Rut
Kata-Kata Partama
Kitab Rut ni carita soal Rut, parampuang Moab yang kaweng deng laki-laki Israel satu. Laki-laki tu mati kasi tinggal Rut yang masi muda deng balong pung ana. Abis Rut pung laki mati, Rut pung mama mantu Naomi suru Rut pulang ka dia pung orang tatua. Mar Rut seng mau kasi tinggal dia pung mama mantu tagal dia paleng sayang antua. Dia iko antua tarus deng jaga sombayang par orang Israel pung Tuhan biar kata dia ni bukang orang Israel. Di carita ni pung laste, Tuhan kasi berkat basar par Rut. Dia kaweng lai deng laki-laki Israel satu dari dia pung laki yang su mati pung famili la ada pung ana laki-laki satu. La dari Rut pung turunang ni, Daud lahir. Antua yang nanti jadi raja par orang Israel.
Dari carita ni katong bisa tau soal bagemana Allah pake orang Yahudi deng orang bukang Yahudi par biking Antua pung mau yang Antua su ator par dunya. Dari carita ni jua katong tau kalo Allah tarima samua orang. Antua seng pili-pili muka biar kata orang-orang tu asal dari bangsa, suku, bahasa, deng cara hidop yang seng sama. Jadi, bukang cuma orang Yahudi sa yang bisa jadi Antua pung orang-orang.
Carita Rut ni jadi kira-kira taong 1375-1050 Waktu Yesus Balong Lahir. Waktu itu hakim-hakim yang pegang parenta par orang Israel tagal balong ada raja. Seng ada yang tau sapa yang tulis kitab Rut ni tagal orang yang tulis buku ni seng tulis dia pung nama.
Kitab Rut ni tabage jadi babarapa bagiang:
Pasal 1:1-5 bicara soal Elimelek deng dia pung famili pinda ka Moab
Pasal 1:6-22 bicara soal Rut iko Naomi bale ka Israel
Pasal 2:1-23 bicara soal Rut baku dapa deng Boas
Pasal 3:1-18 bicara soal Rut deng Boas di tampa pukul jelai
Pasal 4:1-12 bicara soal Rut jadi Boas pung bini
Pasal 4:13-17 bicara soal Rut deng Boas pung ana lahir
Pasal 4:18-22 bicara soal Daud pung tete-nene moyang