Yunus iko TUHAN pung parenta
3:1-10
3
1-2 TUHAN bale suru Yunus yang kadua kali. Antua bilang par dia kata, “Sakarang ale pi ka kota basar Niniwe tu. Sampe di sana bilang par orang-orang Niniwe soal apa yang Beta bilang par ale.”3 Tarus, Yunus iko apa yang TUHAN suru. Dia pi ka Niniwe.
Niniwe tu kota satu yang paleng basar. Orang musti bajalang tiga hari baru bisa sampe ka ujung kota.
4 Waktu Yunus sampe, dia bajalang satu hari dalang kota tu. Abis itu, dia mulai tabaos par dong kata, “Hoe, orang-orang Niniwe e! Ampa pulu hari lai, TUHAN nanti kasi ancor kamong deng kamong pung kota ni.”
5 Pas orang-orang Niniwe dengar Allah pung pasang yang Yunus bilang tu, dong parcaya akang. Tarus, dong laeng bilang par laeng kata, “Katong musti puasa.”
La dong samua, kacil-basar, salele kaeng busu-busu par jadi tanda kalo dong su manyasal la kasi tinggal dong pung dosa-dosa.
6 Waktu Raja Niniwe dengar kalo ampa pulu hari lai, TUHAN nanti kasi ancor Niniwe, antua turung dari antua pung kadera raja. Tarus, antua buka antua pung baju raja, salele kaeng busu-busu, la baslep dalang abu.
7 Tarus, antua deng antua pung saniri negri kasi kaluar parenta. La dong suru marinyo tabaos kata, “Orang-orang Niniwe, pasang talingang la dengar bae-bae! Kamong deng kamong pung binatang piara seng bole paskali par makang deng minong. 8 Kamong deng kamong pung binatang piara musti salele kaeng busu-busu lai. Tarus, kamong samua musti sombayang sunggu-sunggu par Allah minta Antua jang hukum katong. Kamong jua musti kasi tinggal kamong pung kajahatang deng jang tindis orang laeng. 9 Kalo katong biking bagitu, mangkali Antua kasiang katong la Antua seng mara deng seng bunu katong lai.”
10 Waktu Allah lia orang Niniwe samua su kasi tinggal dong pung dosa-dosa, Antua kasiang dong la seng jadi hukum dong lai.