Danyel dapa tanda kali kadua soal domba laki-laki deng kambing laki-laki
8:1-14
8
1 Pas taong katiga waktu Raja Belsyasar pegang parenta, beta Danyel dapa tanda par kali kadua dari Allah.a 2 Waktu itu, beta lia beta ada dalang benteng di kota Susan yang ada di propinsi Elam. Beta ada badiri di pinggir aer Ulai. 3 Beta angka muka la dapa lia domba laki-laki saekor yang pung tando dua panjang-panjang ada badiri di pinggir aer tu. Mar, tando yang satu labe panjang dari yang laeng.b Tando yang labe panjang tu, akang batumbu dari balakang. 4 Beta lia domba laki-laki tu ada tando ka barat, utara, deng salatang. Seng ada binatang saekor lai yang bisa lawang akang deng bisa lapas dari akang pung kuasa. Akang biking apa sa iko akang pung suka, baru akang jua paleng mangarti.5 Mar, waktu beta ada taru kira akang, skrek lai kambing laki-laki saekor datang dari sabala matahari maso. Akang ada pung tando satu yang batumbu di tenga-tenga mata deng mata. Akang lari langgar antero bumi paleng kancang paskali sampe akang pung kaki seng sonto tana sadiki lai. 6 Kambing tu pi par domba yang pung tando dua yang ada badiri di pinggir aer tu, la serang domba tu deng jumawa paskali. 7 Beta lia akang mangamu serang domba tu. Akang tando domba tu sampe domba pung tando dua tu pata deng seng kuat par malawang akang lai. Domba tu dapa lempar ka tana la kambing tu nai inja-inja akang deng seng ada satu lai yang bisa kasi lapas akang dari kambing tu pung kuasa.
8 Kambing tu labe hari labe tamba basar deng kuat. Mar, waktu akang su paleng hebat deng kuat paskali, akang pung tando basar tu pata. La tando ampa bua yang hebat batumbu ka ampa mata anging di tampa tando yang pata tu. 9 Dari tando ampa tu, ada satu tando yang kasi batumbu tando kacil satu. Tando kacil tu pung kuasa labe hari labe tamba basar sampe ka salatang, timur, deng ka Tana yang Bagus.c 10 Tando tu pung kuasa tamba basar sampe ka bintang-bintang di langit, la akang angka lempar tantara sorga babarapa tud ka dunya la nai inja-inja dong.* 11 Mala akang barani paskali par tantang tantara-tantara sorga tu pung Kapitang.e Akang larang orang-orang par seng bole kasi korbang binatang yang dong musti kasi sabang hari par Allah. Akang jua kasi rubu Tampa Sombayang Pusat yang orang biasa pake par somba Antua.f 12 La Antua kasi biar samua tu jadi deng kasi biar Antua pung orang-orang dapa parenta dari tando tu, tagal dong su bale balakang malawang Antua. Jadi, tando tu seng ambe pusing deng ajarang yang batul lai. La apa sa yang tando tu mau biking, akang jadi.
13 Tarus, beta dengar malekat satu bicara la malekat yang laeng lai bicara par malekat tu kata, “Sampe apa tempo samua yang Danyel lia tu akang jadi? Sampe apa tempo orang-orang bale balakang malawang Allah deng seng kasi korbang sabang hari par Antua? Sampe apa tempo Antua kasi biar Antua pung orang-orang deng Tampa Sombayang Pusat yang dong pake tu dapa inja-inja dari tando tu?”
14 Tarus, malekat yang partama tu bilang, “Sampe 2.300 pagi deng soreg lewat do, baru Tampa Sombayang Pusat tu Allah biking akang bae kombali macang deng yang kamuka.”
Malekat Gabriel kasi tau tanda yang Danyel dapa dari Allah tu pung arti
8:15-27
15 Waktu beta Danyel ada usaha par mangarti apa yang Allah kasi unju tu, skrek lai ada yang badiri di muka beta. Dia pung rupa macang manusia. 16 Tarus, beta dengar saorang pung suara dari aer Ulai kata, “Gabriel e! Tolong Danyel par mangarti samua yang Allah kasi unju par dia tu.”*
17 La Gabriel datang ka beta pung tampa badiri tu. Waktu dia datang, beta takotang paskali sampe beta jatu la tiarap di tana. Tarus Gabriel bilang par beta, “Manusia e! Ale musti mangarti kalo samua yang Allah su kasi unju par ale tu, itu tu soal apa yang nanti jadi waktu dunya mau kiamat.”
18 Waktu dia ada bicara, beta smaput la jatu deng muka di tana. Mar, dia pegang beta la tolong beta par badiri kombali. 19 Dia bilang, “Beta mau kasi tau par ale soal apa yang nanti jadi waktu dunya mau kiamat, waktu Allah kasi unju Antua pung morka. 20 Domba laki-laki yang pung tando dua, yang ale lia tu, itu tu orang Media deng Persia pung raja-raja. 21 Kalo kambing laki-laki yang pung bulu kasar tu, itu tu karajaang Yunani. La tando basar di tenga-tenga akang pung mata deng mata tu, itu tu dong pung raja yang partama.h 22 Waktu tando basar tu pata, la tando ampa bua yang labe kacil batumbu ganti akang, itu akang pung arti kalo karajaang Yunani tu nanti tapica jadi ampa karajaang.i Mar, seng ada dari ampa karajaang tu yang kuat macang deng yang partama.”
23 Malekat Gabriel bilang lai, “Waktu ampa karajaang tu su mau abis deng waktu dong pung kajahatang su seng bisa urus lai, raja satu yang paleng jahat paskali deng yang tukang parlente putar bale nanti datang. 24 Dia nanti jadi paleng kuat. Mar, dia pung kuat tu bukang asal dari dia pung diri. Dia nanti kasi rusak apa sa ancor-ancor deng samua yang dia biking pasti jadi. Dia nanti kasi ancor orang-orang hebat deng kasi ancor Allah pung orang-orang. 25 Tagal dia pung akal panjang, dia bisa parlente banya orang. Dia nanti rasa diri paleng hebat. Dia seng bilang apapa kamuka do, tau-tau lai dia su kasi ancor banya orang. Dia jua barani tantang Raja yang pung kuasa par samua raja yang ada di dunya. Mar dia dapa kasi ancor, mar bukang manusia yang biking.
26 La apa yang Allah kasi unju par ale dalang mimpi soal korbang pagi deng sore tu samua nanti jadi.* Mar masi lama lai. Jadi, jang bilang akang par sapa-sapa do.”
27 Abis samua yang jadi tu, beta pung kaki tangang lombo paskali sampe beta saki babarapa hari. Waktu beta bae, beta bangong la biking beta pung karja par raja kombali. Mar, beta balisa pikir samua yang beta lia dalang mimpi tu. Beta seng mangarti akang pung maksud apa.