Adeade kyat ta rpe yabé po bét angguré lo
20
Yesusé nécegé nóté, “Jou Lahatala nkawasa dolo Kolano po ni kyaté-kyat ta rdélé I né, kfatailo dolo adeade isó nje: Reni légaé isó ta renó bét angguré. Se ta rebo malówé néya né, re ncópéné se néyówé kyaté bo rpe yabé po nó bété njé ni. 2 Po waktu ta re nduk kyat séfis néli né, tabóngo i re si rfalécego yabé né ni mulo, ngané esó kyat isó pipis guraci pusó. Si rcónglo i, ‘Iya,’ bóngo rfan néli bété lo se rpe yabé.3 Nihalé tok nuén popét tamamóné né, légaé njé nfan po pasaré lo nóté. Néli faje, némnawé kyat séfis néli réntolén si po pasaré lo reriri yabé gélesó pa se. 4 Bóngo nfano si néli se nécegé si faje, ‘Iga re nimi yabé gélesó pa, ta fié né fpe yabé po nak bét angguré lo. Ya kpólso mewé né nase ftéwtéwno ya pa.’ Pocé rlongé ta néceg fajé né, tabóngo rfané se rpe yabé po bét angguré lo né.
5 Néli faje, nihalé tok nuén yófésó re nuén luw ngénngan fapéluné né, re tok nuén tel mérimé né, légaé njé nfan po pasaré lo néyówé kyat ta bo rpe yabé po nó bété lo nóté, npe tadolo péséwé né. 6 Rewóré ta néi, nihalé re tok nuén lim mérimé né, ncópéné nóté se némnaw po pasaré lo né reni kyat iglé ta re riri yabé gélesó pa nóté. Pocé nfano si bóngo nutné si, ‘Pe sói se nganesó wlólo nje ga fpe yabé pa se fanosélé mew be pote?’
7 Bóngo si rcónglo i, ‘É, amé nte isó ta npo am yabé pa se fanfaje amé le.’
Pocé tabóngo nécegé si faje, ‘Pana fajé, ffané bo fpe yabé po nak bét angguré lo se.’
8 Bóngo ta rebo dorémé né, légaé njé nécegé ni mandoré njé faje, ‘Mkakémé kyaté-kyat ta rpe yabé né, bo mpólso si ro. Kyat ta rcungé rpe yabé réisémé nesté mpólso si ntubé, ga tagare ta rcung ngénngan fapéluné nesté, rewóré ga tagare ta rcung tamémóné nesté.’
9 Pocé kyat ta rpe yabé réisémé nesté rwómé, bóngo npólso si kyat isó pipis guraci pusó. 10 Waktu kyaté-kyat ta rpe yabé ta tamémóné i lesu nesté rwómé ryó riri pipisé né, rarénuta, ‘Ité nase tduk pélpólés lebe pélóy cuci, sababta ité tpe yabé ntubé.’ Momongo, si ma rpólso si né kyat isó pipis guraci pusó, dolo ta iglé né nóté. 11 Waktu ta ryó róri pélpólésé né tadélé rtawtéwno légaé ta nó bété njé. 12 Se réceg faje, ‘Tuangé, bisa mpe fajé pa. Pe sói se kyat ta rcungé rpe yabé réisémé né, maduga tok nuéncó le. Mayta róri pélpólésé né nfamgo re amé, padahal ta amé kpe yabé né re météwé, tagare kafeé am tamémóné sogado mérimé.’
13 Mayta tuangé njé nécegé riri dél ta isó njé faje, ‘Deko, ma msawan na, ya ksól po aw ni pa. Sababta ta faywóbno né ya kécegé bo kpólso aw pipis guraci pusó, mayta awé msóngél iya. 14 Se myó nim pipisé né bo méléyé ro. Sababta ya bo kpólso kyat ta réisémé né tadolo awé nóté. 15 Sababta necé ya nik pipisé, se bo kfarén fawa le, ndé be po ya ni. Mayta nihalé wlem pa bo ya kmésié kyat ta rcungé réisémé né.’
