Maria népo yégét ta papu mnó né po Yesusé ni sóo lo
12
Góli be ngané wonémé le, kyat agama Yahudi né bo rpe riri ngénngan ta pélóy ta réceg Paska né, se Yesusé nfan po Betania, po Lasarusé ni pnuwé lo. Lasarus ta re nmóté se Yesusé nfépangén i nmulé njé. 2 Se kyat ta pocé pnuwé lo né rpe róri mnómé bo férimé si rémnómé, rfatélolmo Yesusé ni féyfié po sini né. Waktu ta néi, Marta ta nléléyan si. Se Lazarusé ntoléné némnóm re Yesusé, re kyaté-kyat ta rwóm pocé né. 3 Waktu ta si rémnómé né, Maria nyó yégét ta papu mnó né liter wómé. Yégét ta néi tadélé mulo pélóyé. Se népo lawlów-lawlów nóp po Yesusé ni sóo lo né, ga ntolso re ni uté né. Yégété ni papu né, férimé kyat ta po umé wlólo né rfótné ndimé.4 Pocé reni Yudas Iskarioté, i ma Yesusé ni motemote i nóté, i ta nase bo nwagé keé Yesusé né. I néceg faje, 5 “Alii! Yégét ta ni mulo pélóy ta néi ga, ta fié né, nwagé bo ni pipisé né npo keé kyaté-kyat ta reriri reróri pa né. Yégét ta néi ni mulo né pélóo tadolo kyat yabé isó nó pélpólés taun nuéncó.” 6 Masike Yudasé néceg fajé né, mayta i nmésié si pa kyaté-kyat ta reriri reróri pa né, i maduga néceg fajé né sababta i ma fao mlóngé, se nanényó keé kyaté né riri pipis ta niséné né.
7 Se Yesusé néceg faje, “Gélesó pa. Maria npe fajé po Ya ni né, sababta sói ta i npe né necé tadolo re rfasadia po waktu ta kmóté se bo rput Ya né. 8 Kyaté-kyat ta reriri reróri pa né, ngénngan néya né mew re si, se po waktu sói le mewé bisa fgali si. Mayta Ya kfadéréré re mewé né, sogado fajé néli le pa.”
Imam-imam ta rpélóyé né rfasogaro si bo rpuné keé Lasarusé
9 Kyat agama Yahudi né tadélé rfélé, rlongé ta Yesusé I po pnuw Betania né se rpe néli. Si rpe néli né, maduga bo rémnaw be Yesusé le pa, mayta bóngo bo rémnaw Lasarusé nóté, kyat ta re nmóté se Yesusé nfapangén i nmulé njé. 10 Imam-imam ta rpélóyé né rlongé ta néi, tabóngo rfasogaro si bo rpuné keé Yesusé re Lasarusé nóté. 11 Sababta, waktu ta Yesusé nfépangén Lasarusé nmulé né, kyat félé ta po agama Yahudi né tagare rdélé Yesusé, se wlori pana bo rdéréré imam-imam ta rpélóyé nesté.
Waktu Yesusé ncung po kota Yerusalemé né kyat ta félé né rtón I se rtail I
12 Ni malówé néya né, kyat félé ta re si po kota Yerusalemé bo rpe kyat Yahudi né riri ngénngan ta pélóyé, se rlongé ta Yesusé re I po yéféné lo bo nfan po kota Yerusalemé. 13 Poce tabóngo réyó sibu-sibu ni wlu né se rfané rwetcé Yesusé bóngo rgélay re gliri ta pélóyé né réceg faje,
“Hosana!
Ftail I ta Jou Lahatala re nané I nwóm lima njé.
I ta njé I kyat Israelé né riri Kolano I!”
14 Waktu Yesusé re nérakén po kota Yerusalemé né, I nduk keledai wóbno isó, se ntolén po ni too lo né. Sababta sói ta I npe né, necé ta Jou Lahatala re néjaji po tatubé lima né bo ndadi i se necé re rlefo po Kitabé ni wlólo, ta ni glio né faje,
15 “Ee, kyaté-kyat Yerusalem ta mewé, coba fémnawé,
nimi Kolano njé re nwómé, se ma fémtaté le na.
Ta nwómé né ntolén po keledai wóbno isó ni too lo.”
16 Waktu ta kyat félé rtail Yesusé né, Yesusé ni motemote nesté rcae pafule, pe sói se ga rtail Yesusé né, mayta nase rcae fié po waktu ta rtail re rhoromat Yesusé né. Sababta ta Yesusé nmóté se npangéné nmulé né, kyat félé né rfapélóy ngósno né. Rewóré ta néi, ga ni motemote né rcae fié férimé ta rlefo tatubé lima po Jou Lahatala ni Kitabé wlólo né mare ndadi i po Yesus ni ndimé.
