Tulisang di dinding
5:1-12
5
1 Satu kali bagini, waktu Raja Belsyasara pegang parenta di karajaang Babel, antua biking pesta basar satu. Antua undang saribu orang yang pung pangkat tinggi datang ka pesta tu la minong anggor sama-sama deng dong. 2 Waktu antua dong su minong banya, antua parenta orang par ambe cawan-cawan dari mas deng perak, yang antua pung bapab Nebukatnesar dolo ambe dari orang Yahudi pung Tampa Sombayang Pusat di kota Yerusalem. Antua biking bagitu biar antua deng antua pung orang-orang yang pung pangkat tinggi, antua pung bini-bini deng bini-bini piara bisa pake akang par minong anggor. 3 Dong bawa akang samua rabu-rabu par antua. Tarus, dong samua minong anggor deng akang. 4 Waktu dong minong, dong tinggal kong puji-puji dong pung dewa-dewa yang dong biking dari mas, perak, tambaga, kayo, deng batu.5 Waktu dong ada asek minong, skrek bagini ada manusia pung jari tangang tulis di dinding istana pas di tampa yang kana sinar lampu paleng tarang sampe raja bisa dapa lia tangang yang ada tulis tu bae-bae. 6 Antua pung muka langsung puti macang deng tembok. Antua takotang stenga mati sampe antua pung lutu-lutu gamatar deng seng kuat badiri lai. 7 Tarus antua bataria basar-basar suru orang panggel samua orang yang tau lia-lia, tukang tiop-tiop, tukang baruba, deng tukang cari tau. Waktu dong samua tu su ada, raja bilang par dong kata, “Sapa yang bisa baca tulisang tu deng bilang akang pung arti par beta, beta nanti kasi baju panjang luar dari kaeng warna biji gandaria par dia deng kasi pake rante mas yang jadi tanda hormat di dia pung leher. Beta jua nanti angka dia jadi orang nomor tigac di beta pung karajaang.”
8 Dari samua orang yang pung pikirang tajang yang datang par bapa raja tu, seng ada satu orang lai yang bisa baca tulisang tu ka bilang akang pung arti par antua. 9 Bapa raja labe tamba takotang deng antua pung muka labe tamba pucat lai. La antua pung orang-orang yang pung pangkat tinggi tu, dong lia babingong samua.
10 Waktu bapa raja pung mama dengar bapa raja deng antua pung orang-orang yang pung pangkat tinggi tu bicara, bapa raja pung mama maso ka tampa pesta tu la bilang par bapa raja kata, “Bapa raja yang beta hormat! Beta harap biar bapa salamat deng umur panjang! Kasi tenang bapa raja pung hati la jang taku sampe pucat macang bagitu! 11 Beta bilang bagitu, tagal dalang karajaang ni ada laki-laki satu yang dewa-dewa yang kudus pung roh ada dalang dia. Waktu Raja Nebukatnesard pegang parenta, dia top tagal dia tau banya hal, paleng pintar, deng pung pikirang tajang macang deng dewa. Bapa pung bapa su angka dia par jadi pamimping par samua orang yang tau lia-lia, tukang tiop-tiop, tukang baruba, deng tukang cari tau. 12 Dia paleng pintar, tau banya hal, deng pung pikirang tajang. Dia jua bisa kasi tau mimpi pung arti, kasi tau apapa yang tatutu mati, deng cari jalang par hal-hal yang susa. Dia pung nama Danyel, mar bapa pung bapa biasa panggel dia par Beltsasar. Panggel dia sakarang jua. Dia nanti bilang tulisang tu pung arti.”
