Kyat félé rcéngé Yesus po yéfén Yerusalemé
11
Waktu Yesusé I re ni motemote nesté re rérakén kota Yerusalemé né, se rwóm po pnuw Betfage re pnuw Betania ta po métét Zaituné né. Pocé Yesusé nané ni motemote séluwé, 2 nécegé si faje, “Ffan po pnuw ta njé li. Néli nase fémnaw keledai wóbno isó rpitné i, ta isó ncaplo i pafule. Ffasólé ni wólé né, bo fut i lima é. 3 Iga reni kyat ta rutné mewé, ‘Fpe sói se fpe fajé né,’ mewé fsónglo si faje, ‘Jou nané amé kéyó i bo ncaplo i. Rewóré ga kaléé i lima nmulé.’ ”4 Yesusé néceg fajé re wóré, bóngo si dórén luwé né rfan néli po pnuwé njé ni. Rwómé ntali, rémnaw keledai ta rpitné i po um natóo po yéfén lapo lo né, bóngo résólé ni wólé né. 5 Se kyat ta si pocé né rutné si, “Eh, bo fut i pua, keledai njé?”
6 Tabóngo rcónglo si faje, “Jou nané amé kéyó i.” Pocé bóngo kyaté né ma rpo si fié se rut i. 7 Tabóngo rtuda keledai njé néli po Yesus ni, ryéfo i re riri juba né po keledai njé too lo bo Yesusé ncaplo I. 8 Waktu ta Yesusé ncung po Kota Yerusalemé né, reni kyat félé ta ryéfo keé riri juba né po yéféné lo. Iglé né ryó ay séngsóngo ta ni wlu né gélólé lesu, se rfarén nóp po yéfén ta Yesusé bo ndélo né. 9 Kyaté-kyat ta rdéréré I né, rtubé re ta réisémé né rtail I re gagalay re gliri ta pélóyé,
“Hosana! Tfapélóy Jou ngosnó. I ta Jou Lahatala re nané I nwóm lima.
10 Se ttail I, I ta nje I ta bo ndadi Kolano tadolo ité rir délut tatubé lima se kolano Daudé né. Hosana!
Tfapélóy Jou Lahatala ta ntolén po soroga njé!”
11 Yesusé nwóm po Yerusalemé, bóngo ncung po agama Yahudi né riri Um Sambayang ta npélóyé njé ni kintalé lo. Pocé bóngo néjel néli re lima bo némnawé ndimé. Mayta re dorémé, se ncópéné ga I re ni motemote nesté rpólén si nmulé po pnuw Betania.
Yesusé ncawan ay ara isó ta népyon pa njé
12 Ni tómémóné né, Yesusé I re ni motemote nesté rfatoléné keé pnuw Betania. Se rfané rwóm po yéfén fapéluno né, Yesusé nbósémé ntélóté. 13 Se lów i lesu né Yesusé némnaw ay ara isó njé ni wlu né ta délé rubu-rubu fié. Tabóngo npe néli bo némnawé, reni pyono pari tisé. Mayta nwóm néli se némnawé né re pyono fapusó le ma tisé, maduga ni wlu bóto. Sababta nwómo i ni waktu pafule ta bo népyoné. 14 Tabóngo Yesusé nécegé ay ara njé faje, “Awé nase mépyon pana, se ngénngan pésénte oró, reni kyat isó pa ta nase bo ró pyonomé né!” Pocé ni motemote nesté ma rlongé ta Yesusé nécegé né.
Yesusé nféungé kyat ta rfalwagé re rfalgon po Um Sambayang ta npélóyé njé ni kintalé lo né
15 Waktu ta Yesusé I re ni motemote nesté rwóm po kota Yerusalemé, tabóngo Yesusé ncung po agama Yahudi né riri Um Sambayang ta npélóyé njé ni kintalé lo né. Pocé reni kyaté-kyat ta rfalwagé re rfalgoné né, bóngo Yesusé nfaungé keé si. Se nfalalolté keé kyat ta rénlal pipisé né róri meja-meja né, re ta rwagé mané pombo né riri bangko-bangko né ndimé. 16 Yesusé ma npo fié pana bo kyaté né ruté riri gina ga rdé pocé po Um Sambayang ta npélóyé njé ni kintalé lo né. 17 Pocé bóngo Yesusé nfasodoto si, néceg faje, “Mewé ma re funé ta rlefo po Jou Lahatala ni buké wlólo, ta ni glio né faje, ‘Ya nik umé njé géwgów ta farimé suku bangsa né rfajólé bo rméiténé rdé Ya.’ Mayta mewé ga fpe keé i géwgów ta fépiné mewé bo fakalé kyaté.”