17 Waktu Yesusé nkakém Lasarusé ncópén tóma ni kuburé lo bo nfépangén i nmulé né, kyat félé ta si pocé né si ta rfabingé po kyaté-kyat ta Lasarusé re npangéné nmulé. 18 Se kyat ta félé né rfané bo réftón Yesusé, sababta si re rlongé ta I npe mujizaté né se bo rémnawé. 19 Tabóngo kyaté-kyat Yahudi ta rdéréré dodoto Farisi né rfalécego, “Alli, ta ité tfalécego bo tfabatalé keé kyaté kyaté né bo, ma rdélé I na ga ndadi i pa né. Sababta, kyat félé ta po dunia wlólo nte re rwómé se rdéréré keé I ndimé.”
Yesusé nfébingé ta bo nmóté né
20 Po férimé kyat ta rwómé rcambayang po Yerusalemé bo rdéréré agama Yahudi né riri ngénngan ta pélóyé né, pocé reni iglé ta kyat Yahudi si pa ma, rwómé. 21 Si ta néi, rfan po Filipus ni. Filipusé njé i lima pnuw Betsaida, po bótén Galilea. Se récegé i faje, “Moke, amé kéroré bo kfapdipén re Yesusé.”
22 Tabóngo Filipusé nfébingo Andreasé, se si dórén luwé rfané rfébingo Yesusé nóté.
23 Tabóngo Yesusé nécegé si faje, “Nete ni waktu né re nwómo i ro, ta Kyaté Ntu ta yama soroga njé nase bo rtail re rfapélóy ngósno né. 24 Se fatélolmo mew fafié ta Ya kécegé nte. Sói ta nase bo ndadi i po Ya ni né, kfatailo dolo adeade isó nje: Iga kyaté né rtóném gandumé ni ngai njé, nase ntub pa iga réfrai i po bétbété wlólo pa né. Necé tadolo gandumé ni ngai njé nóté, mare rtóném i nóp su, tadolo nmóté né, pocé ga tagare ntubé, rewóré ta néi ga pyono félé. 25 Fajé nóté re mewé. Pai ta nfatubé be i ni diri né le, i ta njéi nase nduk ta fié pa sogado fajé néli le. Mayta pai ta npo ni hidupé bo npe be sói ta Ya kané i né, kyat ta njéi nase nduk ta fié sogado fajé néli le. 26 Pai ta wlo ncuka npe sói ta Ya kané i né, kyat ta njéi mare ndéréré Ya po géwgów pua le. Bo Ya kfan po sói lo le, i ma nase i pocé nóté. Kyat pai lé ga npe ta Ya kané i né, Ya nik Moke njé ma nase nhoromat i nóté.”
27 Yesusé nécegé nóté, “Ya wlegé nje tadélé nkangelangé. Ya re kuné pa na, bo kéceg sói nóté. Se fawa, bo kéceg po nik Moke ni bo nélówé keé kangelangé njé po Ya ni? Necé nase bisa pa! Sababta sogado Ya kwóm po dunia nte né ta bo ktarima kangelang ta njéi.” 28 Tabóngo Yesusé nméiténé ndé ni Moke, se néceg faje, “Moke, sói ta bo ndadi i po Ya ni né, mpe óro, bo kyaté né rtail re rhoromat Awé.”
Rewóré ta néi, rlongé méitén isó yama soroga néceg faje, “Ya re kfaftulo nik kawasa ta pélóyé né po mew ni, se Ya nase kfaftulo nik kawasa ta lebe pélóyé nóté po mew ni.”
29 Kyat félé ta si pocé né rlongé méitén ta njéi, bóngo reni kyat séfis néli récegé cogo ta gli njé rub i, reni iglé nóté ta récegé cogo Jou Lahatala ni nénan ta po soroga né rméiténé rdé Yesusé.
30 Se Yesusé nécegé nóté, “Méitén ta flongé i yama langété njé, nméitén po Ya ni pa, mayta po mew ni. 31 Po nete óro, Jou Lahatala bo nadili kyaté-kyat ta po dunia wlólo nte né, bóngo setan-setané né riri kolano ta nkawasa po dunia wlólo nte ma, Jou Lahatala nase nfaungé keé i. 32 Se iga re rélongé Ya néya po salibé njé ni ro, Ya nase kpe bo férimé kyaté bisa rdéréré Ya.” 33 Yesusé néceg fajé, bo férimé kyaté né runé ta nase bo rcalibé keé I sogado nmóté.
