɨnaga yakpʉ. 8 Makogyonitɔgʉ mʉdɔngɔnɨ abhɛ ɨbʉ. Kyɛ kambwa kakʉnga, Obhonu akaibho mʉsasa kunu.
Obhosu nɨnɔ kʉgʉ wa lɨsyɛ
9 « Ibunu, makwanana nɛkɨ kaiko kalʉmbaga bɛ :
‹ Obhosu nɨnɔ kʉgʉ wa lɨsyɛ,
bambanzʉ basɨ bibhi bɛ lino kakʉ a lotu.
10 Bʉngama kakʉ odhuku,
sɨpananɨsɔ kakʉ igyonosi,
ka lɨtɔmbʉ mʉdɔngɔnɨ abhɛ kʉgʉ wa lɨsyɛ.
11 Tɨpánɔ masyɛ masɨ, malɨlɨ nɨmɔ okwononi na ibusu.
12 Tɨpɨlyanɔ lubu kusu,
mʉdɔngɔnɨ bɛyɔ ibusu tʉpɨlyaga mino batʉ nɨbɔ bikogo no lubu kusu.
13 Wakatisonitɔgʉ kogwo ka kʉbɔbɔkʉ,
luki limoti, tibuulyogo ka mumuyoniso.
[Kyɛ bʉngama, ngu na ɨbhɨbha a ba kakʉ, ka bɛnzɛ na bɛnzɛ !
Iyo a bɛyɔ.] › »
14 Yeso abɨkya ndɨ bata bɛ : « Ka lɨngʉnʉ, kiko nɨ mʉpɨlyagatʉ bomomonu bʉnyɛ kabʉ, Obhonu nɨnɔ kʉgʉ wa lɨsyɛ, amʉpɨlyatʉ ndɛkɛ gɔnɨ ibunu.
15 « Luki limoti, makupilyogi bomomonu, Obhonu kamʉpɨlyɨgʉ ndɛkɛ bɛgɛyɔ.
Mʉtʉʉ kʉgʉ muginyo malɨlɨ ko ngbingo
16 « Ngbingo yi nɨnɔ mo mino koginyo malɨlɨ ko ngbingo, makikonitɔgʉ miso mundindilo mʉdɔngɔnɨ abhɛ batʉ ba kʉbɔbɔkʉ. Ɨbʉ bondindilogo miso bɛyɔ kauwoniso bambanzʉ basɨ bɛ boginyini malɨlɨ ko ngbingo. Nakamʉbɨkya lɨngʉnʉ : Ɨbʉ binisononi kʉwa na ɨzangɨya kabʉ. 17 Luki limoti, ɨwɛ, ngbingo yi nɨnɔ wo mino koginyo malɨlɨ ko ngbingo, wɨsʉkʉsa miso bɨngɔ na wɨbhʉma malazi bipupupu ka mʉ. 18 Kʉwa wa, bambanzʉ bakibhigʉ bɛ wakoginyo malɨlɨ ko ngbingo ko bhulyo kabʉ. Luki limoti, ko bhulyo ka Abhakʉ nɨnɔ a wa ka pa yo dhikidi. Ɨyɨ Abhakʉ nɨnɔ akaɨna nɨlɔ wakagya ko dhikidi, ʉkalyatʉ.
Yeso akanzɨna ka lɨngama la kʉgʉ wa lɨsyɛ
19 « Makikonitɔgʉ kaɨpɨmbya lɨngama wanʉ ka ɔbɨlɨ. Kyɛ bakɛkɛdʉ balyatʉ na nzʉma apʉta. Batʉ bo kubakʉ bakwanana gɔnɨ kobuno ndabʉ, bibo. 20 Luki limoti, pimbyogoni lɨngama kunu kʉgʉ wa lɨsyɛ. Kʉ bɛyɔ, bakɛkɛdʉ bakalyɨgʉ na nzʉma kapʉtɨgʉ. Batʉ bo kubakʉ bakakwananɨgʉ gɔnɨ kobuno ndabʉ na kaibo. 21 Ka lɨngʉnʉ, pa yi nɨyɔ lɨngama kakʉ o mino, lɨmbɛngɨ kakʉ a kʉ gɔ kʉ. »
22 « Miso a tala wa nzʉyɨ. Miso kakʉ kiki no kolobu, nzʉyɨ kakʉ yasɨ iko kʉsɔ wa bʉngbanganya.
