11
1 Dolo, beta su tolong deng kasi kuat Mikael pas taong partama waktu Darius orang Media pegang parenta.”Karajaang Mesir deng karajaang Siria
11:2-20
2 Dia yang pung rupa macang manusia tu bilang lai kata, “Sakarang, beta mau bilang par ale apa yang batul-batul mau jadi. Nanti, ada tiga raja lai yang pegang parenta di karajaang Persia.a La abis itu, ada raja kaampa. Antua paleng kaya, labe dari raja-raja yang laeng. Nanti kalo antua rasa su paleng kuat deng apa yang antua pung, antua nanti stir raja-raja samua par lawang karajaang Yunani.b 3 Tarus, nanti muncul raja satu yang paleng kuat. Antua nanti pegang parenta deng antua pung kuasa yang basar deng nanti biking apa sa iko antua pung suka sandiri. 4 Mar, waktu antua su paleng kuat, antua pung karajaang tu nanti tapica la tacere ka ampa mata anging. La orang-orang yang bukang antua pung turunang nanti pegang parenta ganti antua.c Mar, dong seng kuat macang deng antua.
5 Raja Mesir dari salatang nanti jadi kuat. Mar, satu dari antua pung kapitang-kapitang nanti labe kuat dari antua.d Dia nanti pegang parenta deng kuasa yang labe basar dari antua. 6 Akang pung babarapa taong bagini, Raja Mesir dari salatang nanti ika janji deng Raja Siria dari utara biar dong seng baku prang lai, la kasi kaweng antua pung ana parampuang deng raja dari utara tu.e Mar, dong pung janji tu seng batahang lama. Antua pung ana parampuang tu nanti dapa bunu. Bagitu lai deng dia pung laki, ana, deng orang-orang suru-suru yang antar ana parampuang tu.
7 Mar seng lama abis itu, ana parampuang tu pung sudara satu nanti nai pegang parenta. Antua nanti serang raja dari utaraf tu pung tantara-tantara sampe maso dalang dong pung benteng la kasi kala dong. 8 Waktu antua bale ka Mesir, antua nanti bawa orang-orang Siria pung patong-patong dewa deng cawan-cawan yang mahal-mahal dari mas deng perak. La antua seng baku prang deng raja dari utara tu babarapa taong.
9 Abis itu, raja dari utara nanti pi serang raja dari salatang, mar antua nanti kala la pulang ka antua pung negri kombali. 10 Abis itu, antua pung anana kasi siap diri par parang. Dong kumpul tantara banya-banya, la satu dari dong nanti pi serang raja dari salatang macang deng hener basar sampe di antua pung benteng. 11 Jadi, raja dari salatang pung dara mandidi paskali la antua nanti maju parang lawang raja dari utarag pung tantara-tantara yang banya paskali tu la kasi kala dong. 12 Tarus, antua nanti kapala basar tagal su bunu dong paleng banya. Mar, antua nanti seng pegang parenta tarus-tarus. 13 Barang, raja dari utara tu nanti kumpul tantara-tantara labe banya dari yang kamuka. La babarapa taong abis itu, antua maju lawang raja dari salatang kombali. Antua maju sama-sama deng antua pung tantara banya-banya tu deng dong pung senjata-senjata mati nat.
14 Waktu itu jua banya orang nanti malawang raja dari salatang.h La orang-orang yang jahat dari ale pung bangsai jua nanti malawang raja dari salatang lai biar dong bisa biking sampe tanda dari Allah tu jadi. Mar dong nanti dapa kasi kala. 15 Tarus, raja dari utara nanti datang deng antua pung tantara-tantara la tutu kota bentengj la rampas akang. Tantara-tantara dari negri salatang nanti seng kuat tahang, mala yang paleng jago jua seng bisa biking apapa par malawang dong. 16 Raja dari utara nanti biking iko suka la seng ada yang bisa malawang antua. Antua nanti tinggal di Tana Yang Bagus deng pung kuasa par kasi ancor akang antero-antero. 17 Tarus, raja dari utara tu nanti putus par pi deng antua pung tantara-tantara samua ka negri salatang. Antua nanti ika janji deng kasi kaweng antua pung ana parampuang deng raja dari salatang tu.k Antua biking bagitu par kasi ancor negri salatang tu. Mar, antua pung rencana tu nanti seng jadi deng seng bawa untung.
