Danyel dalang singa pung goa
6:1-29
6
1 Waktu Raja Belsyasar dapa bunu, Darius dari Media nai par pegang parenta di karajaang Babel.a Waktu itu antua umur 62 taong. 2 Antua angka 120 gubernur par pegang parenta di 120 propinsi dalang karajaang tu. 3 Di atas gubernur-gubernur tu, ada tiga orang lai yang antua angka par jaga lia gubernur-gubernur tu pung karja kalo akang batul ka seng biar antua seng rugi. Satu dari dong tiga tu Danyel.b 4 Dia pung karja paleng bagus, labe dari gubernur-gubernur deng dua orang laeng yang dapa angka sama-sama deng dia par jaga lia gubernur-gubernur tu pung karja. Barang, dia paleng pintar deng pung pikirang tajang. Tagal itu, Raja Darius mau angka dia par jadi antua pung orang parcaya par pegang parenta di antua pung antero karajaang. 5 Akang biking sampe gubernur-gubernur deng dia pung tamang dua tu culas dia. Jadi, dong cari-cari alasang par kasi sala dia dalang dia pung karja par karajaang. Mar, dong seng dapa alasang sadiki lai. Barang, dia ni seng parna parlente, seng parna makang pancuri dalang karja, deng seng parna lari dari dia pung karja. 6 Jadi dong bilang kata, “Katong seng dapa apapa satu yang sala dalang Danyel pung karja. Katong cuma bisa kasi sala dia kalo itu soal dia pung ibada par Allah yang dia somba.”7 Abis itu, dong pi rame-rame par raja la bilang kata, “Bapa Raja Darius yang katong hormat! Katong harap biar bapa salamat deng umur panjang! 8 Katong samua ni gubernur-gubernur, orang-orang yang pung tugas par jaga lia gubernur-gubernur tu pung karja, bupati-bupati, camat-camat, deng orang-orang yang bantu bapa par putus parkara-parkara panting. Katong samua ni su satu hati par minta bapa tolong biking atorang satu. Atorang tu bilang bagini, ‘Dalang tiga pulu hari sepe-sepe, seng bole ada satu orang lai yang bisa somba dewa ka manusia. Cuma bapa sa yang dong musti somba. Sapa yang malawang atorang tu, dia nanti dapa lempar dalang singa pung goa.’ 9 Jadi, katong minta bapa kasi kaluar surat parenta satu soal atorang tu la cap akang iko karajaang Media deng Persia pung atorang-atorang, biar seng ada satu orang lai yang bisa cabu akang kombali.”
10 Jadi, Raja Darius biking surat parenta tu la cap akang.
11 Waktu Danyel dengar soal surat parenta tu, dia pulang ka dia pung ruma la nai ka dia pung kamar di lante atas. Kamar tu pung jandela-jandela tabuka deng baku tangada deng kota Yerusalem. La dia tikang lutu sombayang deng puji-puji Allah tiga kali sahari, macang deng yang biasa dia biking. 12 La orang-orang basar yang seng suka dia tu, dong rame-rame pi ka dia pung ruma la baku dapa dia ada sombayang minta tolong dari Allah yang dia somba. 13 Abis itu, dong samua paparipi pi lapor Danyel par bapa raja. Dong bilang, “Bapa Raja Darius yang katong hormat! Bapa su kasi kaluar surat parenta satu yang bilang kalo dalang tiga pulu hari sepe-sepe, seng bole ada satu orang lai yang bisa somba dewa ka manusia. Cuma bapa sa yang dong musti somba. La kalo ada orang yang malawang akang, dia nanti dapa lempar dalang singa pung goa. Batul to?”
Raja bilang, “Itu batul. Akang su jadi karajaang Media deng Persia pung atorang deng seng ada satu orang lai yang bisa cabu akang.”
14 Dong bilang lai, “Satu dari orang-orang Yehuda yang dapa bawa deng paksa dari dong pung gunung-tana yang nama Danyel tu, dia seng taru hormat par bapa deng seng iko bapa pung parenta. Dia tinggal kong sombayang tiga kali sahari par Allah yang dia somba.”