18 Imam-imam ta rpélóyé né, re guru-guru agama Yahudi ta runé fié Musa ni kitab abén limé né rlongé ta néi, tabóngo réyówé yéféné bo rpuné keé I. Mayta rémtat I, sababta kyat félé wlori ncuka rlongé ni dodoto né. 19 Bóngo dorém ta néi óro, Yesusé I re ni motemote nesté rfané rfatoléné keé kota Yerusalemé.
Iga bo tmaiténé tdé Jou Lahatala, mare fatuw-fatuw ta tdélé I
20 Ni tómémóné né, Yesusé I re ni motemote né rfané nóté. Ta rfan se rwóm po yéfén fapéluno né, rémnaw ay ara ta i pepé njé re némang sogado po ni wówo lo. 21 Pocé Petrusé nfatélolmo i, bóngo nécegé Yesus faje, “Alli Guru, méngóto! Ay ara ta i pepé njé ta mécegé bo népyon pana njé, re némang i ndimé!”
22 Pocé Yesusé ncónglo si, “Mewé mare fatuw-fatuw ta fdélé Jou Lahatala. 23 Flongé fafié ta bo kécego mewé nte: kyat pai le ta nané métét ta njé li terélóngé i bo ndirké i nélaw po wolété lo, necé nase ndadi i, iga fatuw-fatuwé ndélé Jou re wlo njé ma nfatutén pa né. 24 Tamulo ffatélolmo mew fafié, iga bo fméiténé fdé Jou, sói le ta bo féroré né mare fdélé I ta fatuw-fatuwé I nase npo mewé sói ta mewé bo féroré né. 25 Mayta iga fosélé bo fméiténé fdé Jou ga ffaisno wlo né po kyat ta ncól po mew ni njé lesu, mare fféyfio fdé i su, bo nimi Moke ta I po soroga lo ma nfayangésé keé menómi sélsólé né nóté.” [ 26 Mayta bo mewé fisno kyaté né wlo né lesu, nimi Moke Jou Lahatala ma nase nfayangés pa menómi sélsólé né.]
Agama Yahudi né riri kyat tut ta rkawasa né rutné Yesusé nduk kawasa fawa lima
27 Yesusé I re ni motemote nesté rpólén si nmulé po kota Yerusalemé. Ntéli Yesusé ncung po agama Yahudi né riri Um Sambayang ta npélóyé njé ni kintalé lo né, bóngo nfané se néjelé pocé. Waktu ta néi, imam ta rpélóyé né, guru-guru agama ta runé fié Musa ni kitab abén limé né, re kyat tut Yahudi né riri kyat tut ta rkawasa né rwóm po Yesus ni. 28 Bóngo rutné I, “Ta féléo i ta mpe nte, mduk kawasa fawa lima? Pai ta npo Awé?”
29 Pocé Yesusé ncónglo si, “Ya ma bo kutné mew su. Iga mewé ma fsónglo Ya, Ya ma nase kfébingo mewé, pai ta npo Ya kawasa. 30 Wóré nfabingó Ya, pai ta po kawasa po Yohanes ni sogado nbaptisé kyaté né? Jou Lahatala ta npo i kawasa pari, kyaté né ta rpo i?”
31 Rlóngé ta néi, bóngo rfalacégo faje, “Iga ité técegé ‘Jou Lahatala ta npo i’, I nase nécegé ité, né ga ‘fpe sói se fdélé Yohanes pa né?’ 32 Mayta iga técegé kyat ta rpo i kawasa, témtat be kyat ta félé nte rcawan ité, sababta kyat félé runé Yohanes ta nénbaptisé kyaté njé, Jou Lahatala ta npo i kawasa.”
33 Se récegé Yesus faje, “Ayo, amé ma kuné pa, pai ta npo Yohanes kawasa né.”
Tabóngo Yesusé ncónglo si, “Pana fajé, Ya ma nase kfabingo mew pa, férimé ta Ya kpe né pai ta npo Ya kawasa.”