18 Jadi, antua nanti bale haluang par pi serang bangsa-bangsa yang ada di pinggir-pinggir pante la kasi kala banya dari dong. Mar, ada kapitang satu dari negri laeng yang nanti kasi kala antua,l la paksa antua yang mangarti tu par bale deng malu. 19 Abis itu, antua nanti bale pulang ka kota-kota benteng di antua pung negri sandiri. Mar, antua dapa kasi kala la seng tau lai apa yang jadi deng antua.m
20 Nanti ada satu orang yang nai ganti antua jadi raja. Raja barun ni nanti parenta antua pung orang karja par ambe pajak deng paksa dari rayat, biar dia deng dia pung karajaang bisa tamba kaya. Mar seng lama abis antua biking bagitu, antua nanti dapa bunu tado-tado bukang dalang parang.”
Raja dari utara yang jahat
11:21-45
21 Dia yang pung rupa macang manusia tu bilang lai kata, “Nanti ada orang laeng yang nai ganti antua jadi raja. Orang tu paleng jahat deng seng pung hak par jadi raja.o Mar, dia nanti datang tado-tado la pake akal bulus par nai jadi raja. 22 Samua tantara yang malawang dia dapa sapu barsi. Mala Imam Basar jua dapa kasi ancor.p 23 Dia nanti ika janji deng bangsa-bangsa laeng, mar abis itu dia nanti langgar akang. Dia nanti tamba kuat, biar kata cuma sadiki orang sa yang dekeng dia. 24 La dia nanti pi serang daera-daera yang paleng subur waktu orang-orang yang tinggal di situ seng sangka-sangka deng ada rasa aman-aman sa. La dia nanti bage-bage barang-barang deng harta yang dia rampas di situ par orang-orang yang dekeng dia. Apa yang dia biking tu, dia pung tete-nene moyang balong parna biking. Dia jua nanti baku skongkol par pi serang kota-kota benteng. Mar, dia seng bisa biking bagitu tarus-tarus.
25 Dia nanti kumpul tantara banya-banya deng biking diri barani par pi serang raja dari salatang. La raja dari salatang deng antua pung tantara yang banya deng yang paleng jago tu nanti bale lawang dia. Mar, antua nanti seng kuat lawang dia tagal ada orang-orang yang baku skongkol par kasi jatu antua.q 26 Orang-orang yang paleng dekat deng antua nanti kasi jatu antua. Antua pung tantara-tantara nanti dapa sapu barsi deng banya yang dapa bunu dalang parang.
27 Tarus, dong dua raja tu nanti dudu makang sama-sama par satu meja makang deng pikirang jahat la nanti laeng parlente laeng. Mar, dong pung rencana-rencana tu seng ada satu lai yang jadi, tagal Allah su putus waktu par dong mar balong akang pung waktu. 28 Tarus, raja dari utara tu nanti bajalang pulang ka dia pung negri bawa barang-barang banya yang dia rampas waktu prang. Mar di tenga jalang, dia angka sumpa dalang hati par kasi ancor orang-orang yang somba Allahr la biking apa sa iko dia pung suka sandiri. Abis itu baru dia bajalang pulang ka dia pung negri.
29 Pas waktu yang Allah su ator, dia nanti pi serang negri salatang kombali. Mar kali ini seng sama deng kamuka. 30 Barang, orang-orang Kitims nanti datang deng dong pung kapal-kapal serang dia la dia takotang. Tarus, waktu bajalang pulang ka dia pung negri, dia putar haluang la deng jumawa kasi ancor orang-orang yang somba Allah.t Dia nanti kasi unju dia pung hati bae par sapa sa dari dong yang su bale balakang dari Allah.
