Orang-orang Yahudi bunu dong pung musu-musu
9:1-19
9
1 Jadi, sakarang su tanggal sapulu tiga bulang sapulu dua yang orang biasa bilang akang bulang Adar. Hari itu tu, bapa raja pung parenta yang su jadi atorang* tu musti jadi. Hari itu, orang Yahudi pung musu-musu pikir kata dong bisa kasi kala orang-orang Yahudi. Mar yang jadi, mala orang Yahudi yang kasi kala orang-orang yang binci dong. 2 Orang-orang Yahudi bakumpul di kota-kota di samua propinsi di dalang karajaang yang Bapa Raja Ahasweros parenta. Dong bakumpul par bunu orang-orang yang mau kasi binasa dong. Seng ada orang yang barani malawang orang-orang Yahudi, tagal dong samua takotang orang-orang Yahudi tu. 3 Mala, bapa raja pung orang-orang panting di samua propinsi, pegawe-pegawe yang pung pangkat tinggi, gubernur-gubernur, deng bupati-bupati jua dukung orang Yahudi dong, tagal dong taku Mordekai. 4 Barang, Mordekai tu orang yang paleng panting di istana. Samua orang su dengar soal dia. Labe hari dia pung kuasa labe tamba basar.5 Orang-orang Yahudi biking apa sa iko dong pung suka par dong pung musu-musu. Dong iko dong pung musu-musu deng parang la bunu abis dong. 6 Dalang benteng di kota Susan sa, orang-orang Yahudi bunu lima ratus orang. 7-10 Dong jua bunu Haman pung ana laki-laki sapulu orang tu lai. Haman tu pung bapa par Hamedata. Dia tu orang Yahudi pung musu. Haman pung anana yang dapa bunu tu nama: Parsandata, Dalfon, Aspata, Porata, Adalya, Aridata, Parmasta, Arisai, Aridai, deng Waisata. Mar, dong seng sonto orang-orang yang dong bunu tu pung barang-barang sadiki lai.
11 Hari itu tu jua, orang-orang lapor par bapa raja kata ada barapa banya orang yang dapa bunu dalang benteng di kota Susan tu. 12 La bapa raja bilang par Nyora Ester kata, “Nyora e, dalang benteng ni sa orang-orang Yahudi su bunu lima ratus orang, lapis deng Haman pung ana laki-laki sapulu tu lai. Apalai di propinsi-propinsi sisa? Seng tau lai apa yang dong su biking. Jadi sakarang, ale mau minta apa lai? Beta pasti kasi akang.”
13 Nyora Ester jawab kata, “Bapa raja e, kalo bapa pikir yang beta bilang ni bae, tolong kasi ijin orang-orang Yahudi yang tinggal di kota Susan ni par bunu dong pung musu-musu eso lai jua, macang deng yang dong biking hari ini ni. La tolong bilang orang par cucu Haman pung ana laki-laki sapulu tu pung bangke deng tiang lai jua.”
14 Bapa raja tarima Nyora Ester pung usul tu. Jadi, antua parenta antua pung juru tulis par tulis surat parenta la kasi kaluar akang dalang kota Susan. La orang cucu Haman pung ana laki-laki sapulu tu pung bangke deng tiang. 15 Akang pung eso, tanggal sapulu ampa Adar, orang-orang Yahudi di kota Susan tu bakumpul kombali. Dong bunu tiga ratus orang lai dalang kota tu, mar dong seng sonto orang-orang yang dong bunu tu pung barang-barang sadiki lai.
16-17 Tanggal sapulu tiga Adar, orang-orang Yahudi yang tinggal di propinsi-propinsi laeng jua bakumpul sama-sama par bela dong pung diri lai la kasi kala dong pung musu-musu. Dong bunu 75 ribu dari orang-orang yang binci dong tu, mar seng sonto dong pung barang-barang sadiki lai. Akang pung eso, tanggal sapulu ampa Adar, dong barenti bunu dong pung musu-musu la biking pesta, tagal dong pung hati paleng sanang bukang maeng. 18 Mar, orang-orang Yahudi di kota Susan barenti tanggal sapulu lima, tagal tanggal sapulu tiga deng sapulu ampa dong masi bunu dong pung musu-musu. Tanggal sapulu lima tu dong biking pesta, tagal dong pung hati paleng sanang. 19 Itu tu mangapa kong orang-orang Yahudi yang tinggal di kampong-kampong putus tanggal sapulu ampa Adar par bapesta. Hari itu tu, dong biasa pake akang par baku kiring makanang par orang-orang di tiris-tiris ruma.
