Yesusé néusé ni motemote nesté sóori né
13
Góli be ngané esó le, kyat agama Yahudi né riri ngénngan ta pélóy ta réceg Paska né re bo nwómo i ro. Riri ngénngan ta néi, rfatélolmo po waktu ta Jou Lahatala nfabebasé keé riri délut tatubé lima ta bangsa Mesiré né rpeé riri béyak si né. Se Yesusé nuné, re mnuw pana I bo nfatoléné keé dunia njé bo nfan I po ni Moke Jou Lahatala njé ni. I nmésié ni kyaté-kyat ta po dunia nte ta re rdadi I ni kyat si né, I tadélé nmésié si sogado nmóté.2 Po dorém ta néi, Yesusé I re ni motemote nesté rtoléné bo rémnómé. Pocé ni motemote isó ta ngósno Yudasé njé, Simon Iskarioté ni ntu i. Setané né riri kolano njé re nfarwae keé ni wlo njé se bo nwagé keé Yesusé.
3 Yesusé re nuné ni Moke re npo férimé ni kawasa né po I ni. I ma nuné ta nwóm yama Jou Lahatala ni, se nase npólén I nmulé po ni Moke Jou Lahatala ni nóté. 4 Se waktu ta rémnómé né, Yesusé nosélé se nésólé ni juba njé. Ga nyó ulét isó se npitno ni sno njé. 5 Rewóré ta néi, nyó wóé se npe po bokoré lo, se néusé ni motemote nesté sóori né ga ntolso re ulét ta npitno po ni sno lo njé.
6 Se waktu Yesusé nfan po Petrus ni bo néus Petrus sóo né, Petrusé nécegé Yesus faje, “Jou, fanfawa se Awé ta bo méus sóogé nte né?”
7 Bóngo Yesusé nécegé Petrusé, “Sói ta Ya re kpe nte, nete msae pafule. Mayta waktu nuéncó, awé nase msae.”
8 Petrusé nécegé nóté, “Jou, masike ga fanfawa nóté, ya nase wleg pa bo méus sóogé nte né.”
Mayta Yesusé ncónglo, “Iga Ya kéus sóomé né pa, awé bisa mdadi Ya niké kyat aw pa.”
9 Bóngo Simon Petrusé nécegé nóté, “Jou, pana fajé, ma maduga sóog na ta méusé né, mayta po faog re nik bébokogé nóté!”
10 Pocé Yesusé nécegé i faje, “Kyat ta re ncepé njé, ni badané né re berési ndimé. Maduga ni sóo né le ta kékoné né, se mare bo néusé nmulé. Mewé ga re fberési, mayta reni isó pocé ta ni wlo njé nberési pafule.” 11 Sogado Yesusé néceg fajé né, sababta I re nuné, pai ta bo nwagé keé I né. Tamulo sogado I nécegé, “Férimé kyaté né reni ta rberési pafule.”
12 Waktu Yesusé néus férimé sóori né rewóré ndimé, ga nduo I ni juba njé nmulé se ntoléné nmulé po góo ta I ntolno péséwé lo né. Bóngo nutné si, “Mewé re fsae pari tisé lesu, péséw ta Ya re kpe po mew ni né? 13 Mewé fkakmé Ya ‘Guru’ re ‘Jou,’ se necé tadélé fatuwé ro, Ya nte menimi Guru re Jou Ya. 14 Se, iga Ya ta kdadi mewé nimi Jou re Guru ta bisa kpe nik diri dolo kyat yabé Ya se kéus sóomi né, se mewé ma mare fpe nimi diri dolo kyat yabé mewé nóté bo mew re mewé faéusé sóomi né isó re isó. 15 Ta Ya re kfaftulo po mew ni né, necé mewé ma mare fpe nóté ta dolo Ya re kpe po mew ni né. 16 Fatélolmo mew fafié, sói ta Ya bo kfaftulo mewé né. Iga kyat yabé ité, ndél pa bo lebe tpélóy po rir tuangé njé ni, fajé nóté re kyat ta rdadi nénané né, ndél pa bo lebe rpélóy po kyat ta nané nfafané ni yabé njé. 17 Férimé ta kécego mewé né, mewé re funé, se iga fdéréré ta néi, wlomi né nase séngséngé bóto mewé.
18 Mayta férimé mew pa, ta bo fatuw-fatuwé fséngé né. Fatuwé ro, Ya ta kpili mewé ndimé, mayta Ya ma kuné, po férimé mewé nte reni isó pocé ta nase bo nwagé keé Ya. Ya kpili ta isó njé né, sababta po tatubé lima né Jou Lahatala re néceg po ni Kitabé wlólo né re ndadi i, ta ni gli né faje, ‘Pai ta nó nak roti né, i ta njéi ta bo nwagé keé Ya né.’ 19 Ta i nwagé Ya pafule né, Ya re kécego mewé ntubé, bo sogado necé re ndadi i, mewé re fdélé ta Ya óro ta Jou Lahatala néjaji kwómé bo kfasalamaté kyaté né. 20 Se fatélolmo mew fafié, ta Ya kécegé nte. Kyat pai le ta ntarima kyaté-kyat ta kané si rpe nik yabé né, necé tadolo re ntarima Ya nóté. Fajé nóté pai ta re ntarima Ya, necé tadolo re rtarima nik Moke Jou Lahatala ta nané Ya kpe ni yabé njé nóté.”
