Jou Lahatala npo fié pa bo tfatélaké
10
Rewóré ta néi, Yesusé nfan po bótén Yudea, re po bótén ta po wóé Yordané ni féspalé né. Pocé ma reni kyat félé ta rwóm lima se rfajóló si po Yesus ni. Tabóngo Yesusé nfasodoto si ta dolo I re nénpe né. 2 Se kyat Yahudi ta rdéréré dodoto Farisi né, reni séfis néli rwóm po Yesus ni bo réyówé nó sélsólé, se rutné I faje, “Guru, iga bo tdéréré ité rir aturan agama né, bisa pari tisé, món ta re réfsówé ga rtélaké keé riri pégelé né?”3 Bóngo Yesusé nutné si nmulé, “Se ta po nabi Musa ni Kitabé lo né, Musa nparenta sói po mew ni?”
4 Si rcónglo I, “Nabi Musa npo fié bo móné né rtélaké riri pégelé né, mayta mare rpe riri surat télaké.”
5 Pocé ga Yesusé nécegé si faje, “Mewé nte fmakotale po Jou Lahatala ni, ta mulo ga Musa nlefo aturan ta néi né. 6 Sababta po faiwóbno fafié, ‘Jou Lahatala ntulada kyaté né, món re mépiné’. 7 I nfarén fajé bo món pai le ta néfsówé, i nase nfatoléné keé ni déluté né, bo i re ni pégelé njé rfatolné si, 8 bo si dórén luwé né rdadi esó le. Se re séluw pana, mayta esó le. 9 Se sói le ta Jou Lahatala re npe se tdadi esó né, ndél pa bo tfatélaké.”
10 Yesusé néceg fajé rewóré, tabóngo kyat ta félé né rfan si, bóngo Yesusé I re ni motemote nesté rcung si némin po umé lo nóté. Pocé ga ni motemote nesté rutné I, “Dodoto ta i péséwé njé ni ngale sói?”
11 Bóngo Yesusé nécegé si faje, “Iga ttélaké rir pégelé né ga téfsóo rór mépin nésé, necé re tyó sólé. 12 Fajé nóté, iga télaké rir légaé né ga téfsóo rór món nésé, necé ma re tyó sólé nóté.”
Yesusé nfabarakat yomya-yomya né
13 Pocé reni kyaté-kyat ta rut yomya ta rémnyaku lesu né po Yesus ni, se Yesusé nétewlé fao né po si ni bo npo si barakaté. Mayta ni motemote nesté rcawané keé kyaté-kyaté né. 14 Se Yesusé némnaw ta néi, bóngo ncawané se nécegé si faje, “Ma fsawan si na yomya-yomya né, famól si bo rwóm lima Ya ni. Sababta kyat ta wlori mya dolo yomya nesté né, ta bo rdadi Jou Lahatala ni kyat si. 15 Se ffatélolmo mew fafié ta Ya kécegé nte: pai le ta wlo pa bo nfamya wlo dolo yomya né, Jou Lahatala nase nkawasa po riri hidupé wlólo pa.”
16 Pocé tabóngo Yesusé négbi yomya nesté lima, se nétewlé fao né po si ni, bóngo nfabarakat si.
Kyat ta reriri reróri félé né, rkangelangé bo rdadi Jou Lahatala ni kyat si né
17 Waktu ta Yesusé tagare bo nfané nóté, néga télél be kyat isó ncéreré lima I ni, se ntiki buku nópé ga ncuba I, bóngo nutné I, “Guru ta mfié, ya nte bo kpe fawa bo kduk ta fié sogado fajé néli le?”
18 Bóngo Yesusé ncónglo i, “Mpe sói se mécegé Ya kfié? Reni kyat isó pa ta nfié. Maduga Jou Lahatala le ta nfié né. 19 Awé re muné, ta Jou Lahatala nané ité né faje: ma tfapun na, ma tyó sól na, ma tfalewés na, ma tmalól na, ma tlólé kyaté bo téyó keé róri haréta né na, re awé mare mhoromaté nim déluté nesté.”
20 Tabóngo kyaté njé nécegé Yesus faje, “Guru, ta kémyaku lesu sogado ngénngan pésénte né, ya re kpe ndimé ta mécegé né.”