Soal hari basar Purim
9:20-32
20 Abis orang-orang Yahudi bunu dong pung musu-musu tu, Mordekai tulis soal samua yang su jadi. Abis itu, dia kiring surat par samua orang Yahudi yang tinggal dalang samua propinsi yang Bapa Raja Ahasweros parenta, yang jau ka dekat dari kota Susan. 21 Dalang surat tu, dia parenta orang-orang Yahudi par biking tanggal sapulu ampa deng sapulu lima Adar par jadi hari basar sabang taong. 22 Barang, hari itu tu orang-orang Yahudi kasi kala dong pung musu-musu. Dolo dong pung hati susa, mar sakarang sanang. Dolo dong manangis marata, mar sakarang barsuka. Tagal itu, Mordekai parenta dong par musti biking hari tu jadi hari par bapesta deng makang patita, baku bage makanang deng orang di tiris-tiris ruma, deng kasi apapa par orang-orang kasiang. 23 Orang-orang Yahudi iko Mordekai pung parenta tu. Jadi, dong biking pesta hari basar tu sabang taong.
24 Dong biking bagitu tagal Haman su biking rencana jahat par bunu orang Yahudi kasi abis sama sakali. Dia tu Hamedata pung ana, Agak pung ana cucu, yang jadi orang Yahudi samua pung musu. Dia su buang undi yang orang bilang par pur par cari tau hari bae par kasi ancor deng par bunu dong kasi abis sama sakali. 25 Mar, waktu bapa raja tau soal itu, antua kasi kaluar surat parenta biar Haman pung rencana jahat yang dia su biking par orang-orang Yahudi tu bisa bale kanal dia sandiri. Antua jua suru orang par cucu Haman deng dia pung anana di tiang. 26 Tagal itu, hari basar tu nama Purim yang asal dari kata pur. Tagal samua yang Mordekai tulis dalang surat tu deng tagal samua yang dong parna lia deng rasa, 27 orang-orang Yahudi biking atorang par dong pung diri sandiri. Atorang tu jua dong biking par dong pung anana cucu deng orang-orang yang nanti maso jadi orang Yahudi lai. Atorang tu bilang kalo sabang taong dong musti biking hari basar Purim yang bajalang dua hari sepe-sepe tu, macang deng apa yang Mordekai su bilang dalang surat tu, pas tanggal yang dia su putus par biking akang. 28 Orang-orang Yahudi di samua mata ruma dalang samua propinsi deng kota deng dong pung anana cucu yang ada sakarang deng yang nanti lahir, dong musti inga deng biking hari basar Purim tu tarus-tarus. Dong musti biking bagitu biar orang-orang Yahudi seng parna lupa par biking akang la dong pung anana cucu jua nanti salalu inga akang.
29 La Nyora Ester, Abihail pung ana tu, dia tulis surat satu sama-sama deng Mordekai, orang Yahudi tu. Dia pake dia pung kuasa par kasi kuat Mordekai pung surat dolo soal hari basar Purim tu. 30 Abis itu, Mordekai kiring surat tu par orang-orang Yahudi samua yang tinggal di 127 propinsi yang Bapa Raja Ahasweros parenta. Dong dua harap biar orang-orang Yahudi aman salalu deng seng kurang apapa satu yang bae lai. 31 Dalang surat tu, dong dua parenta orang-orang Yahudi deng dong pung anana cucu par biking hari basar Purim tu pas waktu yang dong dua su bilang dalang surat tu. Dong jua musti inga akang macang deng dong inga hari basar laeng yang dong biking sabang taong, waktu dong puasa deng marata tagal hal-hal yang seng bae yang su jadi par dong. 32 Ester pung surat tu kasi kuat Mordekai pung surat soal atorang-atorang par biking hari basar Purim tu. Akang tatulis dalang buku sejara.