Mumuyoniso akakɨngɨlaga Yeso
4
1 Kʉwa wa, Lɨmbɛngɨ Lotu atɨka ndɨ Yeso ka ɨsa, kyɛ Mumuyoniso akɨngɨlagɨ. 2 Kumbuso Yeso koginyo malɨlɨ kʉsɔ wa masyɛ batɛkɛbɛ bakwanganya, bhiti na lɨsyɛ, ɨmʉkana ndɨ nza. 3 Mumuyoniso akpudoku kʉwa ndɨ kakɨngɨlaga, abɨkya bɛ : « Kiko nɨ wa Miko Kunzi, kpamya matamʉ mi nɨma ɨɨtɨ mukati. » 4 Yeso asikisyo ndɨ bɛ : « Ikpikogo bɛ : ‹ Ɔbɨlɨ ka mʉmbanzʉ kɛgʉ asɨ ko bhulyo mukati aka. Luki limoti, ɔbɨlɨ kakɨ a ka lɨkpʉmʉka lasɨ nɨlɔ akopupo ka mʉnɔkʉ ko Kunzi\f + \fr 4:4 Buk 8:3 .› » 5 Kumbuso yi, Mumuyoniso aga ndɨ na ɨyɨ ka gʉdʉ wotu, nɨnɔ wa Yelusalɛma. Amomoso ndɨ kugbondo nɨnɔ mʉkʉngʉ kʉgbɛ ka ndabʉ ko Kunzi. 6 Abɨkya bata ndɨ bɛ : « Kiko nɨ wa Miko Kunzi, bhumbuko wasɨ. Kyɛ ikpikogo bɛ : «
‹ Kunzi ʉkpamɨlyatʉ bamalaika kakɨ
bɛ bʉbhɨnɨkɨ,
kyɛ wakosokogoni ka lɨtalʉa.› »
7 Yeso asikisyo ndɨ bɛ : « Ikpikogotʉ gɔnɨ bɛ : ‹ Wakakingilogonitɔgʉ Kunzi Mombukwono dhakʉ \f + \fr 4:7 Buk 6:16 .› » 8 Mumuyoniso ɨnda ndɨ bata na Yeso kʉgʉ wa ngʉpa nɨyɔ yɨkʉngʉ kʉgbɛ. Kʉ bɛyɔ, awoniso ndɨ bʉngama basɨ ba ɔbɨlɨ na lɨngama li. 9 Abɨkya kʉwa ndɨ bɛ : « Nʉpátʉ nɨmana masɨ, kiko nɨ webunilyini moli na kebhibhiso. »
10 Luki limoti, Yeso asikisyo ndɨ bɛ : « Mumuyoniso ! Tʉkya ! Kyɛ ikpikogo bɛ : ‹ Wiko wanabhibhisogo Kunzi Mombukwono dhakʉ aka. Na ɨyɨ aka mʉkaka nɔ wiko wanagugubyo\f + \fr 4:10 Buk 6:13 . › »
11 Ka mulibo, mumuyoniso asa ndɨ. Bamalaika bakpudoku kʉwa ndɨ Yeso, bapʉnga kagugubyo.
Yeso opungini ligubho lo Mongoni Manza ka Galilaya
12 Ngbingo yi nɨnɔ Yeso ʉkana ndɨ mino bɛ badikitini Yuani ka ligbito, atʉkya ndɨ wa, ɨnda ndɨ ɨyɨ ka Galilaya. 13 Kʉ bɛyɔ, atʉkya ndɨ ka Nazalɛti, ɨnda ndɨ kaiko ka gʉdʉ wa Kapɛlɛnaʉmʉ, ka mutili ma ibhombu ya Galilaya, ka iwili ya Zabhuloni na nɨyɔ ya Nafutali. 14 Nɨyɔ yasɨ igyonoso ndɨ bɛyɔ, kyɛ ɨtʉlyanɨ mʉnzɨna nɨmɔ Mombukwono dhosu abɨkya ndɨ pisi ka mugyalandʉ Isaya bɛ :
15 « Mugi ma Zabhuloni na ma Nafutali,
a ko pisi nɨyɔ ɨndaga ka ibhombu, kʉsyakʉ miso ya ɨngɛngɛ yo libo la Yɔlɔdhanɨ.
