Ester biking pesta
5:1-8
5
1 Pas hari katiga waktu Ester ada puasa, dia pake dia pung baju nyora raja la pi ka istana pung ruang tamu. Akang baku tangada deng ruang tampa Bapa Raja Ahasweros dudu di antua pung kadera raja. Waktu itu, antua ada dudu di antua pung kadera raja yang baku tangada deng pintu maso. 2 Parsis antua dapa lia Ester ada badiri di muka kintal, antua rasa paleng sayang dia. Tarus, antua lunjur antua pung tongka raja yang ada di antua pung tangang tu par dia. Dia rapat la sonto akang pung ujung. 3 Abis itu, antua tanya dia kata, “Kanapa tu nyora tuang? Ale mau minta apa? Bilang sa! Biar kata ale minta stenga dari beta pung karajaang ni lai, beta pasti kasi akang par ale.”4 Ester jawab antua, “Bapa raja, beta su kasi siap pesta sadiki par bapa raja tadi ni. Kalo bapa raja rasa yang beta bilang tu bae, beta minta bapa raja deng Haman datang ka pesta tu jua.”
5 Jadi, antua parenta antua pung orang karja par suru Haman datang rabu-rabu biar antua deng dia bisa pi ka pesta yang Nyora Ester biking tu. La antua deng dia pi ka sana.
6 Waktu dong ada minong anggor bagini, bapa raja slak par Ester kata, “Nyora e, ale mau minta apa tu? Bilang sa! Biar kata ale minta stenga dari beta pung karajaang ni lai, beta pasti kasi akang par ale.”
7 Ester jawab, “Bapa raja, 8 kalo bapa raja sayang beta deng kalo bapa raja rasa yang beta minta ni bae, datang deng Haman sakali lai jua ka pesta yang beta mau biking eso par bapa raja dong. Pas pesta tu baru beta bilang apa yang beta mau minta tu par bapa raja.”
Haman pung rencana par bunu Mordekai
5:9-14
9 Waktu Haman pulang makang dari pesta yang Nyora Ester biking tu, dia pung hati paleng sanang deng gerat paskali. Mar, batul dia dapa lia Mordekai ada dudu di istana pung muka pintu baru seng badiri ka tikang lutu taru hormat par dia, dia jumawa paskali. 10 Biar bagitu mar dia tahang-tahang hati sa la pulang ka dia pung ruma. Sampe di ruma, dia undang dia pung tamang-tamang dekat par datang bakumpul sama-sama deng dia deng dia pung maitua. Dia pung maitua tu nama Seres. 11 Abis itu, dia carita pukul tinggi par dong. Dia carita kata dia tu paleng kaya deng dia pung anana laki-laki banya. Dia jua carita kata bapa raja su angka dia jadi orang basar deng su kasi nai dia pung pangkat. Dia pung pangkat tu labe tinggi dari bapa raja pung orang-orang basar deng pegawe-pegawe yang pung pangkat tinggi lai. 12 Dia jua tamba lai kata, “Mala, waktu Nyora Ester biking pesta sadiki par bapa raja, cuma beta sandiri sa yang dapa undang pi ka sana sama-sama deng antua. Eso jua beta masi dapa undang par pi ka sana sama-sama deng antua lai. 13 Mar, samua tu seng ada pung arti apapa par beta kalo beta masi lia orang Yahudi satu nama Mordekai ka sapa barang tu ada dudu di raja pung muka pintu istana.”
14 Pas dengar bagitu, Haman pung maitua Seres deng Haman pung tamang-tamang tu bilang kata, “He, mangapa kong ale seng suru orang-orang biking tiang satu barang 25 metera bagitu, biar eso pagi ale bisa minta ijin dari bapa raja par cucu Mordekai di akang tiang tu? Abis itu, ale pung hati bisa sanang waktu pi sama-sama deng antua ka pesta tu.”
Haman sanang deng apa yang dong bilang tu, jadi dia suru orang-orang biking akang.