Danyel pung sombayang par dia pung orang-orang
9:1-19
9
1-2 Satu kali bagini, pas taong partama waktu Raja Darius dari Media,a yang pung bapa nama Ahasweros tu pegang parenta di Babel, beta Danyel baca Allah pung Tulisang yang Antua pung Juru Bicara Yeremia tulis. Dari tulisang tu beta baru dapa mangarti kalo kota Yerusalem nanti pasti ancor dalang tuju pulu taong.* 3 Tarus, beta puasa, pake baju dari kaeng busu-busu, deng dudu baslep di abu. Beta tangada muka ka langit la sombayang minta deng sunggu-sunggu dari Tuhan Allah par kasi unju Antua pung hati bae. 4 Beta sombayang par Tuhan Allah yang beta somba, la mangaku beta deng beta pung orang-orang pung dosa-dosa. Beta bilang,“Sio Tuhan e! Tuhan tu Allah yang basar deng hebat, yang salalu biking Tuhan pung janji, deng yang salalu kasi unju Tuhan pung sayang yang seng abis-abis par orang-orang yang sayang Tuhan deng yang iko Tuhan pung parenta-parenta. 5 Tuhan e, katong ni su paleng bardosa, su paleng jahat, deng su biking sala paleng banya. Katong su malawang deng su seng iko Tuhan pung parenta-parenta deng atorang-atorang. 6 Katong seng dengar-dengarang Tuhan pung juru-juru bicara. Dong tu, Tuhan pung orang suru-suru. Dong su bilang Tuhan pung pasang ulang-ulang par katong pung raja-raja, katong pung pamimping-pamimping, katong pung tete-nene moyang, deng par samua anana negri, mar katong seng mau dengar.
7 Sio Tuhan e! Apa yang Tuhan biking salalu batul deng seng barat sabala. Mar, katong orang-orang Israel yang tinggal di Yehuda, di Yerusalem, deng samua orang Israel yang Tuhan su kasi talamburang di negri-negri yang jau ka dekat, katong su biking malu katong pung diri sandiri tagal katong su bardosa la bale balakang dari Tuhan. 8 Sio Tuhan e! Katong deng katong pung raja-raja, pamimping-pamimping, deng katong pung tete-nene moyang su biking malu katong pung diri sandiri tagal katong su biking dosa par Tuhan.
9 Sio Tuhan Allah yang katong somba e! Tuhan paleng bae paskali deng salalu kasi ampong katong pung dosa biar kata katong su malawang Tuhan. 10 Katong seng dengar-dengarang Tuhan Allah yang katong somba pung atorang-atorang yang Tuhan pung juru-juru bicara su bilang. 11 Mala, katong orang Israel samua su langgar Tuhan pung atorang-atorang, su bale balakang dari Tuhan, deng seng mau dengar-dengarang Tuhan. Katong su bardosa par Tuhan. Tagal itu, katong su dapa hukum macang deng apa yang Tuhan pung Kitab Torat yang Musa su tulis tu bilang. 12 Tuhan biking pas-pas macang deng apa yang Tuhan su bilang par katong deng katong pung pamimping-pamimping. Tuhan su hukum kota Yerusalem labe karas lai dari tampa laeng di dunya. 13 Katong dapa hukum deng sagala macang hukumang, macang deng apa yang tatulis dalang Kitab Torat yang Musa su tulis tu. Mar, katong tetap seng mau minta biar Tuhan Allah yang katong somba kasi unju Tuhan pung hati bae par katong. Katong tetap seng mau kasi tinggal katong pung dosa-dosa deng seng mau taru kira Tuhan pung ajarang-ajarang. 14 Tagal itu, Tuhan su tunggu waktu yang pas par hukum katong. Samua tu jadi tagal Tuhan Allah yang katong somba tu salalu biking apa yang batul deng seng barat sabala. Mar, katong seng mau dengar-dengarang Tuhan.