21 Pocé Yesusé néngóto i né nmési i, bóngo nécegé i faje, “Góli esó lesu, ta mpe pafule né. Mfané bo mwagé keé férimé nam haréta né, bo ni mulo né mfanténo keé kyat ta reriri reróri pa né. Iga mpe fajé, awé nase mduk ta fié po soroga lo. Rewóré ta néi, ga aw lima bo mdéréré Ya.”
22 Kyaté njé nlongé ta néi né, ni wlo njé tadélé nkangelangé, sababta nó haréta né félé.
23 Pocé, Yesusé néngóto néli re lima po ni motemote nesté ni, bóngo nécegé si faje, “Ta délé rkangelangé, kyat ta reriri reróri félé bo rpo wlori po Jou Lahatala ni bo I nkawasa dolo Kolano po riri hidupé wlólo né.”
24 Pocé Yesusé ni motemote nesté rlongé ta néi né, rdéngó. Bóngo Yesusé nécego si nóté, “Ya nik dél ta kmésié mewé! Tadélé kangelangé, iga kyat ta rpo wlori néli po Jou Lahatala ni bo I nkawasa dolo Kolano po riri hidupé wlólo né. 25 Adeade unta isó bo ncung po smo ni mdoké lo né tadélé nkangelangé. Mayta ta lebe kangelangé né, kyat ta reriri reróri félé né rpo wlori néli po Jou Lahatala ni bo nkawasa dolo Kolano po riri hidupé wlólo né.”
26 Pocé ni motemote né rlongé ta néi, lebe rbóng ta rdéngó, se rfalécego faje, “Alli, pana fajé, pai ta bo nduk salamaté?”
27 Yesusé néngóto si bóngo néceg faje, “Iga kyaté, bisa rfasalamaté riri diri né pa. Maduga Jou Lahatala le ta bisa nfasalamaté kyaté, sababta sói le I bisa npe ndimé.”
28 Pocé bóngo Petrusé néceg faje, “Guru, amé nte re kfatoléné keé ndimé mam sói néli né, se kdéréré Awé!”
29 Bóngo Yesusé nécegé si faje, “Fatélolmo mew fafié, ta Ya kécego mewé nte. Kyat pai le ta ndéréré Ya se néfétén Habar ta Fié yama Jou Lahatala ni, sogado nfatoléné keé ni um pari, fténo re rémó pari, ni neke re moke pari, ni ntu pari, nó bét pari, 30 kyat ta njéi po oras ta nte óro, nase nduké nmulé ni féléo né nuén witéncó néli: umé, fténo, rémó, ni neke re moke, ntu re nó bété. Masike fajé, nase nduk kangelang félé nóté, mayta i nase nduk ta fié sogado fajé néli le. 31 Sababta kyat ta re rtubé né ga nase bo réisémé, mayta kyat ta réisémé né nase bo rtubé si.”
Yesusé nfabingo si re nuén telé ro ta I nase nmóté
32 Yesusé I re ni motemote nesté rfan néya po kota Yerusalemé. Waktu ta rfané né, Yesusé néntubé. Ni motemote nesté wlori né kangelang, bóngo kyat ta rdéréré si né ma rémtaté. Pocé bóngo Yesusé nkakémé ni motemote yófésó re séluwé nesté lima lapo lo né, bóngo nfébingo si sói ta nase bo ndadi po I ni né. 33 Se nécegé si faje, “Flongé fafié é! Nete ité bo tfan néya po kota Yerusalemé. Néya, nase kyaté né bo rgó Kyaté ntu ta I yama soroga njé bo rpo keé I po imam ta rpélóyé, re guru agama ta runé fié Musa ni kitab abén limé nesté ni, bo rpuné keé I. Nase wlori be esó, bo rut I néli po kyat ta rkawasa, ta kyat Yahudi si pa né. 34 Kyat ta rkawasa nesté ma nase rfamiamia keé I, rfatitfo I, rfaspésé I, bóngo re rpuné keé I. Mayta, ngané telé le, I nase npangéné nmulé.”
Kyat ta rpélóy po Jou Lahatala usno lo né, kyat ta néi wlori ncuka rgali kyaté
35 Rewóré ta néi, Yakobusé i re Yohanesé, Zebedeusé ni ntu nesté, rférakné si po Yesus ni, bóngo récegé I faje, “Guru, reni ta amé bo kéror po Aw ni. Iga wlemé, mare msóngélé.”
