Allah kasi lia binatang ampa ekor par Danyel
7:1-8
7
1 Satu kali bagini, pas taong partama waktu Raja Belsyasar pegang parenta di karajaang Babel,a Danyel mimpi la dapa lia tanda dari Allah waktu dia ada tidor. Tarus, dia tulis samua yang dia lia dalang mimpi tu. 2 Dia bilang, “Waktu beta ada tidor malang, beta dapa tanda. Beta dapa lia anging batiop dari ampa mata anging sampe galombang mangamu di lautang basar. 3 Tarus, beta lia binatang basar ampa ekor kaluar dari dalang lautang. Binatang-binatang tu seng ada yang sama. Akang beda-beda.* 4 Binatang yang partama akang macang deng singa, mar akang ada pung sayap macang deng burung guheba.b Beta tinggal kong nganga akang tarus sampe beta lia akang pung sayap tacabu. Akang tarangka dari tana la badiri deng kaki dua macang deng manusia. La binatang ni, akang dapa kasi pikirang macang deng manusia pung pikirang. 5 Tarus, beta dapa lia binatang yang kadua. Binatang ni akang laeng lai. Akang macang deng beruang.c Akang badiri miring sabala deng ada gigi tulang rusuk tiga panggal. Tarus, beta dengar ada suara yang bilang par akang kata, ‘Badiri! Pi makang daging banya-banya iko suka suda!’
6 La beta lia binatang katiga kaluar dari dalang lautang. Binatang ni akang macang deng macan tutul. Di akang pung balakang ada sayap ampa, macang deng burung pung sayap. Akang pung kapala jua ada ampa lai.d La binatang ni dapa kuasa par pegang parenta.*
7 Abis itu, dalang mimpi yang sama jua, beta lia binatang kaampa kaluar dari dalang lautang. Binatang ni akang laeng lai. Akang paleng ganas, paleng kuat paskali, deng biking orang yang lia akang paleng takotang.e Akang pung gigi dari besi baru paleng basar-basar. Akang makang kasi ancor la inja-inja apa yang masi sisa. Binatang ni akang seng sama deng binatang-binatang yang kamuka. Akang ada pung tando sapulu bua.*
8 Waktu beta ada taru kira akang pung tando-tando bae-bae, skrek bagini ada tando kacil satu batumbu di tenga-tenga tando sapulu tu, sampe tando tiga yang batumbu kamuka tu tacabu. Di akang tando kacil tu ada mata macang deng manusia pung mata deng mulu yang suka bicara mangarti.*
Danyel dapa tanda soal Satu Orang yang hidop tarus-tarus
7:9-14
9 Waktu beta ada taru kira binatang-binatang tu, beta lia ada yang ator kadera-kadera. Tarus, Antua Yang Hidop Tarus-Tarus dudu di Antua pung kadera. Antua pung pakiang puti macang santang pukat. Antua pung rambu puti macang deng kapas. Antua pung kadera manyala macang deng api, la akang pung roda-roda jua dari api yang manyala basar.* 10 Beta lia bagini, ada api kaluar tarus-tarus dari muka Antua, macang deng aer hener. Malekatf ribu-ribu siap par biking Antua pung mau deng malekat ribu-ribu badiri di muka Antua. La hakim-hakim dudu la mulai buka buku-buku.*
11 Beta lia tarus, tagal tando kacil tu seng barenti-barenti bicara mangarti. Beta lia tarus sampe binatang tu dapa bunu la akang pung bangke dapa lempar dalang api basar sampe tabakar abis. 12 Binatang-binatang laeng tu pung hak par pegang parenta dapa cabu. Mar, akang samua dapa kasi biar par hidop sampe waktu yang su dapa ator.
13 Dalang mimpi malang-malang tu jua, beta lia kaya ada apapa satu yang macang manusiag datang dalang awang-awang. Dia datang la dapa antar par Antua yang Hidop Tarus-Tarus tu. 14 Tarus, dia dapa kuasa, hormat, deng hak par pegang parenta macang deng raja. La samua orang dari sagala bangsa, suku, deng bahasa somba dia. Dia pegang kuasa tarus-tarus, seng parna abis-abis. Deng seng ada yang bisa kasi ancor dia pung karajaang.*
Danyel pung mimpi pung arti
7:15-28
15 Samua yang beta lia dalang beta pung mimpi tu biking beta bingong deng balisa. 16-17 La beta pi par malekat satu yang ada badiri di sana. Tarus, beta minta dia kasi tau samua yang beta su lia tu pung arti apa. Jadi, malekat tu bilang akang pung arti par beta bagini, ‘Binatang basar ampa ekor tu pung arti ampa raja basar yang nanti pegang parenta di karajaang-karajaang dunya. 18 Mar abis itu, Allah yang Paleng Tinggi nanti kasi kuasa par Antua pung orang-orang par pegang parenta tarus-tarus, mala seng stop-stop.’*
19 Tarus, beta mau tau paskali soal binatang kaampa yang beda paskali dari binatang-binatang yang laeng tu. Binatang tu biking orang takotang. Akang pung gigi-gigi dari besi deng kuku-kuku dari tambaga tu kasi ancor deng makang apa yang akang su tangkap, la yang sisa akang nai inja-inja. 20 Beta jua mau tau paskali soal tando sapulu yang ada di akang pung kapala deng soal tando kacil satu yang ada pung mata deng mulu yang suka bicara mangarti. Tando kacil tu, tando yang batumbu dari balakang la biking sampe tando tiga yang batumbu kamuka tu tacabu. Akang labe hebat dari tando-tando yang laeng.
21 Waktu beta ada taru kira akang, beta lia bagini, akang ada baku prang deng Allah pung orang-orang la kasi kala dong tarus,* 22 sampe Antua Yang Hidop Tarus-Tarus datang la putus kalo Allah yang Paleng Tinggi pung orang-orang tu yang batul. La sakarang ni akang pung waktu par orang-orang tu tarima kuasa par pegang parenta.*
23 Jadi, malekat tu bilang bagini par beta, ‘Binatang kaampa tu karajaang kaampa yang nanti ada di bumi yang seng sama deng tiga karajaang kamuka. Karajaang ni nanti kasi ancor, inja-inja, deng talang bumi antero-antero. 24 Sapulu tando tu pung arti, kalo nanti ada sapulu raja yang pegang parenta di akang karajaang tu. Abis itu, nanti ada raja satu laeng lai yang pegang parenta. Dia ni nanti beda paskali deng raja-raja yang kamuka deng dia nanti kasi kala tiga raja.* 25 Dia nanti hojat Allah yang Paleng Tinggi deng seng barenti-barenti siksa Antua pung orang-orang. Dia jua nanti usaha par ganti dong pung hari-hari basar deng usaha par ganti Tuhan pung atorang-atorang. Dia nanti parenta dong kira-kira tiga taong stenga.* 26 Mar, hakim-hakim nanti dudu par putus dia pung parkara. La dia pung kuasa nanti dapa cabu la dia nanti dapa kasi ancor sampe abis sama sakali. 27 Jadi, Allah yang Paleng Tinggi nanti kasi sagala karajaang deng kuasa yang ada di dunya ni par Antua pung orang-orang. Dong pung kuasa par pegang parenta tu nanti seng abis-abis deng samua yang pung kuasa nanti tundu deng seng malawang dong.’*
28 Itu tu yang beta mau bilang soal beta pung mimpi. Beta pung hati balisa deng beta pung muka pucat. Mar, beta seng carita soal samua tu par saorang lai.”