<<    <     Ester     2     >    >> 
Ester dapa angka jadi nyora raja
2:1-18
2
1 Langgar babarapa waktu, Bapa Raja Ahasweros su seng mara Nyora Wasti lai. Antua inga-inga dia. Antua inga soal apa yang dia biking par antua waktu pesta tu deng soal antua pung parenta yang antua kasi kaluar par hukum dia. 2 Tagal itu, antua pung orang-orang karja yang biasa urus antua pung hidop hari-hari kasi nasehat par antua. Dong bilang kata, “Bapa raja e! Bagemana kalo bapa suru orang par pi cari nona-nona muda yang manis-manis deng yang balong parna tidor deng laki-laki par bapa? 3 Bapa bisa pili pegawe babarapa orang di sagala propinsi par pi cari la bawa nona-nona tu ka bapa pung bini-bini piara pung tampa tinggal yang ada dalang benteng di kota Susan ni. Bapa pung orang karjaa nama Hegai yang biasa urus bapa pung bini-bini piara ada di sana. Dia nanti kalesang deng ator nona-nona tu. Dia nanti kasi minya bobou sadap deng minya goso par dong pung kuli, biar dong labe tamba manis lai. 4 La bapa bisa pili nona satu yang bapa paleng suka par jadi nyora raja ganti Nyora Wasti.”
Bapa Raja Ahasweros suka paskali deng antua pung orang-orang karja pung nasehat tu, jadi antua biking iko apa yang dong bilang.
5 Waktu itu, ada orang Yahudi satu nama Mordekai yang tinggal dalang benteng di kota Susan. Dia dari suku Benjamin. Dia tu Yair pung ana. Yair tu Simei pung ana la Simei tu Kis pung ana. 6 Dolo, waktu Raja Nebukatnesar dari Babel kasi kala negri Yehuda, antua tangkap Raja Yehuda nama Yekonyab deng banya orang lai la bawa dong deng paksa dari Yerusalemc ka Babel* par tinggal di sana. Tempo itu tu, Kis ada sama-sama deng orang banya yang dapa bawa tu lai. 7 Mordekai ada pung sepupu satu. Dia nama Ester.d Dia pung nama dalang bahasa Ibrani tu Hadasa. Dia pung badang paleng bagus baru dia pung muka jua paleng manis. Dia pung bapa deng Mordekai pung bapa tu baku ade-kaka. Jadi, waktu Ester pung orang tatua mati, Mordekai piara dia jadi Mordekai pung ana.
8 Waktu Bapa Raja Ahasweros pung surat parenta tu dapa tabaos ka antero karajaang, antua pung orang-orang karja bawa nona-nona muda manis-manis ka dalang benteng di kota Susan. Ester jua dapa bawa ka sana lai. Dong samua dapa taru di bapa raja pung bini-bini piara pung tampa tinggal. La Hegai yang biasa urus bapa raja pung bini-bini piara tu, dia yang kalesang deng ator dong. 9 Hegai paleng sanang paskali deng Ester. Hegai jua paleng sayang dia. Jadi seng tunggu lama lai, Hegai kasi minya bobou sadap deng minya goso par dia, biar dia labe tamba manis. Hegai pili makanang yang dapa masa cuma par Ester sa. Hegai jua pili nona-nona tuju orang yang karja di bapa raja pung istana par urus dia, la kasi pinda dia deng nona-nona tu ka tampa yang paleng bagus di bapa raja pung bini-bini piara pung tampa tinggal tu.
10 Ester seng bilang-bilang kata dia tu orang apa deng dari mata ruma mana, tagal Mordekai su larang dia kamuka par biking bagitu. 11 Sabang hari, Mordekai tinggal kong bajalang bula-bale di kintal di muka bapa raja pung bini-bini piara pung tampa tinggal tu. Dia mau cari tau kata Ester tu ada bae-bae ka seng. Dia jua inging tau apa yang nanti jadi deng Ester.
