Ester 3

Haman pung rencana par bunu orang-orang Yahudi samua

3:1-15

1 Abis Ester dapa angka jadi nyora raja, akang pung babarapa taong bagini, Bapa Raja Ahasweros kasi nai satu orang pung pangkat. Dia nama Haman. Dia ni Hamedata pung ana, Agak pung ana cucu. Bapa raja angka dia jadi orang yang pung pangkat paleng tinggi, labe dari samua orang yang pung pangkat tinggi lai. 2 Bapa raja pung pegawe-pegawe samua yang pung pangkat tinggi yang karja di antua pung muka pintu istana tu tikang lutu somba Haman. Dong biking bagitu tagal bapa raja sandiri yang kasi kaluar parenta par biking bagitu. Mar Mordekai tola manta-manta. Dia seng mau biking bagitu. 3 Tagal itu, pegawe-pegawe yang pung pangkat tinggi yang karja di bapa raja pung muka pintu istana tu tanya Mordekai kata, “Bapa! Mangapa kong bapa malawang bapa raja pung parenta?”

4 Sabang hari, dong tinggal kong tanya dia macang bagitu tarus. Mar, dia seng talalu ambe pusing deng apa yang dong bilang tu. Dia bilang par dong kata dia tu orang Yahudi jadi seng bisa biking bagitu. Jadi, dong pi lapor dia par Haman. Dong biking bagitu tagal dong mau tau kata Haman masi kasi hati par Mordekai biking bagitu tarus lai ka seng. 5 Waktu Haman lia deng dia pung mata kapala sandiri kalo Mordekai seng tikang lutu somba dia, dia pung dara mandidi paskali. 6 Pas Haman tau kalo Mordekai ni orang Yahudi, dia rasa diri paleng hina kalo cuma bunu Mordekai sa. Tagal itu, dia ator rencana par bunu orang-orang Yahudi samua dalang antero Karajaang Persia tu lai.

7 Pas bulang satu yang orang bilang akang par bulang Nisan, waktu Raja Ahasweros su parenta Persia jalang sapulu dua taong, Haman suru orang buang undi di muka dia. Undi tu biasa orang bilang akang pur. Dong biking bagitu tagal Haman mau tau tanggal deng bulang barapa yang pas par bunu orang-orang Yahudi samua. Abis buang undi, dong dapa tanggal yang pas. Itu tu tanggal sapulu tiga bulang sapulu dua yang orang bilang akang par bulang Adar. 8 Abis itu, Haman pi par baku dapa bapa raja. Tarus, dia bilang par antua kata, “Bapa raja yang beta hormat! Ada kasta satu yang tinggal talamburang kasana-kamari dalang karajaang yang bapa raja parenta ni. Dong pung adat beda paskali deng kasta-kasta laeng. Mar yang labe cilaka lai, dong tar mau tundu iko bapa raja pung parenta. Jadi bapa raja, beta rasa labe bae jang kasi tinggal dong hidop dalang karajaang ni. 9 Kalo bapa raja suka apa yang beta bilang ni, bapa raja bisa kasi kaluar parenta par bunu dong samua. Tarus, beta nanti stor perak 340 ribu kilo par orang yang urus bapa raja pung kas kepeng.”

10 Waktu bapa raja dengar rencana tu, antua lapas cincing yang antua biasa pake par cap surat-surat panting dari antua pung jare la kasi akang par Haman. Dia ni Hamedata pung ana, Agak pung ana cucu, jadi dia binci orang Yahudi. 11 Abis itu, bapa raja bilang par Haman kata, “Ale ator sa. Biking apa sa iko ale pung suka par akang perak-perak deng orang-orang tu.”

12 Jadi, pas tanggal sapulu tiga bulang satu, Haman panggel bapa raja pung juru-juru tulis par baku dapa dia. Haman suru dong tulis surat par raja pung orang-orang karja yang pung pangkat tinggi, gubernur-gubernur, deng bupati-bupati di antero karajaang. Dong tulis surat tu deng satu-satu tampa pung bahasa deng cara tulis sandiri-sandiri. Surat-surat tu dong tulis akang pake Bapa Raja Ahasweros pung nama. Tarus, dong cap akang samua pake antua pung cincing yang antua biasa pake par cap surat-surat panting. 13 Abis itu, Haman suru orang-orang par pi antar surat-surat tu ka samua propinsi dalang karajaang tu. Dalang surat tu ada bilang kalo nanti tanggal sapulu tiga bulang sapulu dua yang orang bilang par bulang Adar tu, orang-orang Yahudi samua mulai dari yang muda sampe yang tua musti dapa bunu, lapis deng anana deng parampuang-parampuang lai. Jang kasi tinggal satu lai yang hidop. Tarus, rampas dong pung harta samua. 14 Parenta ni musti jadi atorang yang samua orang musti iko. Akang musti dapa tabaos kuat-kuat par samua orang di samua propinsi, biar dong bisa ancang-ancang sakali pas hari tu.

15 Jadi, bapa raja pung parenta tu kaluar dari dalang benteng di kota Susan. La orang suru-suru dong paparipi pi antar surat-surat tu ka propinsi-propinsi samua yang ada dalang antero karajaang tu. Waktu samua tu jadi, bapa raja deng Haman ada dudu minong anggor tenang-tenang sa. Mar, rayat satu kota Susan ada takotang stenga mati dengar barita tu.