16 Se necé ni ngale kyat ta réisémé né nase bo rtubé, ta rtubé né ga nase bo réisémé.”
Yesusé nfébingé ta nase bo nmóté né re nuén telé ro
17 Nuéncó, Yesus I re ni motemote yófésó re séluwé nesté rfan po kota Yerusalemé. Se po yéfén fapéluno lesu, bóngo Yesusé nkakémé ni motemote nesté se rfara si néli cuci ga nécegé si faje, 18 “Flongé é! Nte bo tfan po kota Yerusalemé. Ntéli nase rgó Kyaté Ntu ta I yama soroga njé, se rut I néli po imam-imam ta rpélóyé né, re guru-guru agama ta runé fié Musa ni kitab abén limé nesté ni. Néli, nase sumori be esó ta récegé I mare nmóté. 19 Se nase rpo keé I néli po kyaté-kyat ta Yahudi si pa né, bo rfaméymóy I re réswako nó wólé ta ni wómo mdalémé né, ga tagare rcalibé keé sogado nmóté. Mayta télapés néli ngané telé le, I nase npangéné nmulé.”
Iga bo tpélóy po farimé Jou ni kyaté né, mare tdadi béyak po farimé kyaté
20 Rewóré ta néi, Zebedeusé ni pégelé, i re ni ntu Yakobusé re Yohanesé, rfan po Yesus ni. Néli bóngo pégelé njé ntiki buku nóp po Yesus usno lo né, se ncuba I bo réror gélesó po I ni.
21 Bóngo Yesusé nutné pégelé njé, “Neke, bo méror sói?”
Bóngo pégelé njé ncónglo I, “Guru, kéroré bo pote se néli, iga re mdadi Kolano ga mkawasa po kyaté-kyat ta rdéréré Awé né, mané ntigé nesté bo rtolén po nim spalé luwé, faisó i po nim féspal wónéyé, faisó i po nim féspal balété.”
22 Yesusé nlongé ta néi, tabóngo nécegé si faje, “Ta mewé féroré né, funé ni ngale pa. Iga bo ftoléné fdé Ya, mewé féfené bo rpe po mew ni né tadolo bo rpe po Ya ni né? Ya kfatailo dolo tiném wóé ta nmaréyé né.”
Si rcónglo I, “Iya, amé kéfené?”
23 Pocé bóngo Yesusé nécegé si faje, “Fatuwé, mewé nase finém wóé ta nmaréy ta dolo Ya bo kinémé né. Mayta pai ta bo ntolén po nik féspal wónéy pari balété né, necé Ya pa ta bo kféréné né. Mayta nik Moke njé, I ta bo nfasadia kyaté-kyat ta I re npili si né góori.”
24 Waktu Yesusé ni motemote yófésó né rlongé riri dél séluwé nesté riri réroré né, tabóngo ta délé wlori piso si. 25 Pocé Yesusé nfajólo si lima ndimé, bóngo nécegé si faje, “Mewé re funé, kyaté-kyat ta rkawasa ta si lima bangsa-bangsa ta rféyal Jou Lahatala pa né, rkawasa keé riri kyaté-kyaté né, fajé nóté re kyat ta rpélóy po si ni né, rfasoyabé po riri kyaté né tadélé météwé! 26 Mayta mewé, ma ftalko si na! Sababta iga bo tdadi kyat ta pélóy po Jou Lahatala ni né, mare tfamya ité bo tleleyané kyaté né. 27 Fajé nóté, iga pai ta bo npélóy po farimé Jou ni kyaté né, mare ndadi béyak po mew ni. 28 Necé tadolo Kyaté Ntu ta I yama soroga njé, I nwóm po dunia nte né bukan ta kyaté né bo rleleyan I pa, mayta I ta bo nleleyané kyaté, bóngo npo fié ni diri bo rpuné keé I, bo npólésé kyat ta félé róri sélsólé né bo rduk salamaté.”
Yesusé nfafié kyat séluw ta rébyafé nesté
29 Waktu ta Yesusé I re ni motemote nesté rcópén lima kota Yerikho se rfané né, reni kyat félé ta rdéréré si. 30 Se pocé fajé, reni kyat séluwé né rébyafé se réntolén si po yéfén lapo lo né. Rlongé ta Yesusé nwetco pocé né, tabóngo rgélayé, “Moke, kolano Daudé ni ntu re gbu ta Awé, mésié amé nte!”
31 Pocé kyat ta félé né rlongé si rgélayé né, rcawané se réceg faje, “É, ffaténgténgén mewé, ma fpe gégliné na!”
Mayta si ga ta délé rbóng ta rgélayé, “Moke, kolano Daudé ni ntu re gbu ta Awé, mésié amé nte!”
32 Pocé tabóngo Yesusé nwoslé, se nkakém si lima bóngo nutné si, “Fkakém Ya né bo féror sói?”
34 Yesusé nlongé ta réceg fajé né tadélé nmésié si, se nétané mtóri né tabóngo ta néi óro, re bisa rémnawé. Rewóré ta néi, bóngo si ma rfané se rdéréré Yesusé nóté.