Danyel dapa lia tanda dari Allah di pinggir aer Tigris
10:1-11:1
10
1 Pas taong katiga waktu Raja Kores pegang parenta di karajaang Persia,a beta Danyel yang orang jaga panggel par Beltsasar tu dapa pasang satu dari Allah. Pasang tu batul deng akang bicara soal parang basar satu.b Beta usaha par mangarti akang la Allah kasi unju akang pung arti par beta. 2 Waktu itu, beta pung hati su susa tiga minggu tare-tare. 3 Beta seng makang makanang yang sadap, seng makang daging, seng minong anggor, deng seng kalesang diri.4 Waktu itu tu hari kadua pulu ampa bulang partama.c Beta ada badiri di pinggir aer basar satu nama aer Tigris. 5 Pas beta angka muka, beta lia laki-laki satu pake baju puti barsi dari kaeng lenan deng pake rim dari mas asli. 6 Dia pung badang mangkilat macang deng permata la dia pung muka tarang macang deng kilat. Dia pung mata tarang paskali macang deng api yang manyala basar la dia pung tangang deng kaki macang deng tambaga yang su dapa goso sampe mangkilat. Kalo dia bicara, dia pung suara tu dengar macang deng orang banya ada bicara.*
7 Cuma beta sa yang dapa lia dia. Orang-orang yang ada sama-sama deng beta seng dapa lia apapa. Mar, dong takotang paskali sampe dong lari basambunyi, 8 tinggal beta sandiri. Waktu beta lia samua yang Allah ada kasi unju tu, beta pung kaki tangang lombo deng muka pucat paskali. Beta su seng kuat lai. 9 Tarus, waktu beta dengar dia pung suara, beta smaput la jatu deng muka di tana. 10 Mar, ada tangang yang sonto beta la kasi bangong beta sampe beta bisa batongka di beta pung lutu deng tangang. 11 La dia bilang kata, “Hoe Danyel! Hoe orang yang Allah paleng sayang e! Badiri la dengar apa yang beta mau bilang ni bae-bae! Beta datang par ale ni tagal Allah yang suru beta datang.”
Waktu dia bilang bagitu, beta badiri deng kaki gamatar.
12 Dia bilang lai, “Danyel, jang taku! Barang, Allah su dengar ale pung sombayang, mulai dari hari partama ale taru hati par anggap diri seng pung arti apapa di muka Allah yang ale somba tu, deng par mangarti apa yang Antua kasi unju tu. Sakarang ni, beta datang par bilang akang par ale. 13 Mar, malekatd yang jaga karajaang Persia tu lawang beta dua pulu satu hari tare-tare. Tarus, satu dari malekat-malekat pung pamimping-pamimping basar yang nama Mikael, dia datang tolong beta tagal beta tatahang di sana sama-sama deng malekat yang jaga orang-orang Persia tu.* 14 Jadi sakarang ni, beta datang par tolong ale biar ale bisa mangarti apa yang nanti jadi deng ale pung orang-orang eso lusa. Barang, apa yang Allah kasi unju tu bicara soal apa yang nanti jadi eso lusa.”
15 Waktu dia ada bilang soal itu, beta tundu muka deng seng bisa bicara. 16 Tarus, ada yang lunjur dia pung tangang la sonto beta pung bibir baru beta bisa bicara. Dia pung rupa macang deng manusia. Abis itu, beta bilang par dia yang badiri di muka beta tu kata, “Bapa e, samua yang Allah kasi unju ni biking beta pung hati susa paskali deng seng kuat lai. 17 Bagemana kong orang suru-suru ni bisa bicara deng bapa? Beta su seng kuat lai deng hela napas sa su susa.”
18 La dia yang pung rupa macang manusia tu bale sonto beta satu kali lai la kasi kuat beta. 19 Tarus dia bilang lai, “Hoe Danyel! Hoe orang yang Allah paleng sayang e! Jang taku deng balisa, mar musti kuat! Ale musti batul-batul kuat!”
Waktu dia ada bicara deng beta, beta rasa kuat kombali. La beta bilang kata, “Bapa! Apa yang bapa mau bilang, bilang sa, tagal bapa su kasi kuat beta.”
20-21 La dia bilang, “Ale tau mangapa kong beta datang par ale? Beta datang par bilang soal apa yang tatulis dalang Buku soal Apa yang Batul tu. Sasadiki lai beta musti bale par baku prang lawang malekat yang jaga orang-orang Persia tu. Abis itu, malekat yang jaga orang-orang Yunani nanti datang.* Seng ada satu lai yang tolong beta par lawang dong, cuma Mikael sa. Dia tu malekat yang jaga ale dong pung orang-orang.