Yohanesé
Habar ta Fié ta Yohanesé nlefo
Kitab Yohanesé ni wlólo né
Habar ta Fié: Po kitab Yohanesé, Yohanesé nlefo ‘Habar ta Fié’ (B. Ind: Injil pari Kabar Baik), ni ngale Jou Lahatala nané Yesus Kristusé nwóm po dunia njé ni wlólo nte, se kyat pai le ga ndélé I, Jou Lahatala nase nféyangésé keé nó sélsólé né, bóngo nhidup re Jou Lahatala sogado fajé néli le.
Kyat ta nlefo kitabé Yohanésé nje: Kyat ta runé fié Jou ni Méiténé né, félé be récegé Yohanesé ta nlefo kitabé nje, masike Yohanesé néceg pa ta i nlefo né. Yohanesé njé Yesusé ni motemote isó. I ta nécegé, i ro, “motemote ta Yesusé tadélé nmésié i njé” (Yoh. 13:23, 19:26, 20:2, 21:2-7, 21:20-24). Yohanesé njé reni fténo isó ngósno Yakobusé. Si dórén luwé né Zebedeusé ni ntu si. Si ma Yesusé ni motemote si nóté. Yesusé nfangósno si dórén luwé né ‘Boanerges’, (ta ni ngale né, gliri pélóy dolo rub ta téploré né). Po waktu ta kyaté né rsalibé keé Yesusé né, Yesusé npo ni neke po Yohanes ni bo néjaga i (Yoh. 19:27). Po Yesusé ni motemote yófésó re séluwé né, Yohanesé njé po faywóbno ta ndélé Yesusé re npangéné nmulé né (Yoh. 20:8). I ma ta faywóbno nuné ntubé waktu ta Yesusé re npangéné nmulé né, sogado Yesusé nfaftulo ni diri po ni motemote nesté ni, po talaga Tiberias lapo lo né (Yoh. 21:1-7).
Kitab ta njéi rlefo i po pai ni: Yohanesé nlefo ni kitabé nje po kyat pai le, bo runé re rdélé ta Yesusé njé Kolano ta Jou Lahatala re néjaji nwómé bo nfasalamaté kyaté né. I Jou Lahatala ni Ntu I, I ro ta npe kyaté né bisa rhidup re Jou Lahatala sogado fajé néli lé (Yoh. 20:31).
Dodoto-dodoto ta po kitab Yohanesé: Po Kitab Yohanesé njé ni wlólo né, Yohanesé nfatailo Yesusé njé tadolo Jou Lahatala ni Méitén I ro. Sababta tatubé lima lesu ta dunia nje ndadi i pafule né, Yesusé re ndadi Jou ni Méitén I ro, sogado ntebé yama ndadi Kyat I se ntolén I po kyaté-kyaté né riri fapéluné (Yoh. 1:1-18). Rewóré ta néi, Yohanesé néfétén mujizat séfit ta Yesusé npe né, se nfaftulo ta fatuwé Yesusé njé Jou Lahatala ni Ntu I. Mujizat ta I néféténé né fan faje: Yesusé npe wóé né se ndadi angguré (Yoh. 2:1-11), Yesusé nfafié pejabat isó ni ntu món isó ta npisé po ni kadatongé lo (Yoh. 4:43-54), Yesusé nfafié kyat isó ta nkafé, po talaga Bethseda lapo (Yoh. 5:1-18), Yesusé nfamnómé kyat calén lim re glé (Yoh. 6:1-15), Yesusé nfan po wóé pépo lo (Yoh. 6:16-21), Yesusé nfafié kyat ta nébyafé njé (Yoh. 9:1-41) re Lazarusé nmóté mayta Yesusé nfépangén i nmulé (Yoh. 11:1-44).
Ta Yesusé nfasodoto kyaté né, npe adeade félé, "Ga Ya óro, mnóm ta npe sogado kyaté né rhidup re Jou Lahatala sogado faje néli né" (Yoh. 6:35), "Ya nte manano ta kfaménano kyat po dunia njé ni wlólo nte wlori né" (Yoh. 8:12), “Ya nte dolo ngówén ta domba né bo rcung po riri kandangé wlólo né” (Yoh. 10:7), bóngo reni ta iglé nóté. Yohanesé ma néfétén ta masike Abrahamé nwómé ntubé, mayta Yesusé ma re I pocé nóté, se I ta re nwómé ntubé (Yoh. 8:58). Ni ngale, ta po faywóbno né Yesusé njé re I pocé, bóngo I ma nase I pocé sogado faj néli le.