Danyel kasi tau tulisang di dinding pung arti
5:13-30
13 Abis bapa raja pung mama bilang soal Danyel tu, orang-orang bawa Danyel par raja. La antua tanya dia kata, “Ale ni Danyel ka? Ale ni satu dari orang Yahudi yang beta pung bapa bawa deng paksa dari kamong pung gunung-tana tu ka? 14 Beta su dengar kalo dewa-dewa pung roh ada dalang ale. Beta jua dengar kalo ale pintar paskali, tau banya hal, deng pung pikirang paleng tajang. 15 Beta su suru orang bawa orang yang tau lia-lia, tukang tiop-tiop, tukang baruba, deng tukang cari tau par baca tulisang di dinding tu deng bilang akang pung arti. Mar, seng satu orang lai yang bisa. 16 Beta baru dengar sa kalo ale ni bisa kasi tau arti deng bisa cari jalang par hal-hal yang susa. Jadi, kalo ale bisa baca tulisang tu deng bilang akang pung arti lai, beta nanti kasi baju panjang luar dari kaeng warna biji gandaria par ale deng kasi pake rante mas yang jadi tanda hormat di ale pung leher. Bukang itu sa. Beta nanti angka ale jadi orang nomor tiga di beta pung karajaang ni.”
17 Tarus Danyel bilang, “Bapa raja yang beta hormat! Bapa seng parlu kasi samua-samua tu par beta. Kasi akang par orang laeng sa. Beta nanti baca tulisang tu deng bilang akang pung arti par bapa raja.
18 Bapa raja yang beta hormat! Allah yang Paleng Tinggi su biking sampe Raja Nebukatnesar, raja pung bapa tu, jadi raja basar deng biking sampe orang-orang di antero dunya puji-puji deng taru hormat par antua. 19 La tagal Allah biking antua jadi orang hebat, samua bangsa di antero dunya gamatar deng takotang di muka antua. Sapa yang antua mau bunu, antua bunu deng sapa yang antua mau kasi biar dong hidop, antua kasi biar dong hidop. Sapa yang antua mau angka, antua angka deng sapa yang antua mau kasi turung, antua kasi turung. 20 Mar, waktu antua jadi sombong deng kapala batu tagal rasa diri talalu basar, Allah cabu antua pung hak par jadi raja deng biking sampe orang-orang seng taru hormat par antua sadiki lai. 21 Antua dapa user la seng tinggal deng manusia lai. Antua pung pikirang manusia yang waras jadi pikirang yang seng waras macang binatang. La antua tinggal sama-sama deng keledai liar la makang rumpu macang deng sapi. Ombong kasi babasa antua pung badang. Akang pung konci rekeng, antua mangaku kalo Allah yang Paleng Tinggi tu pung kuasa par samua karajaang di dunya deng bisa kasi akang par sapa sa yang Antua pili.
22 Bapa Raja Belsyasar yang beta hormat! Bapa ni orang yang ganti antua,e mar bapa seng mau randa hati biar kata bapa tau soal samua tu. 23 Bapa raja mala barani tantang Tuhan yang pung kuasa di sorga. Bapa raja suru orang-orang bawa cawan-cawan yang asal dari orang Yahudi pung Tampa Sombayang Pusat. La bapa, bapa pung orang-orang yang pung pangkat tinggi, bapa pung bini-bini deng bini-bini piara dong samua minong anggor deng akang. Bapa tinggal kong puji-puji dewa-dewa yang dapa biking dari mas, perak, besi, tambaga, kayo, deng batu, yang seng bisa lia, dengar, deng mangarti apapa. Mala, raja seng puji-puji Allah yang pegang raja pung tali napas deng ator raja pung jalang hidop. 24 Tagal itu, Allah kiring tangang tu par tulis tulisang di dinding tu.
25 Tulisang tu bilang bagini, ‘Mene, mene, tekel, uparsin.’ Akang pung arti, ‘Rekeng, rekeng, timbang, deng bage.’
26 Rekeng tu pung arti, Allah su rekeng bapa raja pung waktu par pegang parenta. Waktu tu su abis.
27 Timbang tu pung arti, Allah su timbang bapa raja deng dacing. Allah dapa bapa raja pung timbangang paleng haringang.
28 Bage tu pung arti, Allah nanti bage-bage bapa raja pung karajaang ni par orang Media deng Persia.”
29 Abis bapa raja dengar samua yang Danyel bilang, antua parenta orang par kasi pake Danyel deng baju panjang luar dari kaeng warna biji gandaria deng rante mas di dia pung leher. Oras itu jua, raja angka Danyel jadi orang nomor tiga yang pegang kuasa di karajaang tu.
30 Malang itu tu jua Raja Belsyasar yang parenta Babel tu dapa bunu.