Danyel
Danyel deng dia pung tamang tiga orang dapa pili par karja di Raja Nebukatnesar pung istana
1:1-21
1
1 Satu kali bagini, pas taong katiga waktu Raja Yoyakim pegang parenta di karajaang Yehuda, Raja Nebukatnesar datang deng antua pung tantara-tantara par serang kota Yerusalem.a Antua tu orang Babel pung raja. Dong tutu kota tu sampe orang-orang seng bisa lari kaluar. 2 Tuhan kasi biar antua kasi kala Raja Yoyakim dari Yehuda tu la rampas cawan-cawan saparu yang ada di orang Yahudi pung Tampa Sombayang Pusat. Waktu antua pulang ka Babel,b antua bawa cawan-cawan tu, lapis deng orang-orang yang dapa tahang. Tarus, antua bawa akang ka tampa sombayang par antua pung dewa la simpang akang di tampa simpang harta yang ada di situ.3-4 Abis itu, antua parenta antua pung kapala ruma tangga istana yang nama Aspenas kata, “Aspenas e, pi pili babarapa laki-laki muda dari Israel yang katong tahang yang asal dari raja ka orang-orang panting pung turunang. Dong musti gaga deng seng cacat. Dong jua musti tau banya hal, pintar, deng bisa balajar apapa satu yang baru deng capat, deng pantas par karja di beta pung istana. Ale musti ajar orang Babelc pung bahasa deng tulisang par dong.”
5 Bapa raja bilang lai kata, “Sabang hari, dong musti makang makanang deng minong anggor yang sama deng apa yang beta biasa makang deng minong. Ale musti ajar dong tiga taong tare-tare. Abis itu, baru dong bisa karja par beta.”
6 Dari samua laki-laki muda yang dapa pili tu, ada Danyel, Hananya, Misael, deng Asarya. Dong ampa tu orang Yehuda. 7 Kapala ruma tangga tu ganti dong ampa pung nama.
Danyel pung nama jadi Beltsasar,
Hananya jadi Sadrak,
Misael jadi Mesak,
la Asarya jadi Abetnego.
8 Danyel deng dia pung tamang-tamang su putus seng mau biking kotor dong pung diri deng cara makang makanang deng minong anggor yang raja biasa makang deng minong.d Jadi, dia bilang par Aspenas kata, “Bapa e, kasi makanang deng minomang yang laeng jua par katong.”
9 Allah tolong Danyel sampe Aspenas sayang dia deng pung hati bae par dia. 10 Mar, Aspenas bilang par dia, “Nyong e, beta taku! Barang, raja sandiri yang parenta kalo kamong musti makang makanang deng minong anggor yang sama deng antua. Jang sampe antua lia kamong kurus kalo banding deng laki-laki muda laeng yang satu umur deng kamong, la antua nanti mara la bunu beta tagal kamong pung mau tu.”
11 Abis Danyel dengar bagitu, dia pi par orang yang dapa unju dari Aspenas par urus dia deng dia pung tamang tiga pung makang deng minong. Danyel bilang kata, 12 “Bapa e, coba tes katong! Dalang sapulu hari tare-tare, coba kasi sayor deng aer puti sa par katong makang deng minong. 13 Lapas sapulu hari tu, coba banding katong pung rupa deng dong yang makang makanang deng minong anggor yang sama deng raja pung tu. Tarus, bapa lia kalo katong ni kuat ka seng. Abis itu, bapa bisa putus mau biking apa par katong iko apa yang bapa anggap itu bae.”
14 Jadi, dia tarima Danyel dong pung usul tu la tes dong sapulu hari tare-tare. 15 Abis sapulu hari tu, dong ampa pung badang labe kuat deng labe gamu, labe dari laki-laki muda laeng yang makang makanang deng minong anggor yang sama deng raja pung. 16 Tagal itu, dia seng kasi dong makang makanang deng minong anggor yang sama deng apa yang raja biasa makang deng minong lai. Mar, dia cuma kasi dong makang sayor deng minong aer puti sa. 17 Allah biking dong ampa tu tau banya hal deng mangarti soal macang-macang tulisang deng mangarti apa sa yang dong balajar. Allah jua biking Danyel mangarti sagala macang mimpi deng tanda.
18 Pas waktu yang bapa raja kasi par dong balajar tu su abis, Aspenas bawa laki-laki muda samua tu par antua. 19 Bapa raja bicara deng laki-laki muda samua tu la tanya dong satu abis satu. Mar dari dong samua tu, antua seng dapa satu orang lai yang pintar macang deng Danyel, Hananya, Misael, deng Asarya. Jadi, antua pili dong ampa par karja di antua pung istana. 20 Sabang kali antua tanya soal masala-masala panting yang antua musti pikir deng mangarti akang bae-bae, antua lia kalo dong ampa pung nasehat deng jawab tu sapulu kali labe bagus dari samua orang yang tau lia-lia deng samua tukang tiop-tiop yang ada di sagala tampa yang antua parenta. 21 Danyel karja tarus di istana tu sampe Raja Korese dari negri Persia jadi raja di Babel.