Ester 1

Ester

Bapa Raja Ahasweros biking pesta basar

1:1-9

1-2 Dolo-dolo, ada raja satu nama Ahasweros. Antua pegang parenta par 127 propinsi di Karajaang Persia, mulai dari India di sabala matahari nai sampe ka Etiopia di sabala matahari maso. Waktu itu, antua parenta 127 propinsi tu dari antua pung istana yang ada dalang benteng di kota Susan.

3 Pas taong katiga waktu Ahasweros parenta jadi raja, antua biking pesta basar satu par orang-orang basar deng antua pung pegawe-pegawe yang pung pangkat tinggi. Kapitang-kapitang dari Persia deng Media, gubernur-gubernur, deng orang-orang basar dari samua propinsi yang antua parenta jua datang ka pesta tu lai. 4 Antua biking pesta tu 180 hari sepe-sepe. Dalang pesta tu jua, antua pamer antua pung sagala macang barang yang paleng mahal deng yang paleng bagus-bagus par samua orang yang datang. Antua biking bagitu biar orang-orang tau kalo antua tu raja yang paleng hebat.

5 Abis pesta basar tu, Bapa Raja Ahasweros biking pesta satu lai par samua orang dalang benteng di kota Susan, mulai dari orang-orang kaya sampe orang-orang kasiang. Antua biking pesta ni satu minggu tare-tare dalang taman yang ada di antua pung istana. 6 Orang hias dalang taman tu deng kaeng-kaeng yang mahal-mahal deng yang bagus-bagus. Akang warna biru deng puti. Dong ika kaeng-kaeng tu deng tali lenan alus warna puti deng biji gandaria aer-aer la dong gai akang di galang-galang dari perak. Galang-galang tu tapasang di tiang-tiang dari batu marmer. Dong jua taru tapalang-tapalang randa yang dapa sopo pake mas deng perak di atas flur, biar orang bisa lunjur badang waktu makang di situ. Dong biking flur tu dari batu-batu yang mangkilat macang deng kaca yang warna mera dara babi, marmer warna puti, kuli mutiara yang mangkilat, deng batu-batu yang bagus-bagus deng yang rupa-rupa warna.

7 Dalang pesta tu, bapa raja kasi siap anggor paleng banya par tamu-tamu yang datang par kasi unju kalo antua ni paleng bae. Anggor tu, anggor yang antua sandiri biasa minong. Antua pung orang-orang karja sirang anggor tu ka dalang cawan-cawan dari mas yang pung model rupa-rupa macang. 8 Samua orang bisa minong iko suka, seng ada yang larang ka paksa. Barang, antua su parenta antua pung orang-orang karja par sirang anggor iko satu-satu yang datang tu pung suka.

9 Waktu bapa raja ada biking pesta tu, Nyora Wasti jua ada biking pesta lai. Dia biking pesta tu par parampuang-parampuang yang ada dalang bapa raja pung istana tu.

Nyora Wasti malawang Raja Ahasweros pung parenta

1:10-22

10 Pas hari katuju waktu Bapa Raja Ahasweros biking pesta par samua orang di kota Susan, antua pung hati sanang tagal su sadiki mabo. Jadi, antua panggel tuju orang yang biasa urus antua pung hidop hari-hari, yang antua paleng parcaya. Dong nama: Mehuman, Bista, Harbona, Bikta, Abakta, Setar, deng Karkas. 11 Antua parenta dong tuju tu par pi bawa Nyora Wasti par antua.

Nyora Wasti ni paleng manis, jadi bapa raja inging pamer nyora par antua pung rayat samua deng par pegawe-pegawe yang pung pangkat tinggi yang ada di pesta tu. Nyora musti pake makota karajaang. 12 Mar, waktu dong tuju tu bilang bapa raja pung parenta tu, nyora seng mau datang. Akang biking bapa raja pung dara mandidi paskali.

13 Bapa raja biasa panggel orang-orang par bantu antua putus parkara-parkara panting. Dong tu pung pikirang tajang deng tau samua soal orang Persia deng Media pung atorang-atorang deng adat. 14 Dari dong samua tu ada tuju orang yang antua biasa panggel, jadi antua panggel dong. Dong nama: Karsena, Setar, Atmata, Tarsis, Meres, Marsena, deng Memukan. Dong tuju tu orang-orang basar dari Persia deng Media yang pung pangkat paleng tinggi deng yang bisa pi baku dapa deng bapa raja apa tempo sa. Dong jua bisa bicara tarang-tarang par antua. 15 Tarus, bapa raja bilang par dong kata, “Bapa-bapa! Coba dengar parkara satu ni. Beta su suru beta pung orang-orang karja par bawa Nyora Wasti kamari, mar nyora seng mau. Kalo iko atorang yang batul, katong musti biking apa nyora tagal malawang beta pung parenta tu?”

16 Pas dengar bagitu, Memukan angka bicara par antua deng orang-orang basar samua yang ada di situ kata, “Bapa raja! Nyora Wasti bukang cuma biking sala par bapa sa. Mar, antua jua biking sala par orang-orang basar deng samua orang yang ada dalang samua propinsi yang bapa parenta ni. 17 Barang, kalo nanti bini-bini samua dalang karajaang ni dengar apa yang nyora biking, dong nanti inja dong pung laki pung kapala. Dong nanti bilang kata, ‘Bapa raja parenta Nyora Wasti datang kasi unju rupa par bapa raja, mar antua jua seng datang. Jadi, mangapa kong katong musti taru hormat par katong pung laki lai?’ 18 La hari ini ni jua, batul orang-orang basar dari Persia deng Media pung bini-bini dengar nyora pung kalakuang ni, dong nanti biking sama deng apa yang nyora biking tu lai. Akang pung konci rekeng, bini-bini di samua tampa dalang karajaang yang bapa raja parenta ni nanti seng taru hormat par dong pung laki lai. La dong pung laki jua nanti jumawa dong.

19 Jadi, kalo bapa raja rasa apa yang beta bilang ni bae, katong minta biar bapa raja kasi kaluar parenta kalo Nyora Wasti seng bole paskali datang dekat-dekat bapa lai. Parenta tu musti jadi orang Persia deng Media pung atorang, biar seng ada orang yang bisa roba akang. La abis itu, pili nona satu yang labe bae dari Nyora Wasti par ganti nyora raja. 20 La waktu bapa pung parenta ni tasiar ka antero karajaang ni, bini-bini samua, mulai dari orang-orang kaya sampe orang-orang kasiang, dong nanti taru hormat par dong pung laki.”

21 Bapa raja deng orang-orang basar samua di situ suka paskali deng apa yang Memukan bilang tu. Jadi, antua langsung biking iko apa yang Memukan su bilang tu. 22 Antua kiring surat ka samua propinsi yang antua parenta. Surat-surat tu dapa tulis deng satu-satu tampa pung bahasa deng cara tulis sandiri-sandiri. Dalang surat tu, bapa raja parenta biar laki-laki samua musti jadi kapala par dong pung ruma tangga la dong pung ruma tangga musti dengar-dengarang dong.