Yunus i

Yunus

Kata-Kata Partama

Kitab Yunus ni carita soal TUHAN pung parenta par Yunus. Yunus ni Allah pung juru bicara yang asal dari negara Israel Utara.

Waktu Yunus hidop, orang Israel paleng baku musu paskali deng orang Asyur. Orang Asyur pung ibu kota par kota basar Niniwe. Orang Niniwe tu jua paleng kajahatang. Jadi, Yunus dapa suru dari TUHAN par pi tagor orang-orang Niniwe biar dong kasi tinggal dong pung dosa samua. Kalo seng, Antua nanti hukum dong. Tagal orang Asyur tu orang Israel pung musu basar deng tagal dong tu paleng kajahatang, Yunus paleng binci dong. Jadi dia seng mau iko TUHAN pung parenta par pi ka Niniwe. Dia mala pi ka kota Tarsis par lari jau dari TUHAN. Dia biking bagitu tagal dia seng mau orang Niniwe kasi tinggal dong pung kajahatang samua biar TUHAN bisa hukum dong.

Kitab Yunus ni mau ajar katong soal TUHAN Allah pung sayang par manusia samua, biar kata dong tu jahat macang orang Niniwe lai. Antua tu Allah yang seng lia-lia muka. Antua sayang orang Israel bagitu lai deng orang yang bukang Israel.

 

Kitab Yunus tabage par babarapa bagiang:

1. Pasal 1:1-17 carita soal Yunus dapa utus dari TUHAN par pi ka kota Niniwe, mar dia lari jau dari Tuhan

2. Pasal 2:1-10 carita soal Yunus pung sombayang waktu dia ada dalang ikang pung poro

3. Pasal 3:1-10 carita soal Yunus pung pasang par orang-orang Niniwe deng bagemana dong kasi tinggal dong pung dosa-dosa

4. Pasal 4:1-11 carita soal Yunus yang hati panas paskali tagal TUHAN seng jadi hukum orang Niniwe lai. Abis itu, TUHAN Allah kasi tumbu pohong satu par ajar Yunus par sayang samua orang.

 

Tuhan pung nama di kitab Yunus:

Bahasa yang orang pake par tulis kitab Yunus tu bahasa Ibrani. Dalang bahasa Ibrani ni, orang Israel jaga pake nama-nama yang beda-beda par bilang Tuhan pung nama. Di bawa ni ada daftar Tuhan pung nama-nama yang ada di kitab Yunus dalang bahasa Ibrani, Indonesia deng Malayu Ambon.

 

Bahasa Ibrani	Bahasa Indonesia	Bahasa Malayu Ambon
ְהוָה֙ yhwh, yahweh, yehowah	TUHAN	TUHAN (Yunus 1:10)
אֱלֹהִ֖ים ʾĕlōhîm	Allah	Allah (Yunus 3:8)
ְהוָ֞ה אֱלֹהֵ֤י ʾĕlōhê yhwh	TUHAN Allah	TUHAN Allah (Yunus 4:6)
ֵֽל־ ʾēl-	Allah	Allah (Yunus 4:2)