Ester 8

Bapa raja parenta orang Yahudi par lawang dong pung musu-musu

8:1-17

1 Hari itu tu jua Bapa Raja Ahasweros kasi Haman, yang jadi orang Yahudi pung musu tu, pung harta samua-samua, lapis deng dia pung orang-orang karja samua par Ester. Ester kasi tau bapa raja kata Mordekai tu dia pung sudara. Jadi, bapa raja suru antua pung orang-orang karja par bawa Mordekai par datang baku dapa antua. 2 Abis itu, bapa raja cabu cincing yang antua biasa pake par cap surat-surat panting dari antua pung jare, yang antua su ambe dari Haman tu, la kasi akang par Mordekai. Tarus, Ester angka Mordekai par urus Haman pung harta samua.

3 Abis itu, Ester pi bicara deng bapa raja kombali. Dia tikang lutu ciong antua pung kaki la marata minta antua pung hati bae par kasi barenti Agak pung ana cucu yang nama Haman tu pung rencana jahat yang dia biking par orang Yahudi. 4 Bapa raja lunjur antua pung tongka mas tu par Ester. Tarus, Ester badiri la bilang kata, 5 “Sio bapa raja e! Kalo bapa rasa yang beta bilang ni bae deng kalo bapa pung hati bae par beta, tolong kasi kaluar surat parenta satu par cabu Haman pung surat parenta yang dia su tulis tu jua. Barang dalang surat tu, dia parenta orang-orang par bunu orang-orang Yahudi samua yang ada di samua propinsi dalang karajaang yang bapa raja parenta ni. 6 Sio bapa e, beta seng bisa tahang kalo lia beta pung orang-orang binasa. Beta seng kuat tahang kalo lia beta pung famili dong samua dapa bunu.”

7 Jadi, bapa raja bilang par Nyora Ester deng Mordekai, orang Yahudi tu kata, “Tagal Haman pung rencana par bunu orang-orang Yahudi samua, beta su suru orang cucu Haman deng tiang. Beta jua su kasi dia pung harta samua-samua, lapis deng dia pung orang-orang karja par Nyora Ester. 8 Sakarang, ale dong tulis apa sa yang ale dong pikir itu bae par orang-orang Yahudi. Tulis akang ganti beta pake beta pung kuasa la cap akang surat tu pake beta pung cincing. Barang, surat-surat yang dapa tulis pake beta pung nama deng yang dapa cap pake beta pung cincing seng bisa dapa cabu lai.”

9 Seng tunggu lama, hari itu jua, tanggal 23 bulang tiga yang orang biasa bilang akang par bulang Siwan, bapa raja pung juru-juru tulis dapa panggel la dong tulis samua yang Mordekai bilang par dong tulis. Surat tu dong tulis akang par orang Yahudi, par raja pung orang-orang karja yang pung pangkat tinggi, gubernur-gubernur, deng bupati-bupati di 127 propinsi, mulai dari India di sabala matahari nai sampe ka Etiopia di sabala matahari maso. Surat-surat tu dong tulis akang iko satu-satu daera pung bahasa deng cara tulis sandiri-sandiri. Bagitu lai par orang Yahudi, iko dong pung bahasa deng cara tulis sandiri. 10 Surat-surat tu dapa tulis pake raja pung nama. Abis itu, Mordekai cap akang pake raja pung cincing. Tarus, dia suru orang-orang par antar akang ka samua propinsi yang ada dalang karajaang pake bapa raja pung kuda-kuda yang lari kilat.

11 Surat yang dong antar tu ada bilang kalo bapa raja kasi ijin orang-orang Yahudi di sagala kota par bakumpul par bela dong pung diri sandiri. Kalo ada tantara dari orang-orang ka dari propinsi-propinsi mana sa yang mau serang dong, dong dapa kasi ijin par bunu, kasi binasa ka kasi abis tantara-tantara tu sama sakali lapis deng tantara-tantara tu pung bini ana samua. Tarus, dong jua bisa rampas dong yang datang serang dong tu pung harta samua. 12 Dong bisa biking samua tu di sagala propinsi yang Raja Ahasweros parenta, pas tanggal sapulu tiga bulang sapulu dua yang orang biasa bilang akang par bulang Adar. 13 Parenta ni musti jadi atorang yang samua orang musti iko. Akang musti dapa tabaos kuat-kuat par orang-orang di samua propinsi dari sagala macang bahasa, biar orang-orang Yahudi samua bisa ancang-ancang sakali par balas dong pung musu-musu pas hari tu.

14 Raja pung parenta tu kaluar dari dalang benteng di kota Susan. La orang suru-suru paparipi pi antar surat-surat tu pake raja pung kuda-kuda.

15 Abis urus samua tu, Mordekai kaluar dari istana. Waktu itu, dia pake baju warna biji gandaria tua deng puti sama deng bapa raja pung baju. Dia jua pake baju panjang warna biji gandaria aer-aer. Baju-baju tu dapa biking dari kaeng yang mahal deng bagus nama kaeng lenan. La di dia pung kapala ada makota mas yang bagus paskali. Orang-orang di kota Susan bataria karas-karas tagal dong sanang bukang maeng. 16 Orang-orang Yahudi di kota tu pung hati paleng sanang paskali la orang-orang jua taru hormat par dong lai. 17 Di sagala kota deng propinsi, di tampa mana sa raja pung parenta deng atorang tu dapa tabaos, orang-orang Yahudi paleng sanang bukang maeng. Dong biking pesta. Mala ada banya orang yang maso jadi orang Yahudi, tagal dong taku orang Yahudi.