Haman mati
7:1-10
7
1-2 Jadi, Bapa Raja Ahasweros deng Haman pi par kali kadua ka pesta yang Nyora Ester biking tu. Waktu dong ada minong anggor bagini, bapa raja tanya Ester kata, “Nyora tuang hati e, ale mau minta apa? Bilang sa! Biar kata ale minta stenga dari beta pung karajaang ni lai, beta pasti kasi akang par ale.”3 Ester jawab antua kata, “Sio bapa raja e! Kalo bapa rasa apa yang beta bilang ni bae deng kalo bapa pung hati bae par beta, jang kasi tinggal beta deng beta pung orang-orang dapa bunu. Itu tu yang beta mau minta. 4 Beta bilang bagitu, tagal katong samua su dapa jual par mau dapa bunu, dapa kasi binasa, deng dapa kasi abis sama sakali. Kalo katong cuma dapa jual par jadi orang suru-suru, beta pasti tado sa. Beta seng mau biking susa bapa raja deng alasang macang bagitu. Mar, ini ni katong mau dapa bunu samua.”a
5 La bapa raja tanya Ester kata, “He, nene moyang sapa yang barani biking macang bagitu tu? Dia di mana sakarang?”
6 Ester jawab, “Dia tu Haman. Dia ni manusia paleng jahat. Dia ni yang musu katong deng yang mau bunu katong samua.”
Waktu Haman dengar bagitu, dia takotang stenga mati nganga bapa raja deng Nyora Ester.
7 Bapa raja pung dara paleng mandidi paskali. Antua angka panta pi kasi tinggal anggor yang antua ada minong tu la pi kaluar ka istana pung taman. Haman tau kalo bapa raja su putus par kasi ancor dia. Tagal itu, dia tinggal di situ tarus par minta deng sunggu-sunggu dari Nyora Ester par kasi salamat dia. 8 Jadi, dia kasi jatu dia pung badang ka tapalang randa satu yang Ester ada guling-guling di akang. Mar, waktu dia ada biking bagitu, bapa raja pas bale dari istana pung taman la maso ka tampa pesta tu. Waktu antua lia bagitu, antua bataria kuat-kuat, “Mar su talalu lai seh! Nene moyang satu ni masi barani perkosa nyora di muka beta dalang beta pung istana ni lai?”
Batul bapa raja abis bicara bagitu, orang tutu Haman pung kapala deng kaeng. Itu tu tanda kalo dia su dapa putus par dapa hukum mati. 9 La satu dari bapa raja pung orang-orang karja yang biasa urus antua pung hidop hari-hari nama Harbona bilang par antua kata, “Bapa raja, Haman su biking tiang satu di dia pung pinggir ruma. Akang pung tinggi mangkali 25 meter bagitu. Dia biking akang par cucu Mordekai yang su kasi salamat bapa raja tu.”
Tarus bapa raja parenta, “Cucu dia di akang tiang tu!”
10 Jadi, Haman dapa cucu sampe mati di tiang yang dia biking par cucu Mordekai tu. Abis itu, baru bapa raja seng mara lai.