15 Sio Tuhan Allah yang katong somba e! Tuhan su kasi unju Tuhan pung kuasa waktu Tuhan bawa Tuhan pung orang-orang kaluar dari negri Mesir. Katong masi inga akang sampe sakarang, mar katong su biking dosa deng biking sala tarus. 16 Sio Tuhan e! Dari dolo Tuhan salalu tolong katong. Tagal itu, jang morka deng mara Yerusalem lai. Itu tu Tuhan pung kota deng Tuhan pung gunung yang kudus.b Tagal katong pung dosa deng tagal katong pung tete-nene moyang pung sala, samua bangsa yang tinggal di pinggir-pinggir katong lia Yerusalem deng Tuhan pung orang-orang ni deng mata sabala. 17 Tagal itu, sio Tuhan Allah yang katong somba e, tolong dengar apa yang beta minta deng tolong jawab Tuhan pung orang suru-suru ni pung sombayang jua. Biking bae Tuhan pung Tampa Sombayang Pusat yang su ancor tu jua, biar samua orang tau kalo Tuhan tu Allah. 18 Sio Tuhan Allah e, pasang talingang la dengar katong pung sombayang jua. Buka mata la lia katong pung sangsara ni. Taru kira Tuhan pung kota yang su ancor tu jua. Katong sombayang macang bagini bukang tagal katong su biking apapa yang batul, mar tagal Tuhan pung hati bae yang seng abis-abis tu.
19 Sio Tuhan e, dengar katong pung sombayang jua. Sio Tuhan e, ampong katong pung dosa-dosa jua. Sio Tuhan e, lia deng tolong katong jua. Jang tunggu lama-lama lai sio Tuhan e, biar samua orang tau kalo Tuhan tu Allah. Barang, katong su dapa pili dari Tuhan par jadi Tuhan pung orang-orang deng kota tu jua su dapa pili dari Tuhan par jadi Tuhan pung kota.”
Malekat Gabriel kasi tau soal tuju pulu kali tuju taong pung arti
9:20-27
20 Beta sombayang deng mangaku beta pung dosa deng katong orang-orang Israel pung dosa. Beta minta biar Tuhan Allah yang katong somba tu biking bae orang Yahudi pung Tampa Sombayang Pusat di atas Antua pung gunung yang kudus tu. 21 Waktu beta ada sombayang, skrek bagini beta lia Gabriel kombali. Dia tu laki-laki yang beta su parna lia dalang beta pung mimpi yang Tuhan kasi unju kamuka tu.* Dia tarbang datang par beta deng capat. Waktu itu tu waktu par orang kasi korbang sore par Allah.* 22 Tarus, dia kasi tau par beta bagini, “Danyel e! Beta datang sakarang ni par tolong ale biar ale bisa mangarti apa yang nanti jadi. 23 Waktu ale mulai sombayang minta tolong dari Tuhan, Antua su jawab ale. Beta datang par kasi tau akang tagal Antua paleng sayang ale. Jadi, pasang talingang la dengar bae-bae! Beta mau bilang Allah pung pasang biar ale bisa mangarti apa yang Antua su kasi unju.* 24 Tuju pulu kali tuju taong, itu tu waktu yang Allah su putus par kasi bebas ale pung orang-orang deng ale pung kota yang kudus tu dari dosa deng kajahatang. Antua nanti tabus manusia pung sala. Antua nanti biking sampe samua yang batul tu ada tarus-tarus. Antua nanti biking sampe apa yang Antua pung juru-juru bicara lia deng bilang tu jadi deng sampe Tampa Sombayang Pusat tu su jadi kudus kombali. 25 Jadi, ale musti tau deng mangarti apa yang beta mau bilang ni. Dari waktu parenta par kasi badiri Yerusalem kombali tu kaluar sampe pamimping satu yang Allah su pili tu datang, itu ada tuju kali tuju taong. La dalang anam pulu dua kali tuju taong, Yerusalem pung jalang-jalang deng tembok-tembok kota nanti dapa biking lai kombali, mar dalang susa deng sangsara.c 26 Abis anam pulu dua kali tuju taong tu lewat, pamimping satu yang Allah su pili tu nanti dapa bunu, biar kata dia seng pung apapa.d Tarus, raja satu yang kuat nanti datang deng dia pung tantara la kasi ancor kota Yerusalem lapis deng Tampa Sombayang Pusat. Mar, kiamat tu nanti datang bawa parang deng kasi ancor apa sa, macang deng hener basar yang orang seng sangka-sangka. Akang jadi pas deng apa yang Allah su putus. 27 Raja tu nanti ika janji yang kuat deng banya orang dalang satu kali tuju taong. Mar, di tenga-tenga satu kali tuju taong tu, dia nanti larang orang-orang par seng bole bawa binatang deng hasil kabong par jadi korbang par Allah. Tarus, dia jua nanti taru apapa satu yang paleng seng bae paskalie deng yang biking orang paleng sangsara, di dalang Tampa Sombayang Pusat.* Akang ada di situ tarus sampe Tuhan kasi ancor dia yang taru akang di situ, macang deng apa yang Tuhan su putus.”