Waktu dunya mau kiamat
12:1-13
12
1 Dia yang pung rupa macang manusia* tu bilang lai kata, “Waktu samua tu jadi, malekat-malekat pung pamimping hebat yang nama Mikael tu nanti datang. Dia tu malekat yang jaga ale dong pung orang-orang. Waktu itu, orang-orang nanti paleng susa deng sangsara. Balong parna ada susa deng sangsara macang bagitu di dunya ni. Mar, dari ale pung orang-orang tu, sapa sa yang pung nama tatulis dalang Allah pung buku,a dia tu nanti salamat.* 2 Orang-orang banya yang su matib nanti hidop kombali. Saparu par hidop deng Allah tarus-tarus, mar saparu lai par dapa hina deng dapa biking malu tarus-tarus.* 3 Orang-orang yang pung pikirang tajang,c dong nanti mangkilap macang deng sinar tarang di langit. Dong yang kasi balajar orang-orang par biking apapa yang batul tu nanti mangkilap tarus-tarus macang deng bintang-bintang.”4 Mar, dia bilang lai kata, “Danyel e, jang bilang-bilang isi pasang ni. Tutu akang mati-mati sampe dunya mau kiamat. Orang banya nanti coba cari tau kasana-kamari soal apa yang nanti jadi, biar dong labe tamba mangarti.”*
5 Tarus, beta lia laki-laki dua laeng ada badiri di pinggir aer. Satu di sabala sini la satu lai di sabala sana. 6 Satu dari dong dua tu tanya laki-laki yang pake baju puti barsi dari kaeng lenan,* yang ada di atas aer tu kata, “Apa tempo kong susa deng sangsara yang luar biasa tu akang abis?”
7 La dia yang pake baju puti barsi dari kaeng lenan, yang ada di kapala aer tu, angka dia pung tangang dua-dua ka langit,* la beta dengar dia angka sumpa di muka Antua yang hidop tarus-tarus kata, “Samua tu nanti jadi tiga taong stenga tare-tare. Abis Allah pung orang-orang dapa siksa sampe dong seng kuat lai, baru samua tu klar.”*
8 Samua yang dia bilang tu beta dengar mar beta seng mangarti akang. Jadi beta tanya, “Bapa e, abis itu, apa yang nanti jadi lai?”
9 Antua bilang, “Danyel e, pi jua. Barang, pasang ni tatutu mati sampe dunya mau kiamat. 10 Banya orang nanti dapa uji sampe dong jadi batul-batul barsi, mar orang-orang jahat tinggal kong biking jahat tarus deng seng mangarti apa yang nanti jadi. Cuma orang-orang yang pung pikirang tajang sa yang mangarti.*
11 Orang-orang nanti dapa kasi korbang binatang yang dong musti kasi sabang hari par Allah. La apapa satu yang paleng seng bae paskali deng yang biking orang paleng sangsara nanti dapa taru di Tampa Sombayang Pusat. Mulai dari samua tu jadi sampe akang abis, ada 1.290 hari.* 12 Sapa yang batahang sampe hari ka 1.335 tu paleng untung.
13 Mar Danyel e, pi jua deng hati tado. Mar, ale nanti mati la hidop kombali par tarima ale pung bagiang waktu kiamat.”