Ester
Kata-Kata Partama
Kitab Ester ni kitab yang carita soal parampuang Yahudi satu yang jadi nyora raja dalang Karajaang Persia. Dia kasi salamat orang-orang Yahudi dari Haman pung rencana jahat par kasi binasa dong sama sakali.
Kitab Ester ni beda deng kitab-kitab laeng dalang Alkitab. Akang seng parna bicara soal Allah sadiki lai. Mar dari muka sampe laste, Antua pung kuasa kantara paskali.
Orang yang tulis kitab Ester ni mangkali orang Yahudi yang tinggal di Karajaang Persia, tagal dia tau parsis orang Persia pung atorang deng adat deng seng parna bicara soal Yehuda ka Yerusalem sadiki lai. Kitab Ester ni dapa tulis par kasi jelas soal hari basar Purim yang jatu pas bulang Adar. Kata ‘purim’ sandiri asal dari bahasa Babel ‘pur’ yang pung arti undi. Itu kasi unju soal undi yang Haman buang par cari waktu yang pas par bunu orang-orang Yahudi samua.
Carita dalang kitab Ester ni jadi di kota Susan. Dolo, kota tu satu dari kota panting di Karajaang Babel waktu Babel kasi kala Karajaang Elam. Mar, waktu Babel kala dari Persia, kota ni jadi Karajaang Persia pung ibu kota waktu musing dinging. Ada babarapa orang yang pintar Alkitab yang bilang kalo carita dalang kitab Ester ni jadi waktu Raja Ahasweros pegang parenta, kira-kira taong 486-465 Waktu Yesus Balong Lahir (WYBL).
Kitab ni tabage par babarapa bagiang:
1:1-9 Bapa Raja Ahasweros biking pesta basar
1:10-22 Nyora Wasti malawang Raja Ahasweros pung parenta
2:1-18 Ester dapa angka jadi nyora raja
2:19-23 Mordekai kasi salamat bapa raja
3:1-15 Haman pung rencana par bunu orang-orang Yahudi samua
4:1-17 Mordekai usaha par tolong orang-orang Yahudi samua
5:1-8 Ester biking pesta
5:9-14 Haman pung rencana par bunu Mordekai
6:1-14 Raja kasi tanda hormat par Mordekai
7:1-10 Haman mati
8:1-17 Bapa raja parenta orang Yahudi par lawang dong pung musu-musu
9:1-19 Orang-orang Yahudi bunu dong pung musu-musu
9:20-32 Soal hari basar Purim
10:1-3 Tanda hormat yang Mordekai dapa