34 Se kyat ta félé né réceg faje, “Po Musa ni kitab abén limé né, Jou Lahatala méceg Mesiasé njé nase nmót pa sogado fajé néli le. Néga pe sói se Awé mécegé, cogo Kyaté ntu ta I yama soroga njé bo nmóté. Kyat méceg i njé pai?”
35 Bóngo Yesusé nécegé si faje, “Re mnuw pa na, Manano njé nase nfadéréré re mewé. Se iga waktu Manano njé i pocé lesu, mewé mare fdéréré be Manano njé le, bo ma sogado dérorémé njé nfaketé keé nimi yéfén na. Sababta pai ta nfan po dérorémé wlólo, i nase nuné pa bo nfan pua. 36 Se iga Manano njé I pote lesu, fdélé i ro Manano ta njé I, bo fdadi yomya-yomya Manano mewé.”
Yesusé néceg fajé rewóré, tabóngo nfané se népiné I.
Kyat agama Yahudi né félé ta rdélé Yesus pa
37 Masike ga Yesusé npe mujizat félé po usnori lo ma, rdélé pa le. 38 Tatubé lima né, nabi Yesaya re nlefo ta si nase rdélé Jou pa, se ni glio né faje,
“Jou, kyaté-kyaté né dolo bo rdélé pa habar ta amé kfébingé né.
Re masike Awé ro ta mfaftulo nim kawasa né po si ni nóté, mayta nase rdélé pa le.”
39 Si nase rdélé pa tadolo fajé né, sababta necé tadolo ta nabi Yesaya re néceg po tatubé lima né se nte re ndadi i, ta ni glio né faje.
40 “Sababta Jou Lahatala re nfabyafé keé mtóri né,
se si rémnaw pa sói ta metégel né.
Wlori né ma Jou re nfamatué keé,
se nase rcae pana sói ta métegélé né
Sababta wlori pa bo rngali si,
se nase kfasalamat si pana.”
41 Sogado nabi Yesaya néceg fajé né, sababta waktu ta Yesusé nwóm pafule né, Jou Lahatala re nfaftulo i tamulo ga re nuné ta Yesusé ni kawasa né tadélé pélóyé. Rewóré tanéi ga nabi Yesaya nfébingé ta Yesusé bo nwómé né.
42 Masike kyat félé ta rdélé Yesusé pa, mayta kyat tut ta rkawasa po agama Yahudi né félé ta rdélé I né. Mayta si wlori pa bo kyat iglé né runé ta si ma rdélé Yesusé, sababta si ma rémtaté kyaté-kyat Yahudi ta rdéréré dodoto Farisi né, nase rfaungé si po riri um sambayangé lo né. 43 Sababta, kyaté-kyat ta rkawasa po agama Yahudi né wlori ncuka bo kyaté né rtail re rhoromat si, mayta masike Jou Lahatala ntail re nhoromat si ma, wlori pa le.
Kyat ta rdélé Yesus pa né nase bo rhukum si
44 Se Yesusé nécegé re gli ta pélóyé, “Kyat pai le ta ndélé Ya, necé maduga ndélé be Ya le pa, mayta i ma re ndélé Jou Lahatala ta nané Ya kwóm po dunia nje né. 45 Se pai le ta re némnaw Ya, necé ta dolo re némnaw Jou Lahatala ta nané Ya njé nóté. 46 Ya kwóm po dunia njé ni wlólo nte né tadolo Manano njé, bo kyat pai le ta ndélé Ya, nase nhidup po dérorémé lo pana. 47 Se iga kyat pai ta nlongé sói ta Ya kfasodoto né, mayta npe ta néi pa, nase Ya pa ta bo kfasól i né. Sababta Ya kwómé nte bo kfasólé kyaté-kyat ta po dunia wlólo nte pa, mayta bo kfasalamat si po róri sélsólé lo né. 48 Se kyat pai le ga ntarima Ya pa, bóngo re ntarima nik dodoto né pa, kyat ta njé i ta nase bo nduk hukumané. Se iga dunia nje bo nkiamaté, pocé ga Jou Lahatala bo nhukum si re Ya nik dodoto né. 49 Sababta sói ta Ya re kfasodoto kyaté né, necé Ya pa ta kméiténé né, mayta lima nik Moke Jou Lahatala ta nané Ya njé ni. I ta njé I ta nané bo kéceg sói ta Ya bo kéceg re kfébingé né. 50 Se Ya kuné Jou Lahatala ni dodoto né, npe bo mewé fhidup re I sogado fajé néli ro. Se sói ta Ya kécego mewé né, necé tadolo sói ta Jou Lahatala nfébingo Ya né.”