Yesusé nfébingé ta Yudasé bo nwagé keé I né
21 Yesusé néceg fajé rewóré né, ni wlo njé tadélé nkangelangé, se nfébingo ni motemote nesté faje, “Fatélolmo mew fafié sói ta Ya kécegé nte, reni kyat isó po mew ni nte ta nase bo nwagé keé Ya.”
22 Pocé ni motemote nesté rfaténgóto. Se rherané, sababta si runé pa ta Yesusé nécegé né ni maksut po pai ni. 23 Pocé fajé, reni Yesusé ni motemote isó ta Yesusé tadélé nmésié i. Motemote ta njé i ntoléné né nérakén Yesusé. 24 Se Simon Petrusé npe isarat po ni dél motemote ta Yesusé nmésié i njé, bo nané i nutné Yesus faje, “Pai ta bo nwagé keé Awé njé?”
25 Pocé bóngo motemote ta Yesusé nmésié i njé nférakné i néli po Yesusé ni, se nutné I, “Jou, ta méceg péséwé né, Nim maksut po pai ni?”
26 Bóngo Yesusé ncónglo i, “Pésénte Ya ksubuk roti po cawan fapusó ga kdo kyat faisó, kyat ta njéi ro ta kéceg i njé.” Pocé Yesusé néceg fajé rewóré, tabóngo nyó roti se nwalmé po cangkeré lo rewóré ga npo Yudasé. Yudasé njé Simon Iskarioté ni ntu i. 27 Pocé Yudasé nyó roti ta Yesusé npo i né rewóré, ga setané né riri kolano njé nkawasa keé Yudasé ni wlo njé se re nténgén pana, bóngo Yesusé nécegé i faje, “Sói ta bo mpe né, mpe óro.” 28 Mayta Yesusé ni motemote ta rtoléné rémnóm re Yesusé né, reni isó pa ta ncae, pe sói se Yesusé nécegé Yudas fajé né. 29 Sababta pipis ta riséné né Yudasé ta nétané, se reni motemote séfis néli ta récogo ma Yesusé nané Yudasé nfané bo n'goné róri sói néli, ta bo ró re riném po ngénngan ta pélóyé lo né. Si récogo ma Yudasé bo npo gogali po kyat ta reriri re reróri pa né.
30 Pocé Yudasé nyó roti ta Yesusé npo i né, tabóngo ncópén i. Waktu ta néi, re dorémé.
Yesusé ni parenta ta nóbén po ni motemote nesté ni
31 Waktu ta Yudasé re nfan i né, Yesusé néceg faje, “Nete nase reni ta bo ndadi i, ta nase bo npe sogado Kyaté Ntu ta I yama soroga njé bo nduk téltail re horomaté. Bo sogado ndadi tadolo faje, kyaté né ma nase rtail re rhoromat Jou Lahatala. 32 Se iga kyaté né rémnaw ta Jou Lahatala nduk téltail re rhoromat tadolo fanfajé né, Jou Lahatala ma nase npe bo kyaté-kyaté né rtail re rhoromat Yesusé nóté, se mnuw pana férimé ta néi nase bo ndadi i.
33 Ee, Ya nik yomya ta mewé, re mnuw pa na Ya nase kfadéréré re mewé né. Mew ta ntei nase féyówé Ya, mayta nase tadolo nganesó ta Ya re kéceg po agama Yahudi né riri kyat tut ta rpélóyé nesté né, Ya bo kécego mewé nmulé, ‘Po géwgów ta Ya bo kfano lo nte, mewé nase bisa ffan pocé pa.’
34 Nete Ya bo kpo mew parenta esó ta nóbéné né fanfajé: mewé mare famésié isó re isó. Se mewé ma mare fmésié kyaté né tadolo Ya re kmésié mewé né. 35 Bo kyaté né rémnaw ta mewé ffamésié isó re isó, nase runé ta Ya nik motemote mewé.
Yesusé nfébingé ntubé ta Petrusé nase nféyal Yesus pa né
36 Simon Petrusé nécegé Yesus faje, “Jou, Awé nte bo mfan pua se?”
Yesusé ncónglo i, “Géwgów ta Ya bo kfano nte, awé bisa mdé Ya néli pafule. Mayta nuéncó nase mdé Ya néli pocé.”
37 Bóngo Petrusé nécegé Yesusé nóté, “Jou, pe sói se nete bisa kdé Aw pafule? Ya re kfasadia Ya bo kdéréré Awé, se masike bo rfamóté keé ya ma gélesó pa.”
38 Tabóngo Yesusé ncónglo i faje, “Awé mécegé cogo masike bo mduk sói néli ma gélesó pa, nase mdéréré Ya le. Mfatélolmo fafié ta Ya kécegé nte. Po dorém ta ntei óro, mané né rékuku pafule, awé re mécegé mféyal Ya pa né re nuén tel óro.”