Yunus pung sombayang
2:1-10
2
1 Waktu Yunus ada dalang ikang basar tu pung poro, dia sombayang par TUHAN, Allah yang dia somba. Dia sombayang bagini,2 “Waktu beta susa deng sangsara,
beta basaro, ‘Sio TUHAN tolong beta!’
Tarus, TUHAN jawab beta.
Waktu beta mau mati,
beta bataria, ‘TUHAN e! Tolong beta jua!’
Tarus, TUHAN dengar beta.
3 Sampe ka dasar lautang,
TUHAN su buang beta.
TUHAN biking aros putar, galombang hantam.
Beta tinggalang.
4 Dalang hati beta bilang,
‘Sio, TUHAN su user beta jau dari Antua.
Satu waktu, beta nanti lia TUHAN pung tampa tinggal
yang orang jaga sombayang par Antua kombali.’a
5 Aer nai tarus sampe di beta pung batang idong.
Beta tacolo ka dalang.
Rumpu lao su bale beta pung kapala.
6 Sampe di panta gunung di dasar lautang, beta tinggalang.
Takurung tarus!
Seng ada jalang kaluar, macang beta ada di dalang kubur.
Mar beta seng mati.
TUHAN, Allah yang beta somba, kasi salamat beta.
7 Waktu beta su amper putus napas,
beta inga TUHAN.
Beta sombayang,
la TUHAN yang ada di Antua pung tampa tinggal dengar beta.
8 Orang-orang somba dewa yang seng bisa tolong dong.
Dong seng mau tarima TUHAN pung sayang.
9 Mar beta nanti badonci deng badendang puji TUHAN
waktu beta kasi korbang binatang par TUHAN.
Beta nanti biking apa yang beta su janji.
Cuma TUHAN sa yang bisa kasi salamat beta. Amin.”
10 Abis Yunus sombayang, TUHAN suru ikang basar munta Yunus ka pinggir pante. Ikang tu biking iko apa yang TUHAN suru.