Yuani mubhatizai utikini batʉtʉmbwa kʉ ka Yeso
11
1 Ngbingo yi nɨnɔ Yeso ama ndɨ mino kaʉpá babɨbya kakɨ tɛkɛbɛ na baba mʉtʉʉ, atʉkya ndɨ wa. Aga kʉwa ndɨ ka bagʉdʉ ba Galilaya kaʉtɨwa bambanzʉ na kaʉbɨkyaga Mongoni Manza ko Kunzi. 2 Na ngbingo yi nɨnɔ Yuani a ndɨ mino ka ligbito, ʉkana bɛyɔ Klisito a ndɨ mino kagya. Kʉwa wa, ʉtɨka babɨbya kakɨ kamuuso Yeso bɛ : 3 « Ambɛ, ɨwɛ nɔ wakwanana ndɨ kodhoku, ikanɨ tabʉnda mʉtʉ wagɔgɔ ? »
4 Yeso usikisyo ndɨ bɛ : « Windoni kabɨkya Yuani bɛyɔ mukoni mino na bɛyɔ mini mino. 5 Batʉ bo kolobu ba ya mamɔmɔ bakaɨna, nɨbɔ bubunikogo bakakpakyana. Bakebu-kebu bakaʉka, baadhʉka bakaʉkana, bamanda bakabhɨlɨla na batʉ ba yangya bakaʉkana Mongoni Manza. 6 Ɨgyagya ka nɨnɔ kasɨgʉ banʉ bhaya kakɨ ko bhulyo kamɨ ! »
7 Ngbingo yi nɨnɔ babɨbya ka Yuani bopupo ndɨ mino, Yeso apʉnga ndɨ kaʉpága bambaza ka bambanzʉ mongoni kʉgʉ ka Yuani bɛ : « Mɨnda mbɛɨ ndɨ kaɨna ɨkɨ ka ɨsa ? Lɨgʉgʉ nɨlɔ a ndɨ kodhimbo na muvivi ? Kalɨ ! 8 Ka lɨngʉnʉ, mɨnda ndɨ kaɨna ɨkɨ ? Mʉtʉ nɨnɔ imokisyogo ndɨ botu ba ya nzanza ? Kalɨ ! Ka lɨngʉnʉ, nɨbɔ bimokisyogo botu ba ya nzanza bikogo ka bandabʉ ka bangama ! 9 Mɨnda sɛ kʉwa ndɨ kaɨna ɨkɨ ? Mugyalandʉ ? Iyo ! Nakamʉbɨkya ambɛ, ɨyɨ akitogito gʉtʉgʉ bata mugyalandʉ byɨ. 10 Ka lɨngʉnʉ, Yuani a nɨnɔ Mobiso Motu ikpikogo kʉgʉ kakɨ bɛ :
‹ Ɨmɨ, natɨka banʉ atʉtʉmbwa kamɨ kambwa kakʉ,
kaubungusilyogo pisi. › x
11 « Nakamʉbɨkya lɨngʉnʉ ambɛ, lugo ka bambanzʉ basɨ nɨbɔ bɨbʉkʉta ndɨ ka bamʉma ka bamabʉ, kɛgʉ na mʉmbanzʉ gʉtʉgʉ bemoti aka nɨnɔ akɨtogi Yuani mubhatizai. Luki limoti, nɨnɔ a miki ka bʉngama ba kʉgʉ wa lɨsyɛ, ɨyɨ nɔ a mʉtʉ mudhingi kakɨtaga ɨyɨ. 12 Katʉkya ka masyɛ ka Yuani mubhatizai kadhwɛ na lɨsyɛ li nɨlɨ, bambanzʉ bakobhumoniso bʉngama ba kʉgʉ wa lɨsyɛ. Na batʉ bo gilito bakakɨsa kava ko ngu.
13 « Ka lɨngunʉ, bogyalandʉ basɨ na mʉtʉʉ ka Musa banzɨna ndɨ na bugyalandʉ kʉgʉ wa Bʉngama kadhwɛ ko ngbingo ka Yuani. 14 Na makapa kabhaɨlya, Yuani nɨ mugyalandʉ Ɨlɨya nɨnɔ akwanana ndɨ kodhoku. 15 Nɨnɔ a na motili ma kʉkana, ʉkanɨtɔ !
16 « Nakwanana kaukingyoso batʉ ba lɨvananza nɨlɨ na bawanɨ ? Ba mʉdɔngɔnɨ abhɛ bomiki nɨbɔ ba bakikonono ka pa yangba, banʉmaka bawai dhabʉ, banabɨkya bɛ :
17 ‹ Ko bhulyo ɨkɨ yɔ tamufyilyi bi mino mbala,
nɨ makobinigʉ !
