Yunus
Yunus seng iko TUHAN pung mau
1:1-17
1
1 Dolo-dolo to, ada satu orang nama Yunus. Dia ni orang Israel.* Dia pung bapa nama Amitai.Satu kali bagini, TUHAN bicara par dia kata, 2 “Yunus e! Sakarang ale pi ka kota basar Niniwe. Ale pi ka sana la tagor orang-orang Niniwe kalo Beta su tau dong tu paleng kajahatang. Jadi Beta nanti hukum dong.”
3 Mar Yunus seng mau pi ka Niniwe. Dia mau pi ka kota Tarsis par lari jau dari TUHAN. Jadi, dia pi ka kota Yapo par cari kapal yang mau balayar ka Tarsis. Sampe di Yapo, dia bayar pasasi kapal. Tarus, dia nai ka kapal tu la balayar deng anana bua kapal. Dia balayar ka Tarsis par sambunyi diri dari TUHAN.
4-5 Waktu kapal ada balayar bagini, Yunus pi guling-guling di dek paleng bawa la dapa tidor sono. Skrek bagini, TUHAN biking anging deng omba basar di lautang. Akang hantam kapal tu sampe mau ancor-ancor. Jadi, anana bua kapal takotang paskali. Tarus, satu-satu dari dong bataria par dong pung dewa-dewa biar dong salamat. Dong jua buang kapal pung muatang ka lautang biar kapal tu haringang.
6 Waktu juru mudi turung ka dek paleng bawa, dia dapa Yunus ada tidor sono. Tarus dia bilang kata, “Hoe, se sadap e! Se tinggal tidor padahal katong su mau mati ni. Bangong la sombayang par se pung dewa. Mangkali se pung dewa tu kasiang par katong la katong ni salamat!”
7 Abis itu, Yunus deng juru mudi tu nai ka dek atas. Sampe di atas, anana bua kapal dong baku bicara. Dong laeng bilang par laeng kata, “Labe bae katong buang undi biar katong tau sapa yang sala sampe katong dapa cilaka bagini.”
Waktu dong buang undi, Yunus pung nama yang kaluar. 8 Tarus, dong tanya Yunus kata, “Se ni sapa la? Se ni karja apa? Se ni asal dari mana? Coba se kasi tau par katong do, sapa pung salawar sampe katong bisa cilaka macang bagini?”
9 Tarus Yunus bilang kata, “Beta ni orang Ibrani.a Beta somba TUHAN, Allah yang ada di sorga. Antua tu yang biking dunya ni deng akang pung isi samua.”
10 Abis itu, Yunus carita par dong kalo dia ni ada lari jau dari TUHAN.
Waktu dong dengar carita tu, dong takotang paskali. Tarus, dong bilang par dia kata, “Se su biking apa sakali ni?”
11 Waktu dong ada bicara, omba tamba basar tarus. Jadi dong bilang par Yunus kata, “Katong musti biking apa par se biar omba ni tado?”
12 Yunus bale bilang, “Beta su tau kalo beta ni yang salawar sampe anging deng omba basar hantam katong. Jadi, labe bae kamong angka buang beta ka lautang sa, biar omba ni, akang tado.”
13 Mar orang-orang kapal ni seng mau buang Yunus ka lautang. Jadi, dong tarus panggayo kapal tu biar dong sampe di dara. Mar dong seng kuat toma maju barang omba batamba basar.
14 Tarus, dong sombayang par TUHAN. Dong bilang, “TUHAN e! Ampong katong jua. Jang bunu katong kalo orang yang katong buang ka lautang ni seng sala. Barang, katong tau kalo TUHAN yang biking omba deng anging ni iko TUHAN pung mau.”
15 Abis sombayang, dong angka Yunus la buang dia ka lautang. Batul dong buang Yunus ka dalang lautang, oras itu jua, omba tu tado. 16 Waktu dong lia omba tu su tado, dong takotang paskali par TUHAN. Jadi, dong somba TUHAN deng kasi korbang binatang par Antua. Dong jua ika janji deng Antua.
17 Waktu dong buang Yunus, TUHAN suru ikang basar satu datang par talang dia. La dia tinggal di dalang ikang tu pung poro tiga hari tiga malang.