23 « Luki limoti, miso kakʉ kidhwonoso, nzʉyɨ kakʉ yasɨ iko kʉsɔ wo bhiti. Kiko nɛkɨ nɨ bʉngbanganya nɨbɔ a kʉsɔ kakʉ a abhɛ bhiti, bhiti yi nɨyɔ iko kʉwa yopi kʉgbɛ ! »
Kagugubyo Kunzi ikanɨ buyi
24 « Mʉgya-ligubho bemoti kakwananɨgʉ kaugugubhyo bangama baba. Ka lɨngʉnʉ, amʉya bemoti na apa wagɔgɔ; ikanɨ ɨgʉmya ka bemoti na amɨna wagɔ payaya. Makakwananɨgʉ kagugubyo ko ngbingo bemoti Kunzi no buyi ! »
Okwononi kaiko na bhaya ko Kunzi
25 « Kinili, ɨmɨ, nakamʉbɨkya ambɛ : Makigbomisonitɔgʉ bamʉ ko bhulyo ya ɔbɨlɨ kunu, iki ko bhulyo malɨlɨ ikanɨ luki limwo, iki ka nzʉyɨ kunu ikanɨ ko luki la kimokisyo. Ka lɨngʉnʉ, ɔbɨlɨ kunu a na ɨzangɨya kʉgbɛ kakɨtaga malɨlɨ, na nzʉyɨ kunu a na ɨzangɨya kʉgbɛ kakɨtaga botu.
26 « Uminoni mbɛɨ bombu ! Bakakʉnagɨgʉ, bakobhuulyogɨgʉ, bakɛgʉ na pa nɨyɔ bobhisogo mino masɔlɔ. Obhonu nɨnɔ kʉgʉ wa lɨsyɛ ulyolisogotʉ ! Wɨna sɛ, ibunu, ma na ɨzangɨya yidhingi kʉgbɛ kaʉkɨtaga bombu ! 27 Wanɨ nɔ akwanana lugo kunu kosisilo lɨsyɛ gʉtʉgʉ limoti aka ka ɔbɨlɨ kakɨ kyɛ akaigbomiso mʉ ? 28 Ko bhulyo ɨkɨ yɔ mo mino kaigbomiso bamʉ ko bhulyo botu ? Wondoni mbɛɨ maʉwa mo tutu bizumuuu, winoni bɛyɔ abakaga mino : kagyagɨgʉ ligubho, kakʉbagɨgʉ botu. 29 Luki limoti, nakamʉbɨkya ambɛ, gʉtʉgʉ ngama Sɔlɔmɔnɔ aka kʉsɔ wa ɨbhɨbha kakɨ yasɨ, kimokisyogʉ ndɨ kutuko kwanza gʉtʉgʉ kumoti aka abhɛ lɨʉwa limoti lugo wa nɨma.
30 « Kiko nɨ Kunzi akomokisyogo mapakʉ mo tutu nɨmɔ a na lɨsyɛ li nɨlɨ wa, na bʉgala badɨkɨta ko buku. Kakwananɨgʉ mbɛɨ kamumokisyogo ibunu yanzanza kʉgbɛ ? Eze, ma batʉ ba bhaya yɨkɛdɛ !
31 « Makigbomisonitɔgʉ nɛkɨ bamʉ bɛ : ‹ Talya sɛ ɨkɨ ? Tomwo ɨkɨ ? Ikanɨ timokisyo ɨkɨ ? › 32 Ka lɨngʉnʉ, batʉ nɨbɔ bakamibhigʉ Kunzi bɔ bikogo kaamama kakɨsa masɨ nɨmɔ. Obhonu nɨnɔ kʉgʉ wa lɨsyɛ ibhogotʉ bɛ ma na mʉsasa ma makpʉmʉka mi nɨmɔ.
33 « Ibunu, kisoni mbɛɨ Bʉngama ko Kunzi na kabyɛ bungbingbili nɨbɔ apaga. Ɨyɨ, amʉmatɨlyatʉ magɔgɔ masɨ kʉgʉ yi.
34 « Kinili, makigbomisonitɔgʉ nɛkɨ bamʉ ko bhulyo ya bʉgala. Bʉgala ɨkɨkɨsya nɨ ɨyɨ mombukwono dhakɨ yi. Masyɛ masɨ a na bʉkpɛkɨ-kpɛkɨ kakɨ. »