36 Bóngo Yesusé nutné si, “Bo féror sói po Ya ni?”
37 Si rcónglo I, “Pote se néli bo Awé re mdadi Kolano ga mkawasa, amé kéroré bo mané amé ktolén po nim faspalé. Faisó ntolén po nim faspal wónéyé, isó ga ntolén po nim faspal balété.”
38 Bóngo Yesusé nécegé si faje, “Ta mewé féroré né, funé ni ngale pa. Sababta Ya nte nase bo kduk kangelangé félé. Mewé féfené, bo kyaté né rfakangelang re rfanpuné mew sogado rfamóté mewé né?”
39 Si rcónglo I, “Amé kéfené!”
Pocé bóngo Yesusé nécegé si faje, “Fatuwé, mewé nase fduk ta dolo Ya nte. Sababta kyaté né nase rfakangelang re rfanpuné mewé, sogado rfamóté keé mew tadolo Ya nóté. 40 Mayta pai ta bo ntolén po Ya nik faspal wónéy pari po nik faspal balété né, necé Ya pa ta bo kfaréné né. Sababta géwgów ta néi, Ya nik Moke re nfasadia kyat ta I bo nkakém si né góori.”
41 Waktu Yesusé ni motemote, si dórén yófésó né rlongé ta Yakobus i re Yohanesé réroré né, wlori piso si bóngo rcawané. 42 Pocé Yesusé nkakém si lima ndimé, bóngo nécegé si faje, “Mewé re funé, kyaté-kyat ta rkawasa ta si lima bangsa-bangsa ta rféyal Jou Lahatala pa né, rkawasa keé riri bala re kawasa né. Faje nóté kyat ta lebe rpélóy po si ni né rfakangelang riri kyat ta rkawasa se né. 43 Mayta mewé ma ftalko si na. Sababta iga bo tdadi kyat ta pélóy po Jou Lahatala ni né, mare tfamya wloré né, bóngo tén'gali kyaté. 44 Fajé nóté bo tdadi kyat ta tpélóy po Jou Lahatala ni né, mare tpe rir diri tadolo béyak ité nóté. 45 Sababta, kyaté ntu ta I yama soroga njé ma, nwóm yama soroga né nané kyaté né rgali I pa. Mayta I ta bo n'gali kyaté. I ma nase npo fié bo kyaté né rpuné keé I, necé maduga bo npólésé keé kyat ta félé né róri sélsólé.”
Yesusé nfafié kyat ta nébyafé njé
46 Yesusé I re ni motemote nesté rwóm néli po kota Yerikho. Waktu ta rfané se re rcópén po kota njé ni né, reni kyat félé ta rfané rfadéréré rdé si nóté. Se po yéfén lapo né rémnawé kyat isó njé nébyafé, néntoléné se néror pipis po yéfén lapo lo né. Kyaté njé ngósno Bartimeusé, ni moke njé ngósno Timeusé. 47 Pocé nlongé ta Yesus Kyat Nazareté njé nwetco né, tabóngo n'gélay faje, “Yesusé, kolano Daudé ni ntu re gbu ta Awé, mmesié ya pa!”
48 Pocé kyat ta félé né rlongé i n'gélay fajé né, bóngo rcawané se réceg faje, “Mfaténténgén awé!”
Mayta i ta délé nbóng ta n'gélayé, “Yesusé, kolano Daudé ni ntu re gbu ta Awé, mmésié ya pa!”
49 Tabóngo Yesusé noslé, se néceg faje, “Fkakém i lima!”
Pocé, kyaté né rkakém i se récegé i, “Mfakwaté wlemé njé, bo mosél óro, Yesusé nkakém awé se.”
50 Pocé kyaté njé nlongé ta néi, tabóngo nbablé nasólé keé ni juba njé, se nosélé ga nfan néli po Yesus ni. 51 Néli, bóngo Yesusé nutné i, “Mkakém Ya né bo méror sói?”
Bóngo kyaté njé ncónglo I faje, “Guru, ya kéroré bo bisa kémnawé.”
52 Bóngo Yesusé nécegé i faje, “Awé re mdélé Ya, se mtamé né re bisa mémnawé. Se wóré méléyé ro!” Waktu ta néi óro, kyat ta nébyafé njé re bisa némnawé se nfané nfadéréré re Yesusé.