Rut jadi Boas pung bini
4:1-12
4
1 Hari itu jua, Boas pi ka tampa satu yang ada di kota pung pintu maso. Tampa tu, orang-orang jaga dudu par bakumpul. Boas pi ka situ par tunggu laki-laki satu. Laki-laki tu orang yang musti tolong Rut pung hidop. Bagitu Boas ada dudu, antua lia laki-laki tu lewat. Tarus Boas bilang, “Bu e, mari dudu di sini do.”Tarus, laki-laki tu datang la dudu.
2 Abis itu, Boas panggel sapulu orang dari pamimping-pamimping yang ada di kota tu la bilang, “Bapa-bapa e, mari dudu di sini do.”
Tarus, dong samua datang la dudu.
3 Boas bilang par laki-laki yang musti tolong Rut pung hidop tu kata, “Bu e, beta mau bicara soal katong pung famili Elimelek yang su mati tu pung tana. Antua pung bini Naomi yang baru datang dari negri Moab mau jual akang. 4 Beta pikir bu musti tau soal ini. Kalo bu mau bali akang, bali suda, biar pamimping-pamimping kota deng orang-orang yang dudu di sini jadi saksi. Mar kalo bu seng mau, bilang par beta biar beta tau. Bu ni, orang yang musti bali akang kamuka. Kalo bu seng mau, baru beta bisa bali akang.”
Laki-laki tu bilang, “Beta mau bali akang.”
5 Boas bilang lai, “Kalo bu bali tana tu dari Naomi, bu jua musti kaweng deng Rut. Rut tu, Mahlon yang su mati pung bini. Dia asal dari Moab. Bu kaweng deng dia biar dia bisa pung ana laki-laki. La ana laki-laki tu yang nanti jaga dong pung tana biar orang laeng seng bisa ambe akang.”
6 La laki-laki tu bilang, “Kalo musti macang bagitu, beta seng jadi bali tana tu lai. Barang kalo beta bali akang, nanti beta pung harta yang beta mau kasi par beta pung anana, akang takor lai. Ale bali akang suda. Beta seng mau lai.”
7 (Waktu itu di Israel, kalo orang mau jual ka mau tukar apapa satu, dia musti kasi lapas dia pung sandal la kasi akang par orang yang mau bali. Cara bagini ni yang orang Israel pake akang par jual-bali apapa satu.)
8 Jadi, laki-laki tu bilang, “Ale sa yang bali akang.”
Tarus, dia lapas dia pung sandal la kasi akang par Boas.
9 Abis itu, Boas bilang par pamimping-pamimping kota deng samua orang yang ada di situ kata, “Hari ini bapa-bapa dong samua su jadi saksi kalo beta su bali Elimelek, Kilyon, deng Mahlon pung tana deng harta dari Naomi. 10 Beta mau ambe Rut lai par jadi beta pung bini. Dia tu parampuang Moab. Dia tu Mahlon yang su mati pung bini. Beta nanti kaweng deng dia biar orang laeng seng bisa ambe Mahlon pung tana deng harta. La deng cara bagitu, Mahlon pung famili deng orang-orang yang ada di kota inga dia tarus. Hari ini, bapa-bapa dong samua su jadi saksi.”
11 Pamimping-pamimping kota deng samua orang yang ada di situ bilang, “Iyo, katong samua su jadi saksi. Katong minta TUHAN biking Rut yang nanti jadi ale pung bini tu macang Rahel deng Lea yang su kasi lahir ana banya par Yakub. Katong minta biar ale labe tamba kaya dari ale pung orang-orang Efrata deng banya orang kanal ale di kota Betlehem. 12 Katong minta lai biar TUHAN nanti kasi anana yang banya par Rut, parampuang muda tu, biar kamong jadi famili basar macang deng Peres. Peres ni Yehuda deng Tamar pung ana.”
Boas deng Rut pung ana lahir
4:13-17
13 Jadi Boas kaweng deng Rut. Antua tidor deng Rut la TUHAN kasi berkat basar par Rut sampe dia bisa deng badang la kasi lahir ana laki-laki satu.
14 Waktu ana laki-laki tu lahir, parampuang-parampuang bilang par Naomi kata, “Puji TUHAN! Antua seng kasi tinggal ale. Antua su kasi par ale cucu laki-laki yang nanti tolong ale pung hidop. Katong minta biar samua orang di Israel kanal ana tu. 15 Ana tu yang nanti biking sanang ale pung hati deng tolong ale pung hidop waktu ale su tua. Ale pung ana mantu tu paleng sayang ale. Dia tu labe bae dari ana laki-laki tuju orang. Dia su kasi cucu laki-laki satu par ale.”
16 Tarus, Naomi ambe ana tu la gendong dia. Antua piara dia bae-bae sampe basar. 17 Parampuang-parampuang yang tinggal dekat-dekat situ bilang kata, “Naomi su pung ana laki-laki satu.”
Dong kasi nama ana tu Obed. Obed ni Isai pung bapa. La Isai ni pung ana laki-laki par Daud.
Daud pung tete-nene moyang
4:18-22
18 Ini Peres pung anana cucu.
Peres tu pung ana par Hesron.
19 Hesron ni pung ana par Ram.
Ram tu pung ana par Aminadab.
20 Tarus, Aminadab ni pung ana par Nahason.
Nahason tu pung ana par Salmon.
21 Salmon ni pung ana par Boas.
Boas tu pung ana par Obed.
22 La Obed ni pung ana par Isai.
Isai ni pung ana par Daud.