Yunus mara tagal TUHAN seng hukum orang Niniwe
4:1-11
4
1 Waktu TUHAN seng jadi hukum orang-orang di kota Niniwe, Yunus paleng seng sanang la dia pung hati jadi panas paskali. 2 Tarus, dia barsungut kata, “TUHAN e! Waktu beta masi ada di beta pung negri, beta tau kalo TUHAN pasti kasi salamat orang-orang di Niniwe. Barang, TUHAN tu Allah yang paleng bae deng paleng sayang manusia. TUHAN jua paleng sabar deng seng parna barenti kasi unju TUHAN pung sayang par orang-orang. Beta tau lai kalo waktu orang-orang kasi tinggal dong pung dosa-dosa, TUHAN nanti kasiang dong la TUHAN seng jadi hukum dong. Biar kata TUHAN su ator par mau bunu dong lai, mar akang seng jadi. Tagal itu, beta lari ka kota Tarsis. 3 Jadi TUHAN e, labe bae beta mati jua. Beta su seng mau hidop lai.”4 Mar TUHAN bilang kata, “Kanapa ale musti mara? Ale tu seng ada alasang par mara!”
5 Yunus pi kasi tinggal kota tu la pi ka sabala matahari nai. Di situ, dia biking walang satu par dudu lia apa yang nanti jadi di kota tu. 6 Tarus, TUHAN Allah kasi tumbu pohong satu yang akang pung daong paleng sarat. Pohong tu batumbu langgar dia pung kapala. Akang biking sombar sampe dia pung kapala seng kana panas la dia rasa sajo sadiki. Tagal itu tu, dia pung hati paleng sanang.
7 Mar akang pung eso bagini, parsis matahari nai, Allah suru mai-mai saekor makang pohong tu sampe akang layu. 8 Waktu matahari su tinggi, Antua biking anging yang panas batiop dari sabala matahari nai. Matahari pung panas tikang Yunus pung kapala sampe dia mau smaput. Dia mau mati sa, jadi dia bilang par Antua kata, “TUHAN e, labe bae beta mati sa. Beta su seng mau hidop lai.”
9 Mar Allah bilang par Yunus kata, “Kanapa ale musti mara tagal pohong tu mati? Ale tu seng ada alasang par mara!”
La Yunus bilang, “Kanapa kong beta seng bisa mara? Beta mara sampe mau mati sa.”
10 Mar TUHAN bale bilang kata, “Hoe Yunus e! Ale pung hati sa susa deng apa yang jadi deng pohong ni, padahal ale seng tanang deng kalesang akang. Akang batumbu la mati dalang satu malang sa. 11 Apalai Beta! Niniwe tu kota basar yang akang pung rayat labe dari 120 ribu orang deng dong pung binatang piara yang banya tu. Dong tu seng tau apa yang bae deng apa yang jahat. Masa Beta seng kasiang deng dong bagemana?”