12 Nona-nona yang su dapa pili tu, dong satu-satu dapa bagiang par tidor samalang deng Raja Ahasweros. Mar, dong musti kalesang dong pung diri sapulu dua bulang kamuka do. Dong musti pake sagala macang minya bobou sadap deng minya goso, biar dong labe tamba manis. Anam bulang partama dong musti pake minya goso do, baru anam bulang sisa dong pake minya bobou sadap deng rampa-rampa. 13 Waktu dong pung bagiang par tidor samalang deng antua, dong bisa pake apa sa yang dong mau dari dalang antua pung bini-bini piara pung tampa tinggal par pi baku dapa antua. 14 Dong pi sore-sore par tidor samalang deng antua. Eso pagi dong musti kasi tinggal antua pung istana la pi ka bagiang laeng di antua pung bini-bini piara pung tampa tinggal. Bapa raja pung orang karja yang dapa tugas di situ tu nama Sasgas. Dia pung tugas tu par jaga deng kalesang antua pung bini-bini piara. Nona-nona tu seng bisa pi baku dapa antua kali kadua lai. Dong cuma bisa pi kombali kalo antua suka dong la panggel dong pung nama.
15 Jadi sakarang ni, Ester pung bagiang par tidor deng bapa raja. Dia ni Abihail pung ana. Abihail ni baku ade-kaka deng Mordekai pung bapa. La Mordekai ni yang arken Ester jadi dia pung ana.
Pas Ester pung waktu par tidor deng bapa raja, dia minta nasehat dari Hegai yang biasa jaga deng kalesang bapa raja pung bini-bini piara tu. Apa sa yang Hegai usul par dia pake, itu sa yang dia mau pake. Samua orang yang lia Ester suka dia. 16 Jadi, Ester dapa bawa par baku dapa bapa raja pas bulang sapulu yang orang bilang par bulang Tebet.e Waktu itu, Bapa Raja Ahasweros su parenta jadi raja jalang tuju taong.
17 Waktu Ester dapa bawa par baku dapa antua, antua paleng suka dia labe dari antua pung bini-bini. Antua jua paleng sayang dia labe dari nona-nona muda manis-manis yang dapa bawa maso par baku dapa antua. Jadi, antua ambe makota karajaang la taru akang di Ester pung atas kapala. Antua angka Ester jadi nyora raja ganti Nyora Wasti. 18 Abis itu, antua biking pesta basar satu par hormat Ester. Antua undang samua orang basar deng antua pung orang-orang karja yang pung pangkat tinggi par datang. Antua suru orang-orang dalang samua propinsi yang antua parenta par libur hari itu.f Antua jua bage-bage sagala macang barang yang bagus-bagus par antua pung rayat. Antua biking bagitu par kasi unju kalo antua ni paleng bae.
Mordekai kasi salamat bapa raja
2:19-23
19 Langgar babarapa waktu abis Ester dapa angka jadi nyora raja bagini, nona-nona muda tu dapa suru bakumpul kali kadua kombali. Waktu itu, Mordekai su dapa angka jadi bapa raja pung pegawe yang karja di antua pung istana. 20 Sampe oras tu, Ester seng parna bilang-bilang par sapa-sapa kalo dia tu orang Yahudi deng dari mata ruma mana. Dia biking bagitu tagal Mordekai su parna bilang dia par biking bagitu. Jadi, dia dengar-dengarang Mordekai sama deng dia dengar-dengarang Mordekai waktu dia masi kacil.
21 Satu kali bagini, waktu Mordekai ada karja di bapa raja pung muka pintu istana, bapa raja pung orang-orang karjag nama Biktana deng Teres yang jaga antua pung pintu istana, dong hati saki bapa raja. Jadi, dong baku skongkol par bunu antua. 22 Mar, Mordekai dapa tau dong pung rencana tu la dia bilang akang par Nyora Ester. Batul Ester dengar akang dari Mordekai pung mulu, dia langsung sambung akang par bapa raja la bilang par antua kalo itu Mordekai yang bilang akang. 23 Waktu bapa raja cari tau barita tu, antua dapa tau kata akang batul. Jadi, antua kasi kaluar parenta par cucu dong dua tu deng tiang. La antua suru antua pung juru tulis par tulis samua yang su jadi tu. Dong tulis akang di muka antua dalang buku yang carita soal Karajaang Persia pung sejara.