31 Dia nanti kiring dia pung tantara-tantara par biking Tampa Sombayang Pusat yang dapa ron deng tembok yang kuat tu seng kudus lai. Dia nanti larang orang-orang par seng bole kasi korbang binatang yang dong musti kasi sabang hari par Allah. Tarus, dia jua nanti taru apapa satu yang paleng seng bae paskali deng yang biking orang paleng sangsara di Tampa Sombayang Pusat tu.u 32 La deng akal bulus, dia nanti buju orang-orang yang su bale balakang dari Allah tu par iko dia. Mar, orang-orang yang tetap iko Allah yang dong somba, dong nanti lawang dia abis-abis. 33 La dong pung pamimping-pamimping yang pung pikirang tajang nanti tolong orang banya par mangarti samua yang ada jadi. Mar par babarapa waktu nanti, dong yang pung pikirang tajang tu nanti sangsara. Ada yang dapa bunu dalang parang ka dapa bakar. La ada yang pung harta dapa rampas ka maso bui. 34 Waktu samua tu jadi, dong yang tetap iko Allah tu nanti dapa tolong sadiki. La banya orang yang seng sunggu-sunggu iko Allah nanti bagabung deng dong. 35 Babarapa dari dong pung pamimping-pamimping yang pung pikirang tajang tu nanti dapa bunu. Mar akang pung konci rekeng, dong samua bisa jadi batul-batul barsi tarus sampe dunya mau kiamat. Kiamat tu nanti jadi pas waktu yang Allah su ator.
36 Raja dari utara tu nanti biking apa sa iko dia pung suka sandiri. Dia nanti bicara mangarti kalo dia labe hebat dari dewa mana sa, mala labe hebat dari Allah yang Paleng Tinggi lai. Dia dapa los par biking bagitu sampe waktu par Allah hukum dia. Barang, apa yang Allah su putus tu pasti jadi.v 37 Dia nanti seng meku deng dewa-dewa yang dia pung tete-nene moyang dong somba ka dewa yang parampuang-parampuang dong somba.w Dia seng meku deng dong, tagal dia anggap dia pung diri tu labe hebat dari dewa-dewa samua tu. 38 Mala, dia nanti somba dewa yang jaga benteng-benteng.x Dia pung tete-nene moyang seng parna somba dewa yang macang bagitu. Mar dia, dia nanti kasi mas, perak, permata, deng barang-barang yang mahal-mahal par dewa tu.y 39 Dia nanti pili orang-orang yang somba dewa yang dong pung tete-nene moyang dong seng kanal tu par pi serang benteng-benteng yang paleng kuat paskali. Dia nanti biking sapa sa yang parcaya dewa tu jadi orang yang paleng dapa hormat.z Dia jua kasi pangkat yang tinggi par dong, biar dong bisa parenta banya orang deng bage-bage tana par balas apa yang dong su biking.
40 Waktu dia pung waktu su mau abis, raja dari salatang nanti datang serang raja dari utara tu.a Mar, dia nanti balas deng sunggu-sunggu. Dia nanti serang antua pake kareta parang, kuda, deng kapal-kapal. Dia pung tantara-tantara nanti datang serang banya negri la sapu negri-negri tu macang deng hener basar. 41 Dia jua nanti serang Tana Yang Bagus la bunu banya orang. Mar karajaang Edom, Moab, deng bagiang yang paleng panting dari karajaang Amon nanti salamat. 42 Waktu dia serang negri-negri tu, dia jua seng kasi los negri Mesir lai. 43 Dia nanti rampas negri Mesir pung harta dari mas, perak, deng barang-barang yang mahal-mahal. Dia jua nanti kasi kala karajaang Libia deng karajaang Etiopia.b 44 Mar, barita-barita dari sabala timur deng dari sabala utara nanti biking dia pung hati balisa. Tagal itu, deng jumawa paskali dia nanti pi kaluar par kasi ancor deng bunu banya orang. 45 La dia nanti pasang tenda raja di tenga-tenga Laut Tenga deng gunung yang kudus deng bagus. Mar, dia nanti mati baru seng satu orang lai yang tolong dia.”