Ka iwili ya Galilaya, mugi ka batʉ nɨbɔ bakɛgʉ Bayudha.
16 Batʉ nɨbɔ ɔbɨlɨ kabʉ a ndɨ kʉsɔ wo bhiti,
binini bʉngbanganya,
na nɨbɔ ba ndɨ bakidukufo bigubu ka kululuko kwa kukwakʉ,
bʉngbanganya upupilyini !
17 Katʉkya ko ngbingo yi nɨnɔ aka nɔ, Yeso apʉnga ndɨ kaʉbɨkyaga bambanzʉ Mongoni Manza bɛ : « Wosoni lɨngʉnʉ bʉnyɛ kunu, kyɛ bʉngama ba kʉgʉ wa lɨsyɛ a kʉwa buwobhi. »
Yeso umokini babɨbya bakwanganya ba mambwa
18 Ngbingo yi nɨnɔ Yeso a ndɨ mino kakpakyana ka mutili ma ibhomu ya Galilaya, ʉmɨna ndɨ banyɔ bosi baba. Banyɔ bosi bi nɨbɔ ba ndɨ bomika mʉlʉkʉ. A ndɨ nɨ Simoni nɨnɔ bamakaga ndɨ gɔnɨ bɛ Pɛtɛlɛ sɛ kʉwa mamakɨ bɛyɔ ka Andɨlɨya. Ɨbʉ basɨ baba ba ndɨ kolubho moyo.
19 Yeso ʉbɨkya ndɨ bɛ : « Ibyeniku ! Na ɨmɨ, namuitiso banʉ banyɔ bambanzʉ. » 20 Wa aka wa, basa ndɨ moyo kabʉ, babyɛ ndɨ.
21 Ngbingo yi nɨnɔ Yeso isisilo ndɨ mino kambwa yɨkɛdɛ, ʉmɨna ndɨ bata bomika mʉlʉkʉ bagɔgɔ baba. A ndɨ nɨ Yakɔbɔ na mamakɨ bɛyɔ ka Yuani. Ɨbʉ basɨ baba ba ndɨ kʉsɔ wa ɨngbɔlɔ yidhingi pa imoti na abhabʉ bɛyɔ ka Zɛbhɛdhayɔ banobungusyogo moyo kabʉ. Yeso ʉmaka ndɨ. 22 Wa aka wa, basa ndɨ ɨngbɔlɔ yidhingi, basa abhabʉ, babyɛ ndɨ Yeso.
Yeso akaʉtɨwa bambanzʉ na koukuso bokolobu
23 Yeso ɨnda ndɨ kolingyo giyo yasɨ ya Galilaya. Anatɨwa kʉsɔ wa bandabʉ ba ya likungoni ka Bayudha. Anʉbɨkyaga bambanzʉ Mongoni Manza ma bʉngama ba kʉgʉ wa lɨsyɛ. Anoukuso bokolobu bayasɨ na bʉpɔ dhidhidhi ba ya nzʉyɨ.
24 Mongoni kʉgʉ kakɨ ɨtʉlyana ndɨ ko giyo yasɨ ya Sulia. Mongoni mi nɨmɔ, ʉkpamya ndɨ bambanzʉ kadhulyoku na batʉ basɨ ba mobhi ma bokolobu na bʉpɔ dhidhidhi ba ya nzʉyɨ. Lugo kabʉ, a ndɨ na nɨbɔ ba ndɨ kaɨmʉkana kʉgbɛ, nɨbɔ ba ndɨ na malɨmba, nɨbɔ ba ndɨ na lɨga na nɨbɔ ba ndɨ bazɛgɛsɨ. Yeso uukuso ndɨ ɨbʉ basɨ. 25 Bambaza ka bambanzʉ budhingi kʉgbɛ ba kʉwa ndɨ kabɨbya bingbooo. Botukyogoku ndɨ ka iwili ya Galilaya, ka mugi ma Bagʉdʉ Tɛkɛbɛ, ka Yelusalɛma, ka Yudhɛa, na kʉsyakʉ wa ɨngɛngɛ yo libo lidhingi la Yɔlɔdhanɨ.