Raja kasi tanda hormat par Mordekai
6:1-14
6
1 Abis Haman suru orang-orang biking tiang par cucu Mordekai tu, akang pung malang bagini, bapa raja seng dapa tidor. Jadi, antua suru orang bawa buku yang carita soal Karajaang Persia deng Media pung sejara,a mulai dari partama kali antua jadi raja. Antua suru dong baca akang par antua. 2 Di buku tu ada bilang kalo Mordekai parna bongkar Biktana deng Teres pung rencana par bunu antua. Dong dua tu antua pung orang-orang karja yang jaga antua pung muka pintu istana. 3 La antua tanya antua pung orang-orang karja kata, “E, tanda hormat apa yang Mordekai su dapa tagal apa yang dia su biking tu?”Antua pung orang-orang karja bilang, “Bapa e, dia seng dapa apapa.”
4 Antua tanya, “Sakarang ni, sapa yang su ada di kintal istana?”
Pas waktu itu, Haman ada baru maso sa ka kintal istana. Dia datang par minta ijin dari bapa raja par cucu Mordekai di tiang yang dia pung orang-orang su biking tu.
5 Antua pung orang-orang karja jawab kata, “Haman bapa raja. Dia ada badiri di sana, di kintal istana.”
La antua bilang, “Suru dia maso kamari!”
6 Pas Haman maso, bapa raja bilang kata, “Haman, beta ada mau kasi tanda hormat par satu orang. Kira-kira, beta musti biking apa par dia e?”
Haman pung dalang hati, “Sapa lai yang antua maksud par dapa tanda hormat tu kalo bukang beta?”
7-8 Tagal itu, Haman angka suara par antua kata, “Bapa e! Kalo bapa mau biking apapa satu par hormat orang tu, beta rasa bapa musti biking bagini: Suru satu orang ambe bapa raja pung baju raja yang bapa sandiri biasa pake akang. Abis itu, suru dong bawa kuda saekor yang bapa sandiri biasa nai akang, lapis deng akang pung tutu kapala yang jadi tanda kalo itu bapa pung kuda. 9 Tarus, suru satu orang dari bapa pung orang-orang panting yang pung pangkat tinggi par kasi pake bapa pung baju raja tu par orang tu. Abis itu, suru dia kasi nai orang tu ka atas kuda la bajalang bawa muka antar orang tu koliling jalang basar dalang kota. Waktu bajalang bawa muka, suru dia tabaos, ‘E, dengar! Bapa raja biking bagini par orang yang antua hormat!’”
10 La bapa raja bilang par Haman kata, “Kalo bagitu, jang tunggu lama-lama lai. Ambe beta pung baju deng kuda tu. La samua yang ose baru bilang sa tu, biking akang parsis macang bagitu par Mordekai, orang Yahudi tu. Dia ada karja di muka pintu istana. Ingatang! Samua yang ose baru bilang tu biking akang samua. Jang kurang satu lai.”
11 Jadi, Haman pi ambe baju deng kuda tu. Dia kasi pake Mordekai deng baju tu la bajalang bawa muka antar Mordekai nai kuda koliling jalang basar di tenga kota. Dia tabaos iko jalang kata, “E, dengar! Bapa raja biking bagini par orang yang antua hormat!”
12 Abis itu, Mordekai bale kombali ka muka pintu istana. Mar, Haman paparipi pulang tutu-tutu dia pung muka. Dia biking bagitu tagal dia paleng malu paskali. 13 Pas sampe di ruma, Haman carita samua-samua yang jadi par dia tadi par dia pung maitua Seres deng dia pung tamang-tamang samua. Dia pung maitua deng dia pung tamang-tamang yang pung pikirang tajang tu bilang par dia kata, “Cilaka dua balas! Ale su mulai kala dari Mordekai. Tagal dia tu dara Yahudi, ale pasti seng bisa malawang dia. Mala ale pasti ancor nanti.”
14 Waktu dong ada bicara deng dia bagini, bapa raja pung orang-orang karja datang. Dong paparipi bawa dia ka pesta yang Nyora Ester biking.