Yuani mubhatizai akabɨkyaga Mongoni Manza
3
1 Ko ngbingo yi nɨnɔ, Yuani mubhatizai opupono ndɨ ka ɨsa ya Yudhɛa, anʉtʉbɨlyaga bambanzʉ Mongoni Manza bɛ :2 « Wosoni lɨngʉnʉ bʉnyɛ kunu, kyɛ bʉngama ba kʉgʉ wa lɨsyɛ a kʉwa buwobhi. »
3 Mugyalandʉ Isaya anzɨna ndɨ kʉgʉ ka Yuani bɛ :
« Lɨyʉ lapʉ akopupo ka ɨsa bɛ :
‹ Mubungusilyoni Mombukwono dhosu pisi !
Munonilyoni bopisi bɨngbɨa! › »
4 Yuani imokisyogo ndɨ botu nɨbayɔ bagya ndɨ no tukatʉ ka ngamiya na ikogo ndɨ na mʉkaba ma sibhokuso ka ɨdʉkʉfɨsɔ bingbufu. Ɨyɨ, ʉlyaga ndɨ banabʉnyɛnyɛ no nzuki. 5 Bambanzʉ badhulyogoku ndɨ katʉkya ka Yelusalɛma, ka Yudhɛa wasɨ na ka banakpangbala basɨ bo libo lidhingi la Yɔlɔdhanɨ. 6 Botubogo ndɨ kambwa ka bambanzʉ na Yuani anubotiso ko libo lidhingi la Yɔlɔdhanɨ.
7 Yuani ɨna ndɨ bɛ Bafalisayɔ na Basadhukayɔ bakpʉ ba ndɨ kadhulyoku bituteee kyɛ ubotisi. Luki limoti, a ndɨ kaʉbɨkyaga bɛ: « Lɨvananza ka banzʉka ! Wanɨ nɔ amutiwi bɛ makwanana kanyɨka mʉngɨmbo ko Kunzi nɨmɔ akodhoku ? 8 Wonisoni pisi ka yɨgya kunu bɛ mosoni lɨngʉnʉ bʉnyɛ. 9 Na makikonitɔgʉ katamanaga bɛ : ‹ Abhalahamʉ nɨ tɨtosu ! › Nakamʉbɨkya ambɛ Kunzi akwananatʉ koitiso matamʉ mi nɨmana kaiko bomika Abhalahamʉ ! 10 Gbɔnɨ a sɛ kʉwa yakɨtʉlya kagbɨta bhʉkʉtɔ ka motino mi. Sɨbhʉkʉsɔ sasɨ nɨsɔ kɛgʉ kapá bhumo yanzanza bagbɨtatʉ banʉ, badɨkɨta ko buku.
11 Ɨmɨ, nakamubotiso ko libo kowoniso bɛ mosoni lɨngʉnʉ bʉnyɛ kunu. Luki limoti, nɨnɔ akodhoku kumbuso kamɨ a no ngu kɛkɨtaga. Ɨyɨ, amubotiso banʉ ka Lɨmbɛngɨ Lotu na ko buku. Nakakwananɨgʉ gʉtʉgʉ kanyɔgɔ bɛkpakʉ. 12 Mbɨya wanʉ, a na dunga mugwi kapɨpa mʉpʉnga. Amʉmʉla banʉ mʉpʉnga, abuulyogo kʉsɔ wa bhasa ya masɔlɔ kakɨ. Luki limoti, abhʉsya banʉ bɛvʉlʉ ko buku nɨbɔ kolimikigʉ ndɛkɛ. »
Yuani abotisini Yeso
13 Ko ngbingo yi nɨnɔ, Yeso atʉkya ndɨ ka Galilaya asilyo Yuani ko libo Yɔlɔdhanɨ, kyɛ ɨyɨ Yuani abotisi. 14 Luki limoti, Yuani akya ndɨ. Abɨkya ndɨ Yeso bɛ : « Ɨwɛ nɔ wakwanana kebotiso, ogwi pɨyɛ bʉnɨ ɨwɛ kedhulyoku ? » 15 Yeso asikisyo ndɨ bɛ : « Wasa, nɨyɔ igyonosi mbɨya wanʉ bɛyɔ. Kyɛ akatɨkʉnga bɛ tagyɨ masɨ nɨmɔ okwononi kambwa ko Kunzi. » Kʉwa wa, Yuani abhaɨlya ndɨ. 16 Nɨyɔ Yeso ibotisiso, opupo ndɨ ko libo. Ko ngbingo yi nɨnɔ aka nɔ, lɨsyɛ oukwikono, ɨna Lɨmbɛngɨ ko Kunzi nɨ anasilyoku abhɛ likpondi. Lɨmbɛngɨ li nɨlɔ iko ndɨ kʉgʉ kakɨ. 17 Lɨyʉ limoti atʉkya ndɨ kʉgʉ wa lɨsyɛ, abɨkya bɛ : « Nɨmʉ nɔ a mikamɨ mʉpaka, nogwogo magyagya na ɨyɨ kʉgbɛ. »