Mordekai usaha par tolong orang-orang Yahudi samua
4:1-17
4
1 Waktu Mordekai dengar soal samua yang nanti jadi par orang-orang Yahudi di antero Karajaang Persia tu, dia rabe dia pung pakiang, salele kaeng busu-busu, la taru abu tungku di atas dia pung kapala. Itu tu tanda kalo dia pung hati paleng susa paskali. Abis itu, dia marata basar-basar iko jalang di tenga kota. Dia pung hati ancor paskali. 2 Sampe di istana pung muka pintu, dia barenti tagal orang yang salele kaeng busu-busu seng bole maso. 3 Di sagala propinsi, orang-orang Yahudi pung hati susa takaruang paskali batul dengar bapa raja pung surat parenta tu. Dong puasa. Dong jua manangis deng marata sampe tahek-hek. Banya dari dong yang buka kaeng busu-busu di atas tana la ambor abu di atas akang, kong tidor di situ.4 Ester pung orang-orang karja parampuang deng laki-lakia tau soal apa yang Mordekai ada biking tu. Jadi, dong pi lapor akang par dia. Waktu dia dapa tau akang, dia pung hati paleng susa paskali. Jadi, dia kiring orang par bawa pakiang baganti par Mordekai biar dia bisa lapas kaeng busu-busu tu. Mar, Mordekai seng mau tarima akang. 5 Waktu Ester dengar kata Mordekai seng mau tarima akang, dia panggel Hata. Dia tu bapa raja pung orang karja laki-laki yang antua parenta par urus Ester pung hidop. Ester parenta dia par pi cari tau dari Mordekai kata itu ada masala apa sampe dia biking bagitu.
6 Jadi, Hata pi baku dapa Mordekai di tana lapang dekat muka pintu istana. 7 Tarus, Mordekai carita par Hata soal samua yang su jadi par dia. Dia jua carita soal perak barapa banya yang Haman su janji par stor ka bapa raja pung kas kepeng kalo bapa raja kasi kaluar parenta par bunu orang-orang Yahudi samua. 8 Dia jua kasi surat parenta yang Haman kasi kaluar di kota Susan par bunu orang-orang Yahudi samua. Dia suru Hata par kasi unju akang la lapor akang pung isi par Ester. Dia jua kiring pasang par Ester kata, “Bilang nyora raja kalo antua musti pi baku dapa bapa raja la minta deng sunggu-sunggu dari bapa raja par paduli nyora raja pung orang-orang.”
9 Abis itu, Hata bale par kasi tau samua yang dia dengar dari Mordekai tu par Ester. 10 Mar, Ester bale suru Hata par pi kasi tau dia kata, 11 “Di karajaang ni ada atorang soal bagemana orang musti pi baku dapa bapa raja di istana pung ruang tamu.b Antua pung pegawe-pegawe deng orang-orang di samua propinsi yang antua parenta ni jua tau akang. Kalo antua seng undang mar ada laki-laki ka parampuang sapa yang barani pi ka sana, dia pasti dapa hukum mati. Cuma ada satu cara biar orang seng dapa hukum mati. Itu tu kalo antua unju orang tu deng antua pung tongka mas. Baru su tiga pulu hari ni jua antua seng panggel beta par pi baku dapa antua.”
12 Waktu Hata pi bilang Ester pung jawab tu par Mordekai, 13 dia bale kiring pasang par Ester. Dia bilang, “Hoe nyora raja! Jang sangka kata se tinggal di istana la cuma se sa yang salamat. Waktu dong bunu orang-orang Yahudi yang laeng, dong jua nanti bunu se lai. 14 Kalo se seng biking apapa par tolong se pung orang-orang ini kali, nanti ada orang yang tolong deng kasi salamat dong. Mar, se deng se pung bapa pung sudara-sudara samua pasti dapa bunu. Jang sampe se dapa pili par jadi nyora raja biar se bisa kasi salamat orang Yahudi dari cilaka macang bagini.”
15 Waktu Ester dengar apa yang Mordekai bilang tu, dia bale kiring pasang par Mordekai lai. 16 Dia bilang kata, “Kalo bagitu, pi kumpul orang-orang Yahudi samua di kota Susan ni. Bilang dong puasa deng sombayang par beta tiga hari sepe-sepe, siang-malang. Nanti beta deng beta pung orang-orang karja parampuang jua biking bagitu lai. Abis itu baru beta pi baku dapa bapa raja. Kalo iko atorang yang batul, beta seng bole biking bagitu. Mar kalo beta musti mati, yo seng apapa jua.”
17 Abis itu, Mordekai pi la biking parsis deng apa yang Ester suru.