15 Waktu raja dengar dong bilang bagitu, antua pung hati susa paskali. Antua mau sa par kasi salamat Danyel. Sampe matahari maso, antua masi tinggal kong cari jalang tarus. 16 La orang-orang basar tu rame-rame bale kombali par Raja Darius la bilang kata, “Bapa raja yang katong hormat! Bapa pasti tau kalo ada atorang dalang karajaang Media deng Persia yang bilang kata, kalo bapa raja su kasi kaluar surat parenta la cap akang, seng ada satu orang lai yang bisa roba akang to?”
17 Abis itu, raja parenta par tangkap Danyel la lempar dia dalang singa pung goa. Tarus, antua bilang par Danyel, “Beta harap Allah yang ale somba tarus-tarus tu nanti kasi salamat ale.”
18 Abis itu, orang-orang tutu mulu goa deng batu basar satu. Tarus, raja pake antua pung cincing par cap akang. Bagitu lai deng orang-orang basar. Dong jua pake dong pung cincing par cap akang. Itu tu tanda kalo seng bole ada satu orang lai yang bisa kasi kaluar Danyel dari goa tu. 19 Abis itu, bapa raja bale kombali ka antua pung istana. Antua puasa satu malang antero-antero deng seng mau orang datang par biking sanang antua pung hati. Antua jua seng dapa tidor. 20 Akang pung amper siang bagini, antua bangong la paparipi pi ka singa pung goa tu. 21 Waktu antua sampe, deng hati yang paleng susa paskali antua panggel-panggel Danyel kata, “Danyel, Danyel e! Sio Allah yang hidop pung orang suru-suru e! Allah yang ale somba tarus-tarus tu bisa kasi salamat ale dari singa-singa tu ka seng?”
22 Danyel bilang, “Bapa raja yang beta hormat! Beta harap biar bapa salamat deng umur panjang! 23 Allah yang beta somba tu su suru Antua pung malekat datang tutu singa-singa pung mulu sampe akang samua seng bisa biking apapa beta. Allah kasi salamat beta tagal Antua tau kalo beta seng biking sala apapa par Antua deng par bapa raja.”
24 Waktu bapa raja dengar Danyel bicara, antua pung hati paleng sanang paskali. La antua parenta orang-orang par kasi kaluar Danyel dari dalang goa tu. Waktu dong kasi kaluar dia, dong lia dia seng ada pung luka sadiki lai. Samua tu tagal dia parcaya Allah yang dia somba. 25 Abis itu, raja kasi kaluar parenta par tangkap orang-orang yang su tudu Danyel tu la angka lempar dong dalang goa lapis deng dong pung anana deng bini-bini samua. Waktu dong balong sampe di goa pung dasar lai, singa-singa tu su balumpa rabe dong. Mala akang kasi ancor dong pung tulang-tulang panggal-panggal.
26-27 Tarus, Raja Darius kiring surat par orang-orang di samua bangsa, suku deng bahasa yang ada di dunya ni.c Surat tu bilang bagini, “Tabea! Beta ni Raja Darius. Beta harap dong samua pung hidop dame deng seng kurang apapa satu yang bae lai. Deng surat ni, beta parenta samua orang yang ada di beta pung karajaang par musti taru hormat deng somba Allah yang Danyel somba!
Barang, Antua tu Allah yang hidop
deng yang ada tarus-tarus.
Antua pegang parenta tarus-tarus
deng pung kuasa seng abis-abis.
28 Antua tolong deng kasi salamat manusia.
Antua biking tanda-tanda herang di langit deng di bumi.
Antua su kasi salamat Danyel
dari singa-singa yang mau bunu dia.”
29 Jadi, waktu Raja Darius deng Raja Kores dari Persia pegang parenta di situ, Danyel jadi orang yang pung pangkat tinggi.d