Tamʉmbɨmbɨlya mambʉ ma lɨlɛbʉ,
nɨ makogomigʉ ! ›
18 « Ka lɨngʉnʉ, ngbingo yi nɨnɔ Yuani odhoku ndɨ mino, kalyalyagɨgʉ ndɨ na komwogɨgʉ ndɨ. Bambanzʉ bapʉnga ndɨ kabɨkya bɛ a na lɨlɨmba. 19 « Nɨyɔ Mika Mʉmbanzʉ odhoku ndɨ, ɨyɨ alyalyagatʉ ndɨ na anomwo. Bapʉnga ndɨ kabɨkya bɛ : ‹ Muminoni ! Nɨmʉna a mʉtʉ mʉlyalya binvuma-nvuma na mʉtʉ wa lɨbhʉma ! A wai dhakɨ bandɔmbɛ ba manzanza na batʉ ba bʉnyɛ ! › Gʉtʉgʉ bɛyɔ, yimibho kakɨ akainisono pisi ka nɨyɔ akagya. »
Yeso akanzɨna kʉgʉ wa bagʉdʉ nɨbɔ amʉyaga kabɨnɨkyana
20 Kumbuso yi, Yeso apʉnga ndɨ kaʉnyakɨlya batʉ ba bagʉdʉ nɨbɔ agya ndɨ mino makpʉmʉka mʉmbanga-mbanga mudhingi. Ka lɨngʉnʉ, ɨbʉ batʉ bi nɨbɔ bakɛgʉ ndɨ kapa kaikoso ɔbɨlɨ kabʉ. Kʉwa wa, apʉnga ndɨ kaʉtɨwa bɛ : 21 « Kumbu kakʉ, gʉdʉ wa Kɔlazini ! Kumbu kakʉ, mugi ma Bhɛtɛsaidha ! Kiko bi bɛ makpʉmʉka mʉmbanga-mbanga nɨmɔ igyonoso ndɨ ku kunu, kigyonoso ndɨ ka gʉdʉ wa Tilo na nɨnɔ wa Sidhona, ibha katʉkya ka bʉndɛlɨ, batʉ bi nɨbɔ kʉ baikosoni ndɨ ɔbɨlɨ kabʉ. Kowoniso bhaya kabʉ, bimokisyo ndɨ botu ba ya lɨlɛbʉ na bigbodyo mʉkpʉndʉ. 22 Kinili, ɨmɨ, nakamʉbɨkya ambɛ ka lɨsyɛ lɨkɔ mʉkɔmbʉ, yigyogyiso kunu iko ndɛkɛ yapʉ kʉgbɛ kaʉkɨtaga batʉ ba Tilo na nɨbɔ ba Sidhona !
23 « Na ɨwɛ, mugi ma Kapɛlɛnaumu ! Ambɛ, wakasɨma bɛ budokisotʉ ndɛkɛ kadhwɛ kʉgʉ wa lɨsyɛ ? Kɨgyananɨgʉ ! Luki limoti, busiso ndɛkɛ ka lɨbyɛ lodhu kʉgbɛ ! Ka lɨngʉnʉ, makpʉmʉka mʉmbanga-mbaga nɨmɔ igyonoso ndɨ kʉ kakʉ, kigyonoso ndɨ ka Sɔdhɔmʉ, ibha gʉdʉ yi nɨnɔ atʉ mbɛɨ bata aka kadhwɛ na lɨsyɛ li nɨlɨ. 24 Kinili, ɨmɨ, nakamʉbɨkya ambɛ ka lɨsyɛ lɨkɔ mʉkɔmbʉ, yigyogyiso ya Sɔdhɔmʉ kikigʉ ndɛkɛ yapʉ kʉgbɛ kakɨtaga nɨyɔ kakʉ ! »
Yeso akamibhikoso Abhakɨ
25 Ko ngbingo yi nɨnɔ, Yeso abɨkya ndɨ bɛ : « Bhabhaooo ! Nakaubhibhiso ! Ɨwɛ nɨ Mombukwono kʉgʉ wa lɨsyɛ na lɨtɔmbʉ ! Ka lɨngʉnʉ, ʉsʉmɨlya ndɨ batʉ ba yimibho na nɨbɔ bamibhogo bhalʉwa makpʉmʉka na uwoniso kʉwa ndɨ batʉ ba payaya. 26 Iyo Bha ! Wabhaɨlya ndɨ bɛyɔ.
27 « Bhabha ɛpá ndɨ masɨ. Kɛgʉ na nɨnɔ amibhogo Miki kiki nɨ Bhabha aka. Na kɛgʉ na nɨnɔ amibhogo Bhabha kiki nɨ Miki aka, na batʉ nɨbɔ ɨyɨ Miki apaga kaʉwanya Abhakɨ bɛ bamibhi.