Danyel
Kata-Kata Partama
Kitab Danyel ni carita soal apa yang jadi par Danyel deng dia pung tamang tiga. Dong dapa bawa deng paksa ka Babel abis Raja Nebukatnesar kasi kala karajaang Yehuda, mangkali taong 605 WYBL (Danyel 1:1, 6). Di sana, dong dapa angka jadi pegawe tinggi la Danyel sandiri karja par babarapa raja. Dia sandiri yang tulis buku ni (Danyel 9:2, 10:2, 12:4), mangkali taong 536-530 WYBL.
Kitab Danyel ni dapa tulis par kasi kuat Allah pung orang-orang biar dong seng ilang harap deng bisa tetap parcaya Allah biar kata dong ada dalang susa deng sangsara, tagal Antua yang pegang parenta par manusia pung hidop ka samua bangsa.
Anam pasal partama (1-6) carita soal Danyel deng dia pung tamang tiga yang dapa bawa deng paksa ka Babel. Di sana, dong dapa angka jadi bapa raja pung pegawe istana. Mar, dong jua dapa biking susa, dapa lapor, deng dapa hukum, mala dia pung tamang tiga tu dapa kasi maso dalang tungku api la dia sandiri dapa kasi maso dalang singa pung goa. Anam pasal sisa (7-12) carita soal mimpi deng tanda yang Allah kasi par Danyel. Antua larang Danyel par kasi tau orang-orang soal tanda-tanda tu sampe akang pung waktu. Tanda-tanda tu bicara soal orang Yahudi yang nanti dapa parenta dari bangsa-bangsa laeng. Mar laste-laste, Tuhan nanti kasi bebas dong la biking Antua pung karajaang yang beda dari samua karajaang. Akang ada tarus-tarus (Danyel 2:44).
Kitab Danyel pasal 1:1-2:3 deng pasal 8:1-12:13 dapa tulis dalang bahasa Ibrani. Bahasa ni orang Yahudi pung bahasa. Mar, pasal 2:4-7:28 dapa tulis dalang bahasa Aram. Bahasa ni orang Babel pung bahasa.
Kitab ni tabage par dua bagiang basar:
Pasal 1-6: Danyel deng dia pung tamang tiga
1:1-21 Danyel deng dia pung tamang tiga orang dapa pili par karja di Raja Nebukatnesar pung istana
2:1-13 Raja Nebukatnesar pung mimpi satu
2:14-23 Allah kasi tau Raja Nebukatnesar pung mimpi lapis deng akang pung arti par Danyel
2:24-45 Danyel kasi tau Raja Nebukatnesar pung mimpi lapis deng akang pung arti
2:46-49 Raja Nebukatnesar mangaku Allah yang Danyel somba pung kuasa
3:1-7 Raja Nebukatnesar pung parenta par somba patong mas
3:8-18 Sadrak, Mesak, deng Abetnego seng iko raja pung parenta
3:19-25 Sadrak, Mesak, deng Abetnego dapa hukum
3:26-30 Raja Nebukatnesar taru hormat par Sadrak, Mesak, deng Abetnego
4:1-18 Raja Nebukatnesar pung mimpi kadua
4:19-33 Danyel kasi tau raja pung mimpi pung arti
4:34-37 Raja Nebukatnesar puji-puji Tuhan
5:1-12 Tulisang di dinding
5:13-30 Danyel kasi tau tulisang di dinding pung arti
6:1-29 Danyel dalang singa pung goa
Pasal 7-12: Mimpi deng tanda yang Allah kasi par Danyel
7:1-8 Allah kasi lia binatang ampa ekor par Danyel
7:9-14 Danyel dapa tanda soal Satu Orang yang hidop tarus-tarus
7:15-28 Danyel pung mimpi pung arti
8:1-14 Danyel pung mimpi kadua soal domba laki-laki deng kambing laki-laki
8:15-27 Malekat Gabriel kasi tau Danyel pung mimpi pung arti
9:1-19 Danyel pung sombayang par dia pung orang-orang
9:20-27 Malekat Gabriel kasi tau soal tuju pulu kali tuju taong pung arti
10:1-11:1 Danyel dapa lia tanda dari Allah di pinggir Aer Tigris
11:2-20 Karajaang Mesir deng Karajaang Siria
11:21-45 Raja dari utara yang jahat
12:1-13 Waktu dunya mau kiamat