Rut
Elimelek deng dia pung famili pinda ka Moab
1:1-5
1
1-2 Dolo-dolo, waktu orang Israel balong ada raja,a ada bapa satu nama Elimelek. Antua pung bini nama Naomi. Dong pung ana laki-laki dua orang, satu nama Mahlon deng satu lai nama Kilyon. Dong tu anana cucu Efrata.b Dong asal dari kota Betlehem. Betlehem tu ada di tana Yehuda. Waktu itu, di negri Israel ada susa makanang. Tagal itu, Elimelek pi sama-sama deng dia pung bini deng ana laki-laki dua orang ka negri Moab. Dong tinggal di sana jadi orang asing. 3 Tarus, akang pung barapa taong bagini, Elimelek mati kasi tinggal Naomi deng antua pung ana laki-laki dua orang. 4 Ana laki-laki dua tu kaweng deng parampuang Moab. Mahlon kaweng deng Rut la Kilyon kaweng deng Orpa. Dong samua tinggal di Moab kurang labe sapulu taong. 5 La Naomi pung ana laki-laki dua tu mati. Jadi, antua su seng ada laki deng anana lai.
Rut iko Naomi bale ka Israel
1:6-22
6 Waktu Naomi masi tinggal di Moab, antua dengar kalo TUHAN su tolong Antua pung orang-orang Israel. Antua kasi hasil par dong pung kabong sampe dong ada pung makanang. Jadi, Naomi deng antua pung ana mantu dua orang siap-siap par pulang kombali ka negri Israel. 7 Dong tiga ni pi ka tana Yehuda di Israel. Waktu di tenga jalang, 8 Naomi bilang par Orpa deng Rut kata, “Sio anana e, pulang jua ka kamong dua pung orang tatua.c Beta minta biar TUHAN sayang kamong dua macang deng kamong dua sayang beta deng beta pung anana yang su seng ada lai. 9 Beta minta lai dari TUHAN biar Antua tolong kamong dua la kamong dua bisa kaweng kombali deng hidop tenang.”
Abis bilang bagitu, Naomi ciong Orpa deng Rut la dong manangis basar-basar. 10 Orpa deng Rut bilang, “Seng mama, katong seng mau pulang lai. Katong mau iko mama sa. Katong mau iko mama ka mama pung orang-orang jua.”
11 Mar Naomi bilang, “Sio anana e, pulang jua! Mangapa kong kamong mau iko beta la? Beta ni su seng ada ana laki-laki lai par jadi kamong pung laki. 12 Dong pulang jua! Beta ni su talalu tua par kaweng lai. Biar kata malang ini beta dapa laki la bisa kasi lahir anana laki-lakid par kamong, 13 mar seng mungkin kamong dua bisa tunggu sampe anana tu basar to? La masa tagal ini sampe kamong dua seng mau kaweng lai? Jang bagitu anana e! Beta ni pung hidop paleng susa dari kamong dua. Beta hidop susa tagal TUHAN su biking beta sangsara.”
14 Dengar bagitu, dong manangis basar-basar kombali. Tarus, Orpa ciong dia pung mama mantu par bapisa. Mar Rut tinggal kong polo Naomi rapat-rapat. 15 Tarus, Naomi bilang par Rut kata, “Rut e, pasang talingang la dengar bae-bae. Orpa tu ada mau pulang kombali ka dia pung orang-orang deng dia pung dewa-dewa. Ose pulang iko dia jua.”
16 Mar Rut bilang, “Mama e, jang paksa beta par pi kasi tinggal mama! Beta mau iko mama sa. Mama pi ka mana, beta iko lai. Mama tinggal di mana, beta jua tinggal di situ lai. Mama pung orang-orang tu, beta pung lai. La TUHAN Allah yang mama somba tu, beta somba lai. 17 Mama mati deng dapa kubur di mana, beta mati deng dapa kubur di situ lai. Nanti TUHAN hukum beta paleng barat kalo beta kasi tinggal mama. Yang bisa pisa beta deng mama cuma kalo satu dari katong dua mati.”
18 Naomi seng bisa bilang apapa lai waktu antua sadar kalo Rut mau iko antua sa. 19 Tarus, dong dua bajalang sampe di kota Betlehem.
Bagitu dong dua sampe, orang-orang yang ada di situ hebo paskali. La parampuang-parampuang Betlehem laeng bilang par laeng kata, “E! Dia tu Naomi ka?”
20 Tarus Naomi bilang par dong, “Jang panggel beta Naomie lai. Panggel beta Maraf sa. Barang, TUHAN yang pung Kuasa Paleng Basar biking beta pung hidop paleng susa paskali. 21 Waktu beta pi dari sini, beta pi sama-sama deng beta pung laki deng anana. Mar sakarang ni, TUHAN kasi pulang beta sandiri. Jadi, jang kamong panggel beta Naomi lai. Barang, TUHAN hukum beta. Antua yang pung Kuasa Paleng Basar tu yang biking beta hidop susa deng sangsara.”
22 Jadi, itu tu carita soal Naomi pulang dari Moab sama-sama deng Rut, antua pung ana mantu. Dong dua sampe di Betlehem pas su mulai musing orang-orang pi ambe jelai.