Rut baku dapa deng Boas
2:1-23
2
1 Di kota Betlehem, Naomi pung laki Elimelek yang su mati tu ada pung famili nama Boas. Boas ni orang kaya. Orang jaga taru hormat par antua. 2 Satu kali bagini, Rut, parampuang Moab tu, bilang par Naomi kata, “Mama, kasi tinggal beta pi jua di orang yang pung hati bae pung kabong par punggul sisa-sisa jelai yang jatu dari orang-orang karja pung tangang.”La Naomi bilang, “Ana e, pi suda.”
3 Jadi, Rut pi ka kabong satu. Sampe di kabong tu, dia punggul jelai di balakang orang-orang karja yang potong jelai. Dia baruntung paskali tagal yang pung kabong tu Boas, Elimelek pung famili.
4 Seng lama bagini, Boas datang dari Betlehem. Antua kasi suara par orang-orang karja kata, “Beta minta biar TUHAN ada sama-sama deng kamong.”
Dong bilang par antua, “Katong minta biar TUHAN kasi berkat par bapa lai.”
5 Tarus, antua tanya par mandor kabong kata, “Parampuang itu tu sapa la?”
6 Mandor kabong bilang par antua, “Dia tu parampuang Moab. Dia datang sama-sama deng Naomi dari negri Moab. 7 Dia tadi minta dari beta kasi biar dia iko lai par punggul sisa-sisa jelai yang jatu di balakang orang-orang karja. Dia jua minta lai par punggul jelai-jelai yang tacecer di dekat jelai-jelai yang dong su tambong tu. Dia su datang dari pagi la karja tarus. Dia cuma istirahat sadiki sa di walang.”
8 Abis itu, Boas bilang par Rut kata, “Ana e, dengar bae-bae apa yang beta mau bilang ni. Ale jang pi punggul jelai di orang laeng pung kabong lai. Ale tinggal di sini sa deng parampuang-parampuang yang karja par beta. 9 Ale taru kira bae-bae ka mana laki-laki yang karja par beta pi potong jelai. Tarus, ale iko parampuang-parampuang tu dari balakang. Beta su pasang par dong laki-laki tu seng bole paskali baganggu ale. Kalo ale rasa aos, pi sa ka tampayang aer la minong aer yang dong su isi akang.”
10 Dengar bagitu, Rut tikang lutu di muka Boas sampe dia pung muka kana tana la bilang, “Sio bapa e, beta ni bukang orang sini. Mangapa bapa bagitu bae par beta sampe bapa mau tolong beta?”
11 Mar Boas bilang, “Beta ni su dengar samua-samua soal bagemana ale pung hidop deng ale pung mama mantu. Ale tolong antua dari waktu ale pung laki mati. Ale kasi tinggal ale pung orang tatua deng ale pung negri par datang tinggal deng orang-orang yang dolo ale seng kanal. 12 Beta minta biar TUHAN balas samua yang bae yang ale su biking. Beta minta biar ale dapa berkat basar dari TUHAN, Allah yang orang Israel somba, yang jadi ale pung tampa batado.”
13 Tarus Rut bilang, “Sio bapa e, biar kata beta ni orang yang seng pung arti apapa deng beta ni labe kacil lai dari bapa pung orang-orang karja parampuang, mar bapa paleng bae par beta. Sio, bapa pung bae tu biking beta pung hati sanang.”
14 Waktu dong mau makang, Boas bilang par Rut kata, “Ana e, mari datang kamari. Ambe roti ni la colo akang di kua asanga baru makang.”
Tarus, Rut dudu di pinggir orang-orang karja la Boas kasi gandum yang dong su bakar tu par dia. Rut makang sampe kanyang, mar masi ada akang pung sisa lai.
15 Abis itu, Rut pi punggul jelai kombali. Tarus, Boas bilang par antua pung orang-orang karja kata, “Biar dia pi punggul jelai yang su takumpul tu. Jang kamong biking malu dia. 16 Labe bae kamong sangaja kasi jatu jelai babarapa tangke dari yang su taika tu, biar dia punggul akang. Jang larang dia.”
17 Jadi, Rut punggul jelai di kabong sampe sore. Tarus, dia pukul-pukul batang jelai tu par kasi lapas akang pung biji-biji. Dia kumpul akang samua kurang labe dua balas kilo. 18 Tarus, Rut bawa jelai tu la pulang ka kota. Waktu sampe di ruma, dia kasi unju jelai yang dia ada bawa tu par Naomi. Dia jua kasi kaluar dia pung makanang labe par antua lai. 19 Antua bilang par Rut kata, “Ose punggul jelai ni di mana? Hari ini ose karja di sapa pung kabong? Beta minta biar TUHAN kasi berkat par orang yang su biking bae par ose.”
Tarus, Rut carita samua tu par antua. Rut bilang kata, “Mama e, hari ini beta karja di bapa Boas pung kabong.”
20 Naomi bilang, “Hoe, ana e! Boas tu katong pung famili. Antua tu orang satu yang musti tolong katong. Beta minta biar TUHAN jua yang kasi berkat par antua. TUHAN seng parna lupa Antua pung janji par katong yang masi hidop deng par orang-orang yang su mati.”
21 Tarus, Rut, parampuang Moab tu, bilang lai kata, “Mama, bapa Boas bilang kalo beta bisa pi tarus-tarus punggul jelai yang jatu di kabong sama-sama deng antua pung orang-orang karja sampe abis musing.”
22 Naomi bilang, “Ana e, labe bae bagitu. Ose karja di situ sa deng Boas pung orang-orang karja parampuang. Barang, kalo ose pi di orang laeng pung kabong, mangkali dong biking susa ose.”
23 Jadi, Rut iko tarus parampuang-parampuang yang karja par Boas sampe abis musing jelai deng gandum.b Dia tinggal tarus deng dia pung mama mantu.